મહારાષ્ટ્રમાં ગમખ્વાર અકસ્માત, કાર બગડી તો હાઈવે પર ઉતરતાં જ અજાણ્યા વાહને 3ને કચડ્યાં

Accident News: મહારાષ્ટ્રના અકોલામાં હાઈવે પર એક દર્દનાક અકસ્માત થયો સર્જાયો છે. જેમાં 3 લોકોએ જીવ ગુમાવ્યો છે. કેબ ખરાબ થયા બાદ બીજી ગાડીની રાહ જોઈ રહેલા ત્રણ લોકોને એક અજાણ્યા વાહને કચડી નાખ્યા હતા. 

આ ઘટના ગઈકાલે રાત્રે (મંગળવારે) અકોલામાં નેશનલ હાઈવે 53 પર બની હતી. એક દંપતી બોરગાંવના મંજૂ ટાઉનથી ઘર તરફ જઈ રહ્યા હતા. કારમાં દંપતી ઉપરાંત ડ્રાઇવર અને તેનો એક સાથી પણ સવાર હતો.

કેવી રીતે સર્જાયો અકસ્માત? 

પોલીસના જણાવ્યા અનુસાર કુરંદખેડ ગામ પાસે હાઈવેની વચ્ચે કેબ અચાનક ખરાબ થઈ ગઈ હતી. જેથી બધા લોકો કારમાંથી બહાર ઉતર્યા અને કેબને ટોઇંગ કરવા માટે અન્ય વાહનની રાહ જોઇ રહ્યા હતા. આ દરમિયાન પૂરપાટ ઝડપે આવતી એક ગાડીએ તમામને કચડી નાખ્યા હતા. 

3ના મોત અને 1ની હાલત ગંભીર 

બોરગાંવ મંજૂ પોલીસ સ્ટેશનના ઈન્ચાર્જ અનિલ ગોપાલે જણાવ્યું કે ચારેય કેબને કાર્ગોની મદદથી ખેંચીને લઈ જઈ રહ્યા હતા, ત્યારે આ અકસ્માત સર્જાયો હતો. મૃતકોની ઓળખ 35 વર્ષીય ધીરજ સરસથ, 30 વર્ષીય અશ્વિની સરસથ અને 28 વર્ષીય કેબ ડ્રાઇવર આરિફ ખાન તરીકે થઈ છે. જ્યારે, ડ્રાઇવરની સાથે રહેલો વ્યક્તિ ગંભીર રીતે ઘાયલ છે. તેને અકોલાની જિલ્લા હોસ્પિટલમાં દાખલ કરવામાં આવ્યો છે. અકસ્માત સર્જીને આરોપી ઘટનાસ્થળેથી ફરાર થઈ ગયો હતો. પોલીસ ટક્કર મારનાર વાહનની શોધ કરી રહી છે, પરંતુ હજી સુધી ગાડી કે ડ્રાઇવરનો કોઈ પત્તો લાગ્યો નથી.