દિલ્હી-NCRમાં ફટાકડા પર સંપૂર્ણ પ્રતિબંધ નહીં: સુપ્રીમ કોર્ટે કહ્યું- વિરાટ કોહલી જેવા સેલેબ્સની મદદ લો!

Supreme Court On Delhi NCR Firecracker : સુપ્રીમ કોર્ટે સ્પષ્ટતા કરી છે કે, તે દિલ્હી-NCRમાં ફટાકડા પર સંપૂર્ણપણે પ્રતિબંધ મૂકવાના પક્ષમાં નથી, પરંતુ આ અંગે એક સંતુલિત આદેશ જાહેર કરશે. કોર્ટે જણાવ્યું કે નિયમોનું ઉલ્લંઘન કરીને ગેરકાયદેસર રીતે ફટાકડા વેચનારા લોકો સામે કડક કાર્યવાહી થવી જોઈએ. આ સાથે જ કોર્ટે સૂચન કર્યું છે કે ફટાકડા અંગે લોકોમાં જાગૃતિ ફેલાવવા માટે વિરાટ કોહલી જેવી જાણીતી હસ્તીઓનો સહારો લેવો જોઈએ.

ફટાકડાના નુકસાન અને તેના ઉપયોગને લઈને નવી પેઢી ઘણી જાગૃત : સુપ્રીમ કોર્ટ

કોર્ટે આગળ કહ્યું કે, તે તહેવારોના સમયે લોકોના ઉત્સાહ અને ખુશીઓમાં કોઈ ખલેલ પહોંચાડવા માંગતી નથી. નવી પેઢી પહેલાથી જ ફટાકડાના નુકસાન અને તેના ઉપયોગને લઈને ઘણી જાગૃત છે. આ સાથે અદાલતે પ્રદૂષણ અંગે ગંભીર ચિંતા વ્યક્ત કરતાં જણાવ્યું કે, આ મોટી સમસ્યાનો ઉકેલ લાવવા માટે ઉચ્ચ સ્તરે કામ કરવાની જરૂર છે.

આદેશના ઉલ્લંઘન બદલ સુપ્રીમ કોર્ટ નારાજ

દર વર્ષે આ પ્રકારના આદેશો બહાર પાડવા અંગે સુપ્રીમ કોર્ટે નારાજગી વ્યક્ત કરતાં કહ્યું કે, દર વર્ષે આ મુદ્દે આદેશ આપવા પડે છે. હવે આ બાબત અદાલત માટે લગભગ એક ઔપચારિક કે એકેડેમિક જેવી બની ગઈ છે. કોર્ટે નોંધ્યું કે તેના આદેશોનું પાલન ઓછું થાય છે અને ઉલ્લંઘન વધુ જોવા મળે છે. માત્ર પ્રતિબંધ મૂકવાથી આ સમસ્યાનો કોઈ કાયમી ઉકેલ દેખાતો નથી.

પ્રદૂષણ મામલે દિલ્હી સરકાર ગંભીર : લેવાશે અનેક પગલાં

સુનાવણી દરમિયાન દિલ્હી સરકારે પોતાની રજૂઆત કરતા કહ્યું કે તે પ્રદૂષણ નિયંત્રણને લઈને સંપૂર્ણપણે ગંભીર છે. સરકાર ટૂંક સમયમાં દિલ્હીમાં બહારથી આવતા BS6 વાહનો પર પ્રતિબંધ મૂકવા, સરકારી કચેરીઓના કામકાજના સમયમાં ફેરફાર કરવા અને સ્મોગ ગનનો વ્યાપક ઉપયોગ કરવા જેવા અનેક અસરકારક પગલાં અમલમાં મૂકશે.

અમાઇકસ ક્યુરીની ચેતવણી : ગંભીર સ્વાસ્થ્ય સમસ્યાઓનું જોખમ

કોર્ટની મદદ માટે નિમાયેલા અમાઇકસ ક્યુરીએ જણાવ્યું કે, ફટાકડા ફૂટવાથી મોટા પ્રમાણમાં પાર્ટીક્યુલેટ મેટર હવામાં ભળે છે. આનાથી PM 2.5 જેવા અતિ સૂક્ષ્મ કણો ફેફસાં અને લોહી દ્વારા શરીરના અન્ય ભાગોમાં પહોંચી શકે છે, જે સ્વાસ્થ્ય સંબંધિત અત્યંત ગંભીર બીમારીઓ પેદા કરી શકે છે.

ગ્રીન ફટાકડા પણ સંપૂર્ણ પ્રદૂષણમુક્ત નથી

અમાઇકસ ક્યુરીએ કોર્ટ સમક્ષ એ બાબત પણ સ્પષ્ટ કરી કે ગ્રીન ફટાકડા પણ સંપૂર્ણપણે પ્રદૂષણમુક્ત હોતા નથી. જોકે તેમાં સામાન્ય ફટાકડાની સરખામણીએ ઉત્સર્જન થોડું ઓછું થાય છે, છતાં તે એર ક્વોલિડી પર નકારાત્મક અસર તો પાડે જ છે.