72 કલાકથી 90 દિવસની ઈમરજન્સીની તૈયારી: અમેરિકા-બ્રિટન-જાપાન અચાનક કેમ કરી રહ્યા છે ચીજ-વસ્તુઓનો સંગ્રહ?

Global Emergency Preparedness : વિશ્વના શક્તિશાળી દેશોમાં હાલના સમયમાં એક ચોંકાવનારી હલચલ જોવા મળી રહી છે. યુનાઇટેડ કિંગડમ (UK), અમેરિકા (US) અને જાપાનની સરકારો તેમના નાગરિકો અને મહત્ત્વની લશ્કરી સંસ્થાઓને અચાનક ઇમરજન્સી માટે તૈયાર રહેવાની સલાહ આપી રહી છે. લોકોને ઘરમાં ખાવા-પીવાની વસ્તુઓ અને જરૂરી સામાનનો સંગ્રહ કરવા માટે અપીલ કરવામાં આવી રહી છે. શું આ કોઈ મોટા યુદ્ધની ચેતવણી છે કે પછી કુદરતી આફતનો ડર? ચાલો સમજીએ કે આ વિકસિત દેશો કયા ખતરા માટે તૈયારી કરી રહ્યા છે.

UK ની 72 કલાકની તૈયારી અને "Be Ready" અભિયાન

બ્રિટિશ સરકારે તાજેતરમાં નાગરિકો માટે "Be Ready" (તૈયાર રહો) નામનું એક નવું અભિયાન શરૂ કર્યું છે. આ અભિયાન હેઠળ લોકોને અપીલ કરવામાં આવી છે કે તેઓ પોતાના ઘરમાં ઓછામાં ઓછા 72 કલાક ચાલે તેટલો જરૂરી સામાન જમા કરી રાખે. આ સામાનમાં પીવાનું પાણી, લાંબા સમય સુધી બગડે નહીં તેવો ખોરાક, દવાઓ, ફ્લેશલાઇટ, સ્પેર બેટરી, રેડિયો, ચાર્જ કરેલી પાવર બેંક અને થોડી રોકડ રકમ રાખવાની સલાહ અપાઈ છે.

સરકારનું માનવું છે કે ભારે હવામાન, પૂર, જંગલની આગ, ઇન્ટરનેટ કે વીજળી ડૂલ થવી, સાયબર હુમલા અને મહત્ત્વપૂર્ણ માળખાગત સુવિધાઓ પર હુમલા થવાની શક્યતાઓ વધી ગઈ છે. બ્રિટિશ સંરક્ષણ અધિકારીઓને ડર છે કે વિદેશી દુશ્મનો તેમની સપ્લાય ચેઇન અને જરૂરી સેવાઓ પર અડચણ ઊભી કરી શકે છે. સરકાર ઈચ્છે છે કે કટોકટીના શરૂઆતના દિવસોમાં લોકો માત્ર સરકારી મદદ પર નિર્ભર ન રહે અને પોતાની વ્યવસ્થા જાતે કરી શકે.

અમેરિકાની મિલિટરી યોજના: પ્રોજેક્ટ "FORTRESS"

