LPG ગ્રાહકો માટે મોટા સમાચાર : e-KYCની તારીખ લંબાવાઈ, સમયસર નહીં કરાવો તો બુકિંગમાં પડશે મુશ્કેલી

LPG E-KYC Deadline : સરકાર દ્વારા એલપીજી ગેસ કનેક્શન ધરાવતા ગ્રાહકો માટે e-KYC પૂર્ણ કરવાની છેલ્લી તારીખ લંબાવીને મોટી રાહત આપવામાં આવી છે. જો તમારી પાસે પણ એલપીજી કનેક્શન હોય તો કોઈપણ અગવડતાથી બચવા માટે ઓનલાઈન અથવા ઓફલાઈન માધ્યમથી તાત્કાલિક e-KYC પ્રક્રિયા પૂર્ણ કરી લેવી જરૂરી છે.

નવી છેલ્લી તારીખ

ગેસ એજન્સીઓ પર ગ્રાહકોની ભારે ભીડને ધ્યાનમાં રાખીને સરકારે e-KYC કરાવવાની નવી ડેડલાઇન 31 ઓગસ્ટ નક્કી કરી છે, જેથી દરેક ગ્રાહક સરળતાથી આ વેરિફિકેશન કરાવી શકે. આ સમયમર્યાદા સુધીમાં જે ગ્રાહકોનું e-KYC પૂર્ણ નહીં થાય તેઓને રાંધણ ગેસ સિલિન્ડર બુકિંગ કરવામાં મુશ્કેલી પડી શકે છે.

e-KYC નહીં કરાવો તો શું થશે?

જો તમે 31 ઓગસ્ટ સુધીમાં e-KYC પૂર્ણ નહીં કરો, તો તમારું કનેક્શન તાત્કાલિક રદ કરવામાં નહીં આવે, પરંતુ ઘરેલુ સિલિન્ડર બુક કરાવવામાં અને તેની ડિલિવરી મેળવવામાં ભારે સમસ્યાઓનો સામનો કરવો પડી શકે છે.

સબસિડી અટકી જવાનું જોખમ

કેટલાક કિસ્સાઓમાં વેરિફિકેશન બાકી રહેતા સરકાર તરફથી મળતી ગેસ સબસિડીનો લાભ અટકી શકે છે. જ્યાં સુધી e-KYC પૂર્ણ ન થાય ત્યાં સુધી ગ્રાહકોએ સિલિન્ડર માટે વધારાની અથવા પૂરી કિંમત ચૂકવવી પડી શકે છે.

સરકાર શા માટે કરાવી રહી છે e-KYC?

આ પ્રક્રિયાનો મુખ્ય હેતુ એ સુનિશ્ચિત કરવાનો છે કે ઘરેલુ એલપીજી કનેક્શન સાચા અને વાસ્તવિક ગ્રાહકના નામે જ ચાલી રહ્યું છે. આ ઉપરાંત સબસિડીવાળા ઘરેલુ ગેસ સિલિન્ડરનો ગેરકાયદેસર રીતે કોમર્શિયલ ઉપયોગ થતો અટકાવવા માટે પણ સરકાર આ વેરિફિકેશન કરાવી રહી છે.

કેવી રીતે પૂર્ણ કરવી e-KYC પ્રક્રિયા?

ગ્રાહકો પોતાના મોબાઈલમાં Aadhaar FaceRD એપ અથવા સંબંધિત ગેસ કંપનીની ઓફિશિયલ એપ જેવી કે IndianOil ONE, ભારત ગેસ કે HP ગેસની એપ ડાઉનલોડ કરીને ઘરે બેઠા e-KYC કરી શકે છે. આ પ્રક્રિયા માટે આધાર કાર્ડ સાથે મોબાઈલ નંબર લિંક હોવો જરૂરી છે. આ સિવાય નજીકની ગેસ એજન્સી પર રૂબરૂ જઈને પણ ઓફલાઈન રીતે આ કામ કરાવી શકાય છે.