મમતા-ઉદ્ધવની ઘટી તાકાત, અલગ બેસશે TMCના બળવાખોર સાંસદો, લોકસભાના ચોમાસુ સત્રમાં દેખાશે નવું સમીકરણ

Lok Sabha Seating Arrangement 2026 : 20 જુલાઈથી શરૂ થઈ રહેલા સંસદના ચોમાસુ સત્ર (Monsoon Session)નું ચિત્ર એકદમ અલગ હશે. આ સત્રમાં સયાની ઘોષ અને યુસુફ પઠાણ જેવા સાંસદો અભિષેક બેનર્જીની સાથે નહીં દેખાય, આ સાથે જ શિવસેના (UBT)ના 6 સાંસદો પણ હવે શિંદે સેનાની સાથે બેઠેલા જોવા મળશે. આ સત્રમાં સંસદની અંદર માત્ર સીટિંગ અરેન્જમેન્ટ (Sitting Arrangement) જ નથી બદલાઈ રહ્યું, પરંતુ સત્તા પક્ષ અને વિપક્ષ વચ્ચે રાજકીય સંતુલનનો એક નવો અધ્યાય પણ શરૂ થતો દેખાઈ રહ્યો છે. સોમવારથી શરૂ થઈ રહેલા સંસદના ચોમાસુ સત્રમાં શક્તિ અને સત્તાના નવા સમીકરણો જોવા મળશે. આ સત્રમાં મમતા બેનર્જીની TMC અને ઉદ્ધવ ઠાકરેની શિવસેના (UBT)નું સંખ્યાબળ લોકસભામાં ઓછું થઈ જશે, જ્યારે સંસદમાં એકનાથ શિંદેની શિવસેનાની તાકાતમાં વધારો થશે.

ચોમાસુ સત્ર પહેલા લોકસભા સ્પીકર ઓમ બિરલાએ શનિવારના રોજ શિવસેના (UBT)ના 6 સાંસદોના મહારાષ્ટ્રના ડેપ્યૂટી સીએમ એકનાથ શિંદેની આગેવાની હેઠળની શિવસેનામાં વિલયને મંજૂરી આપી દીધી છે. આ સાથે જ તેમણે NCPI નામની પાર્ટીમાં સામેલ થયેલા 20 બળવાખોર TMC સાંસદો માટે લોકસભામાં અલગ બેસવાની વ્યવસ્થાને પણ લીલી ઝંડી આપી દીધી છે. સરકારી સૂત્રોના જણાવ્યા અનુસાર, આ 6 સાંસદોના વિલય બાદ શિવસેના (શિંદે જૂથ)ના સાંસદોની સંખ્યા વધીને 13 થઈ ગઈ છે, જે પહેલા લોકસભામાં 7 હતી.

બળવાખોર TMC સાંસદોના વિલય પર અંતિમ નિર્ણય બાકી

સોમવારથી લોકસભાનું સીટિંગ અરેન્જમેન્ટ સંપૂર્ણપણે બદલાઈ જશે. TMCના 20 બળવાખોર સાંસદો પોતાની મૂળ પાર્ટીથી અલગ બેસશે. જો કે, બળવાખોર TMC સાંસદોની 'નેશનલિસ્ટ સિટિઝન્સ પાર્ટી ઓફ ઇન્ડિયા' (NCPI)નો હિસ્સો બનવાની માંગ પર હજુ સુધી કોઈ અંતિમ નિર્ણય લેવાયો નથી, અને આ મામલો હાલ વિચારાધીન છે. બીજી તરફ, TMC અને શિવસેના (UBT)એ આ બળવાખોર સાંસદોનું સભ્યપદ રદ કરવાની માંગ કરી છે. મમતા બેનર્જી સામે બળવો કરીને અલગ જૂથ બનેલી NCPI માટે વધુ એક સારા સમાચાર એ છે કે, સંસદીય બાબતોના મંત્રી કિરેન રિજિજુએ રવિવારના રોજ સવારે 11 વાગ્યે યોજાનારી સર્વદળીય બેઠકમાં સામેલ થવા માટે આ જૂથને અલગથી આમંત્રણ આપ્યું છે. લોકસભા સ્પીકરે આ નિર્ણય લેતા પહેલા કાનૂની અને બંધારણીય નિષ્ણાતો સાથે વિસ્તૃત ચર્ચા-વિચારણા કરી હતી.

DMK પણ કોંગ્રેસથી અલગ બેસવા માંગે છે

TMC અને શિવસેના (UBT)ના બળવાખોર જૂથો સિવાય, DMK એ પણ કોંગ્રેસથી અલગ બેસવાની વ્યવસ્થા કરવાની માંગ કરી છે. આ માંગ ત્યારે કરવામાં આવી, જ્યારે મુખ્ય વિપક્ષી પાર્ટી કોંગ્રેસે તમિલનાડુની આ પાર્ટી સાથે પોતાનું દાયકાઓ જૂનું ગઠબંધન તોડી નાખ્યું, અને તમિલનાડુના મુખ્યમંત્રી સી. જોસેફ વિજયની પાર્ટી TVK સાથે હાથ મિલાવી લીધા. સ્પીકર દ્વારા આ માંગને પણ મંજૂરી મળવાની પૂરેપૂરી સંભાવના છે.

TMC અને ઉદ્ધવ ઠાકરેનું ગણિત સમજો

2024ની સામાન્ય ચૂંટણીમાં TMCની ટિકિટ પર કુલ 29 સાંસદો લોકસભા માટે ચૂંટાયા હતા. તેમાંથી 20 સાંસદો પાર્ટીથી અલગ થઈ ગયા, અને પશ્ચિમ બંગાળના હાવડા સ્થિત એક રજિસ્ટર્ડ પરંતુ બિન-માન્યતા પ્રાપ્ત રાજકીય પક્ષ NCPIમાં સામેલ થઈ ગયા. આ બળવાખોર જૂથે નરેન્દ્ર મોદી સરકારને પોતાનું સમર્થન જાહેર કર્યું છે. સુદીપ બંદોપાધ્યાય, કાકોલી ઘોષ, સયાની ઘોષ, યુસુફ પઠાણ, શતાબ્દી રોય અને માલા રોય જેવા દિગ્ગજો આ જૂથમાં સામેલ છે.

બીજી તરફ, ઉદ્ધવ ઠાકરેની પાર્ટી શિવસેના (UBT)ની ટિકિટ પર કુલ 9 સાંસદો ચૂંટાયા હતા, જેમાંથી 6 સાંસદો એકનાથ શિંદેની શિવસેનામાં સામેલ થઈ ગયા છે. આ સાંસદોમાં સંજય દીના પાટીલ, સંજય જાધવ, સંજય દેશમુખ, ભાઉસાહેબ વાકચૌરે, નાગેશ પાટીલ અષ્ટીકર અને ઓમપ્રકાશ રાજે નિમ્બાલકરનો સમાવેશ થાય છે. હવે ઉદ્ધવ જૂથમાં માત્ર 3 સાંસદો (અરવિંદ સાવંત, અનિલ દેસાઈ, રાજાભાઉ) જ બચ્યા છે.

TMC અને શિવસેના (UBT) બંનેએ સ્પીકર સમક્ષ દલીલ કરી છે કે, પક્ષપલટા વિરોધી કાયદા (Anti-Defection Law) હેઠળ આ સાંસદોને અયોગ્ય જાહેર કરવા જોઈએ, કારણ કે આ કાયદો ત્યારે જ લાગુ નથી થતો, જ્યારે આખી પાર્ટીના બે-તૃતીયાંશ (2/3) સભ્યો એકસાથે પક્ષ છોડે.