કોચિંગ સેન્ટરોને દિલ્હીની રેખા સરકારનું અલ્ટીમેટમ, એક મહિનામાં સુરક્ષા માપદંડો લાગુ કરો, નહીં તો થશે સીલ

Delhi CM Rekha Gupta Gives One Month Ultimatum : દિલ્હી સરકારે કોચિંગ સેન્ટરોમાં વિદ્યાર્થીઓની સુરક્ષાને લઈને સંચાલકોને એક મહિનાનું કડક અલ્ટીમેટમ જાહેર કર્યું છે. મુખ્યમંત્રી રેખા ગુપ્તાએ સ્પષ્ટ શબ્દોમાં જણાવ્યું છે કે, તમામ કોચિંગ સેન્ટરો એક મહિનાની અંદર સુરક્ષાના નક્કી કરેલા તમામ માપદંડો લાગુ કરી દે, નહીં તો તેમને સીલ કરી દેવામાં આવશે. દિલ્હીમાં હાલમાં કુલ 924 રજિસ્ટર્ડ કોચિંગ સેન્ટર્સ કાર્યરત છે. સરકારનો આ મોટો નિર્ણય લખનઉમાં સર્જાયેલી એક દુર્ઘટના બાદ લેવામાં આવ્યો છે.

દિલ્હીમાં 3 મહિનામાં નવો કાયદો આવશે

દિલ્હીમાં હાલ કુલ 924 કોચિંગ સેન્ટરો ચાલી રહ્યા છે. સેફ્ટીના નિયમો લાગુ કરવા માટે સરકાર તરફથી 1 મહિનાનો સમય આપવામાં આવ્યો છે. સીએમ રેખા ગુપ્તાએ જણાવ્યું કે, 'કોચિંગમાં ભણતા વિદ્યાર્થીઓની સુરક્ષાને ધ્યાનમાં રાખીને હાઈકોર્ટ દ્વારા રચવામાં આવેલી જસ્ટિસ આર. કે. ગૌબા કમિટીની ભલામણોનો સ્વીકાર કરી લેવામાં આવ્યો છે. તમામ કોચિંગ સેન્ટરોએ આ ભલામણોનું પાલન કરવું પડશે. આ વ્યવસ્થાને કાયમી બનાવવા માટે અમે ટૂંક સમયમાં એક નવો કાયદો પણ લાવવા જઈ રહ્યા છીએ. દિલ્હીની તમામ કોચિંગ સંસ્થાઓને એક મહિનાનો સમય આપવામાં આવે છે, જેથી તેઓ ફાયર NOC (ફાયર સેફ્ટી સર્ટિફિકેટ) મેળવી લે, સુરક્ષાના જરૂરી સાધનો વસાવી લે, અને સેફ્ટીને લગતા તમામ નિયમો પૂરા કરે. જો નિયત સમયમાં આ માપદંડો પૂરા નહીં થાય તો સંસ્થાને સીલ કરવામાં આવશે.'

વિદ્યાર્થીઓ પાસે માંગી મદદ

રેખા ગુપ્તાએ જણાવ્યુ કે 'દિલ્હીના કોચિંગ સેન્ટરોમાં અભ્યાસ કરતા લાખો બાળકોના જીવનની સુરક્ષા અમારી જવાબદારી છે. આ બાબતમાં અમને વિદ્યાર્થીઓનો પણ સહકાર જોઈએ છે. જો કોઈ વિદ્યાર્થીને તેની કોચિંગ સંસ્થામાં સુરક્ષાને લગતી કોઈ ખામી કે ગરબડ દેખાય, તો તે તેની માહિતી સીધી અમારા સુધી જરૂર પહોંચાડે.'

કડકમાં કડક કાર્યવાહી કરીશું: રેખા ગુપ્તા

મુખ્યમંત્રીએ વધુમાં જણાવ્યું કે, 'નિયમોનું ઉલ્લંઘન કરનારાઓ સામે અમે કડકમાં કડક કાનૂની પગલાં ભરીશું. સરકાર કોચિંગ સંસ્થાઓના નિયમન માટે જે કાયદો લાવી રહી છે, તેને પસાર થવામાં આશરે ત્રણ મહિના જેટલો સમય લાગશે. જો કે, આ સમયગાળા દરમિયાન પણ હાઈકોર્ટની સમિતિની ભલામણોનો અમલ કરાવવા માટે સરકારે ઉચ્ચ શિક્ષણ નિયામકના અધ્યક્ષપદે એક ખાસ સમિતિની રચના કરી દીધી છે, જે કોચિંગ સંસ્થાઓના સંચાલન, સુરક્ષા અને જાળવણીના ધોરણોની તપાસ કરશે.'