VIDEO: 'મારી મહેનત પર પાણી...', 8 મહિના સુધી નદી સાફ કરી ત્યાં લોકોએ ફરી કચરાનો ઢગલો કરી દીધો

Bittu Tabahi Ajnar River Cleanup Madhya Pradesh: મધ્યપ્રદેશમાં અજનાર નદીને આઠ મહિના સુધી સાફ કરવામાં સમય વિતાવ્યા બાદ, પર્યાવરણ કાર્યકર્તા અને કન્ટેન્ટ ક્રિએટર બિટ્ટુ તબાહી જ્યારે પાછા ફર્યા ત્યારે તેમને નદીના કાંઠે ફરીથી કચરો ફેલાયેલો જોવા મળ્યો. ઇન્સ્ટાગ્રામ પર શેર કરાયેલા એક વીડિયોમાં બિટ્ટુએ નદીની દુર્દશા પર પોતાની નિરાશ વ્યક્ત કરી હતી, અને ફરી એકવાર જાતે જ કચરો સાફ કરતાં નજરે પડ્યા હતા. આ વીડિયો જોઈને સોશિયલ મીડિયા યુઝર્સે લોકોની નાગરિક સમજ પર સવાલો ઉઠાવ્યા છે, અને બિટ્ટુના અથાક પ્રયાસોની પ્રશંસા કરી છે. બિટ્ટુએ પોતાના વીડિયોના કેપ્શનમાં લખ્યું કે, 'મેં ક્યારેય કલ્પના પણ નહોતી કરી કે મારી આઠ મહિનાની સખત મહેનત આ રીતે પાણીમાં વહી જશે.'

બિટ્ટુ તબાહી અજનાર નદી સાફ કરવા પાછા ફર્યા

બિટ્ટુએ જણાવ્યું કે, સફાઈ અભિયાન શરૂ કરતાં પહેલા તે સુરક્ષા માટે પોતાના સાધનો સાથે રાખે છે, અને મોજાં પહેરે છે. તેમણે કહ્યું કે, તેઓ પહેલા નદીના કાંઠેથી કચરો હટાવે છે અને પછી, તરતા ના આવડતું હોવા છતાં કચરો બહાર કાઢવા માટે પાણીમાં ઉતરે છે.

'તમે હીરો છો': સોશિયલ મીડિયા પર પ્રતિક્રિયાઓ

આ વીડિયો પર પ્રતિક્રિયા આપતાં એક યુઝરે લખ્યું, 'ખૂબ જ દુઃખદ… પણ ભાઈ, તમે હીરો છો. તમને સલામ!' અન્ય એક યુઝરે કોમેન્ટ કરી છે કે, 'ભારતના લોકો સ્વચ્છ પર્યાવરણના હકદાર નથી. અહીં સિવિક સેન્સ ન હોવી એ ગુના જેવું છે.' બિટ્ટુએ સોશિયલ મીડિયા યુઝર્સ પાસે એવા સૂચનો પણ માંગ્યા છે કે, કચરો વધુ સારી રીતે કેવી રીતે દૂર કરી શકાય. અગાઉ સપ્ટેમ્બરમાં, બિટ્ટુ અને તેમની ટીમે દિલ્હીમાં યમુના નદીના એક હિસ્સામાંથી 585 કિલો કચરો એકત્રિત કર્યો હતો, અને બાદમાં ગુરુગ્રામ તથા નોઈડામાં પણ સફાઈ અભિયાન ચલાવ્યું હતું.