દિલ્હી એરપોર્ટ પર ગંભીર સુરક્ષા ચૂક: ઇમિગ્રેશન વગર 3 લોકો મ્યુનિક પહોંચી ગયા, સરકારે બોલાવી ઇમરજન્સી બેઠક

Security Lapse At Delhi Airport Immigration: દિલ્હીના ઇન્દિરા ગાંધી ઇન્ટરનેશનલ એરપોર્ટ પર સુરક્ષા વ્યવસ્થામાં એક ચોંકાવનારી અને ગંભીર ચૂક સામે આવી છે. ત્રણ ઇટાલિયન મુસાફરો અમ્રિતસરથી દિલ્હી પહોંચ્યા બાદ ફરજિયાત ઇમિગ્રેશન પ્રક્રિયા પૂર્ણ કર્યા વગર જ લુફ્થાન્સાની ફ્લાઇટ પકડીને જર્મનીના મ્યુનિક શહેર પહોંચી ગયા હતા. દેશની સુરક્ષા સાથે જોડાયેલી આ ગંભીર બેદરકારી સામે આવ્યા બાદ કેન્દ્રીય ગૃહ મંત્રાલયએ તાકીદની ઉચ્ચ સ્તરીય બેઠક બોલાવી છે.

ગૃહ સચિવ ગોવિંદ મોહનની અધ્યક્ષતામાં કર્તવ્ય ભવન ખાતે બેઠક

આ ઘટનાની ગંભીરતાને ધ્યાને રાખીને કેન્દ્રીય ગૃહ મંત્રાલયના કાર્યાલય કર્તવ્ય ભવન ખાતે એક તાકીદની બેઠક બોલાવવામાં આવી છે. કેન્દ્રીય ગૃહ સચિવ ગોવિંદ મોહનની અધ્યક્ષતામાં યોજાનારી આ બેઠકમાં:

• સિવિલ એવિએશન મંત્રાલયના સેક્રેટરી અને એડિશનલ સેક્રેટરી,
• ઇન્ટેલિજન્સ બ્યુરોના ડિરેક્ટર,
• ગૃહ મંત્રાલયના વરિષ્ઠ સચિવો,
• બ્યુરો ઓફ ઇમિગ્રેશન (BoI)ના કમિશનર,
• એર ઇન્ડિયા ગ્રુપ હેડ,
• દિલ્હી એરપોર્ટના CEO (DIAL) હાજર રહેશે.

4 સપ્ટેમ્બરે બની ઘટના: એર ઇન્ડિયાને કારણદર્શક નોટિસ

આ સમગ્ર ઘટના 4 સપ્ટેમ્બરના રોજ બની હતી. કેન્દ્રીય ગૃહ મંત્રાલયની દરમિયાનગીરી બાદ નાગરિક ઉડ્ડયન મંત્રાલય (MoCA)એ 12 સપ્ટેમ્બરે એર ઇન્ડિયાને કારણદર્શક નોટિસ પાઠવી હતી. જોકે, એર ઇન્ડિયા તરફથી આ મામલે હજુ સુધી કોઈ સત્તાવાર ખુલાસો કે જવાબ રજૂ કરવામાં આવ્યો નથી.

અમ્રિતસરથી શરૂ થઈ ભૂલ: 'I-to-I' ટ્રાન્સફરમાં મોકલી દેવાયા મુસાફરો

સૂત્રોના જણાવ્યા અનુસાર, સુરક્ષામાં આ ચૂક અમ્રિતસર એરપોર્ટ પર થયેલી ગેરસમજથી શરૂ થઈ હતી. આ ત્રણેય ઇટાલિયન નાગરિકોને અમ્રિતસર એરપોર્ટ પરથી જ દિલ્હી માટે તેમજ આગળ લુફ્થાન્સાની મ્યુનિક ફ્લાઇટ એમ બંને બોર્ડિંગ પાસ એકસાથે ઇશ્યૂ કરી દેવામાં આવ્યા હતા. સામાન્ય નિયમ મુજબ આ મુસાફરોએ દિલ્હી એરપોર્ટ પર પહોંચીને ભારતમાંથી એક્ઝિટનું ફરજિયાત ઇમિગ્રેશન ક્લિયરન્સ મેળવવાનું હતું.

જોકે સ્ટાફની ગંભીર બેદરકારીના કારણે તેમને સીધા I-to-I (International-to-International) ટ્રાન્સફર એરિયામાં મોકલી દેવાયા. આ ટ્રાન્સફર એરિયા માત્ર વિદેશથી આવીને અન્ય ત્રીજા દેશમાં જતાં ટ્રાન્ઝિટ મુસાફરો માટે હોય છે, જેના પરિણામે આ મુસાફરો ભારતીય ઇમિગ્રેશન પ્રક્રિયામાંથી પસાર થયા વિના સીધા વિમાનમાં બેસીને મ્યુનિક પહોંચી ગયા હતા.

હબ-એન્ડ-સ્પોક મોડેલનો નિયમ શું કહે છે?

સરકારે અમ્રિતસર જેવા ઘણા એરપોર્ટ પર 'હબ-એન્ડ-સ્પોક મોડેલ' લાગુ કર્યું છે, જેમાં વિદેશ જતાં મુસાફરોનું ઇમિગ્રેશન મૂળ એરપોર્ટ (સ્પોક) પર જ પૂરું કરી દેવાય છે જેથી હબ (દિલ્હી) પર તેમણે માત્ર સિક્યોરિટી ચેકમાંથી જ પસાર થવું પડે. જોકે આ કિસ્સામાં બંને એરલાઇન્સ વચ્ચે લાગુ પડતી હબ-એન્ડ-સ્પોક વ્યવસ્થા નહોતી, જેથી નિયમ મુજબ દિલ્હી ખાતે ઇમિગ્રેશન કરાવવું કાયદેસર ફરજિયાત હતું. યોગ્ય ચેકિંગ વગર આંતરરાષ્ટ્રીય ફ્લાઇટમાં પ્રવેશી જવાના આ કેસને સુરક્ષા એજન્સીઓ અત્યંત ગંભીરતાથી તપાસી રહી છે.