અમેરિકાની પરિસ્થિતિ અને ચિંતા બ્રિટન કરતા અલગ છે. ત્યાં નાગરિકો કરતા લશ્કરી સુરક્ષા પર વધુ ભાર મૂકવામાં આવી રહ્યો છે. અમેરિકન ડિપાર્ટમેન્ટ ઓફ ડિફેન્સે "FORTRESS" નામની એક મોટી પહેલ શરૂ કરી છે, જેના અંતર્ગત સુનિશ્ચિત કરવામાં આવી રહ્યું છે કે અમેરિકાના તમામ મુખ્ય લશ્કરી થાણાઓ ઓછામાં ઓછા 90 દિવસ સુધી બહારની કોઈ પણ મદદ વગર સ્વતંત્ર રીતે ચાલી શકે.
અમેરિકા માને છે કે હવે ભવિષ્યના સંઘર્ષો માત્ર યુદ્ધના મેદાન પૂરતા મર્યાદિત નહીં રહે. દુશ્મનો પાવર નેટવર્ક, કમ્યુનિકેશન સિસ્ટમ અને સપ્લાય ચેઇનને પણ નિશાન બનાવી શકે છે. આથી, મોટા યુદ્ધ, સાયબર એટેક કે માળખાગત હુમલાની સ્થિતિમાં 90 દિવસ સુધી વીજળી, પાણી, બળતણ અને સંચાર વ્યવસ્થા જળવાઈ રહે તે માટે તેઓ માઇક્રોગ્રીડ, બેકઅપ સિસ્ટમ્સ, એનર્જી સિક્યોરિટી અને ફ્યુઅલ સ્ટોરેજ જેવી આધુનિક ટેક્નોલોજી પર ઝડપથી કામ કરી રહ્યા છે.

જાપાનની અગમચેતી: 3 દિવસથી 1 અઠવાડિયાનો સંગ્રહ

યુકે અને અમેરિકા પછી જાપાને પણ અગમચેતીનો સંદેશ આપ્યો છે. ઇન્ટરનેટ પરથી મળતી નવી માહિતી મુજબ, 2 નવેમ્બર 2026 થી જાપાનની નવી રાષ્ટ્રીય આપત્તિ વ્યવસ્થાપન એજન્સી નાગરિકોને ઘરમાં ઓછામાં ઓછા 3 દિવસથી લઈને એક અઠવાડિયા સુધી ચાલે તેટલો ખોરાક, પીવાનું પાણી અને ટોઇલેટ/હાઈજીન સપ્લાયનો સ્ટોક રાખવાની સલાહ આપવા જઈ રહી છે.

જાપાનની મુખ્ય ચિંતા કોઈ યુદ્ધ નથી, પરંતુ કુદરતી આફતો છે. જાપાન પર ભૂકંપ અને સુનામી જેવી કુદરતી આફતોની તલવાર કાયમી તોળાયેલી રહે છે. સરકાર જાણે છે કે મોટા ભૂકંપ પછી ઘણીવાર વીજળી, પાણી અને વાહનવ્યવહારની સેવાઓ ખોરવાઈ જાય છે. આથી આપત્તિના સમયમાં લોકો શરૂઆતના દિવસોમાં આત્મનિર્ભર રહી શકે તે માટે આ વ્યવસ્થા પર ભાર મૂકવામાં આવ્યો છે.

શું વિશ્વ કોઈ મોટી કટોકટી તરફ આગળ વધી રહ્યું છે?

આ બધી એડવાઇઝરી જોઈને એવું લાગી શકે કે દુનિયાને માથે કોઈ મોટું સંકટ ભમી રહ્યું છે, પરંતુ હાલમાં કોઈ પણ દેશે મોટા યુદ્ધ કે હુમલાની સત્તાવાર ચેતવણી આપી નથી. જોકે, એ વાત સ્પષ્ટ છે કે દુનિયાભરની સરકારો હવે ભવિષ્યના જોખમોને પહેલાં કરતા વધુ ગંભીરતાથી લઈ રહી છે. ક્લાઈમેટ ચેન્જ, સાયબર હુમલાઓનો વધતો ખતરો, વૈશ્વિક સપ્લાય ચેઈનની નબળાઈઓ અને ભૂ-રાજકીય તણાવ (geopolitical tension) ને કારણે દરેક દેશ પોતાની ઇમરજન્સી તૈયારીઓને મજબૂત કરવા માટે મજબૂર બન્યો છે. દરેક દેશની ચિંતાઓ અલગ છે, પણ સંદેશો એક જ છે: કટોકટીના સમયે નાગરિકો અને સંસ્થાઓએ શરૂઆતના દિવસોમાં પોતાને મેનેજ કરવા માટે સક્ષમ હોવા જોઈએ.