Operation Sindoor: ભારતે ‘ઓપરેશન સિંદૂર’ દરમિયાન ચીન દ્વારા પાકિસ્તાનને ટેકનિકલ મદદ આપવામાં આવી હોવાના અહેવાલો પર પહેલીવાર ખુલીને પ્રતિક્રિયા આપી છે. વિદેશ મંત્રાલયે જણાવ્યું હતું કે આ અહેવાલો અગાઉથી જાણીતા તથ્યોની પુષ્ટિ કરે છે. સાથે જ ભારતે સ્પષ્ટ શબ્દોમાં કહ્યું કે જે દેશો પોતાની જાતને જવાબદાર શક્તિ માને છે, તેમણે વિચારવું જોઈએ કે આતંકવાદી માળખાની રક્ષા કરનારા પ્રયાસોનું સમર્થન તેમની આંતરરાષ્ટ્રીય વિશ્વસનીયતા પર શું અસર પાડે છે.
ભારતીય વિદેશ મંત્રાલયનું નિવેદન
વિદેશ મંત્રાલયના પ્રવક્તા રણધીર જયસ્વાલે પ્રેસ વાર્તામાં જણાવ્યું હતું કે ભારતે ચીની સરકારી મીડિયામાં આવેલા તે સમાચારો જોયા છે, જેમાં દાવો કરવામાં આવ્યો છે કે મે 2025માં ભારત અને પાકિસ્તાન વચ્ચે થયેલા સૈન્ય તણાવ દરમિયાન ચીને પાકિસ્તાનને ટેકનિકલ સહાય આપી હતી. તેમણે કહ્યું, 'ઓપરેશન સિંદૂર એ પહલગામ આતંકી હુમલાના જવાબમાં કરવામાં આવેલી એક સચોટ, લક્ષિત અને સુનિયોજિત કાર્યવાહી હતી. તેનો ઉદ્દેશ્ય પાકિસ્તાનથી સંચાલિત અને તેના સમર્થન વાળા આતંકવાદી માળખાને ખતમ કરવાનો હતો.'
'જવાબદાર દેશોએ વિચારવું જોઈએ'
જયસ્વાલે કહ્યું કે જે દેશો પોતાની જાતને જવાબદાર માને છે, તેમણે એ વિચાર કરવો જોઈએ કે આતંકવાદી માળખાની રક્ષાના પ્રયાસોને સમર્થન આપવાથી તેમની આંતરરાષ્ટ્રીય છબી અને વિશ્વસનીયતા પર અસર પડે છે કે નહીં. ભારતના આ નિવેદનને ચીન માટે એક કડક રાજદ્વારી સંદેશ માનવામાં આવી રહ્યો છે.
ચીનના સરકારી મીડિયામાં દાવો
ચીની સરકારી મીડિયાના રિપોર્ટ મુજબ, ચીને પહેલીવાર સ્વીકાર્યું છે કે તેણે ભારત-પાકિસ્તાન સૈન્ય સંઘર્ષ દરમિયાન પાકિસ્તાનને ટેકનિકલ સહાય પૂરી પાડી હતી. ચીનની સરકારી ચેનલ ચીન સેન્ટ્રલ ટેલિવિઝન (CCTV) એ ચીનના એવિએશન ઇન્ડસ્ટ્રી કોર્પોરેશન (AVIC)ના ચેંગદુ એરક્રાફ્ટ ડિઝાઇન એન્ડ રિસર્ચ ઇન્સ્ટિટ્યૂટના એન્જિનિયર ઝાંગ હેંગનો ઇન્ટરવ્યૂ પ્રસારિત કર્યો હતો.
આ પણ વાંચો: 'હવે હુમલો કર્યો તો પરમાણુ..', ઈરાને પત્તા ખોલ્યા, અમેરિકાને આપી સૌથી મોટી ધમકી
ચીને પાકિસ્તાનને ટેકનિકલ સહાય આપી હતી: AVIC એન્જિનિયર
હોંગકોંગના અખબાર સાઉથ ચાઈના મોર્નિંગ પોસ્ટના રિપોર્ટ મુજબ, ઝાંગ હેંગે જણાવ્યું હતું કે ગયા વર્ષે મે મહિનામાં ચાર દિવસ સુધી ચાલેલા સૈન્ય સંઘર્ષ દરમિયાન પાકિસ્તાનને ટેકનિકલ સહાય આપવામાં આવી હતી. આ સંસ્થા ચીનના આધુનિક ફાઇટર જેટ્સ અને ડ્રોન ટેકનોલોજીના વિકાસમાં મહત્વની ભૂમિકા ભજવે છે.
