નેટ ડાયરેક્ટ ટેક્સ કલેક્શન ૭.૨ ટકા વધીને રૃ. ૨૨.૮ લાખ કરોડ

નવી દિલ્હી, તા. ૧૯

ચાલુ નાણાકીય વર્ષમાં ૧૭ માર્ચ, ૨૦૨૬ સુધીમાં નેટ ડાયરેક્ટ કલેક્શન ૭.૧૯ ટકા વધીને ૨૨.૮ લાખ કરોડ રૃપિયા થયું છે. આ વૃદ્ધિ  રિફંડની ધીમી ગતિ અને કંપની ટેક્સ કલેક્શનમાં વધારાને કારણે થઇ છે.

સરકાર દ્વારા જારી કરવામાં આવલા નેટ ડાયરેક્ટ કલેક્શનમાં ૧૦.૯૧ લાખ કરોડ રૃપિયાનું નેટ કોર્પોરેટ ટેક્સ, રૃ. ૧૧.૩૨ લાખ કરોડ રૃપિયાનું નોન કોર્પોરેટ ટેક્સ અને રૃ. ૫૫,૭૧૭ કરોડ રૃપિયાનું સિક્યુરિટીઝ ટ્રાન્ઝેકશન ટેક્સ (એસટીટી)નો સમાવેશ થાય છે.

આ સમયયગાળા દરમિયાન ટેક્સ રિફંડ જારી કરવામાં છ ટકાનો ઘટાડો જોવા મળ્યો છે અને તે ૪.૩૪ લાખ કરોડ રૃપિયા રહ્યું છે. આવકવેરા વિભાગના જણાવ્યા અનુસાર એડવાન્સ ટેક્સ કલેક્શન ૬.૪ ટકા વધીને ૧૧.૩ લાખ કરોડ રૃપિયા રહ્યું છે.

રિફંડ એડજસ્ટ કર્યા પહેલા ગ્રોસ ડાયરેક્ટ ટેક્સ કલેક્શન ૧૭ માર્ચ સુધીમાં ૨૭.૧૫ લાખ કરોડ રૃપિયા રહ્યું છે. ગત નાણાકીય વર્ષમાં આ રકમ ૨૫.૮૯ લાખ કરોડ રૃપિયા હતી. એટલે કે ચાલુ વર્ષમાં ગયા વર્ષની સરખામણીમાં ૪.૮૬ ટકાની વૃદ્ધિ જોવા મળી છે.

ગ્રોસ કલેક્શનમાં કોર્પોરેટ ટેક્સ ૧૩.૪૭ લાખ કરોડ રૃપિયા રહ્યું છે. જે એક વર્ષ અગાઉ ૧૨.૪૧ લાખ કરોડ રૃપિયા હતું. ગ્રોસ ટેક્સ કલેક્શનમાં નોન કોર્પોરેટ ટેક્સ ૧૩.૧૧ લાખ કરોડ રૃપિયા રહ્યું છે. જે એક વર્ષ અગાઉ ૧૨.૯૨ લાખ કરોડ રૃપિયા રહ્યું હતું.

સિક્યુરિટીઝ ટ્રાન્ઝેકશન ટેક્સ (એસટીટી) ૫૫,૭૧૭ કરોડ રૃપિયા રહ્યું છે. જે એક વર્ષ અગાઉ ૫૩,૦૯૫ કરોડ રૃપિયા હતું. રિફન્ડ ચૂકવ્યા પછી નેટ કોર્પોરેટ ટેક્સ  કલેક્શન ૧૦.૯૨ લાખ કરોડ રૃપિયા રહ્યું છે. જે એક વર્ષ અગાઉ ૯.૬૮ લાખ કરોડ રૃપિયા હતું.