ISRO નહીં વેચાય! ખાનગીકરણની અફવા પર જડબાતોડ જવાબ, 2035-2040નો મહાપ્લાન જાહેર કર્યો
Summarized by AI; it may make mistakes. Check important info
Summarized by AI; it may make mistakes. Check important info
ISRO Privatization News Fact Check: ઈન્ટરનેટ પર અચાનક એવી અફવાઓ ફેલાઈ ગઈ કે ISRO બંધ થવા જઈ રહ્યું છે અથવા ખાનગી કંપનીને વેચાય રહ્યું છે. ISROનું ખાનગીકરણ થઈ રહ્યું છે અને તેની ભૂમિકા સમાપ્ત થઈ રહી છે તેવા દાવાઓએ સોશિયલ મીડિયા પર ભયંકર પેનિક ફેલાવ્યો છે. પરંતુ ISROએ પોતે જ આ અફવાઓ પર જડબાતોડ અને સ્પષ્ટપણે કહ્યું છે કે, આવી બધી વાતો સંપૂર્ણપણે બકવાસ અને પાયાવિહોણી છે. ભારતની અગ્રણી અવકાશ એજન્સી ન તો વેચાય રહી છે અને ન તો તેનો પ્રભાવ ઓછો થવાનો છે. હકીકતમાં ISRO એક ગેમ-ચેન્જિંગ યોજના બનાવી રહ્યું છે જે ભારતને અવકાશના ક્ષેત્રમાં અંતિમ મહાસત્તા તરીકે સ્થાપિત કરશે.
તો વાસ્તવિક પરિસ્થિતિ શું છે?
ISROએ X પર આ બધી અફવાઓને ખોટી ઠેરવી છે અને સ્પષ્ટ કર્યું છે કે, તેનું ખાનગીકરણ નથી થઈ રહ્યું અને ન તો તેનું વર્ચસ્વ ઓછું થશે. ISRO ભારતના અવકાશ મિશનમાં અગ્રણી હતું, છે અને હંમેશા રહેશે. હકીકતમાં ભારત સરકાર ISRO-આગેવાની હેઠળની રાષ્ટ્રીય અવકાશ ઇકોસિસ્ટમ વિકસાવી રહી છે. આનો અર્થ એ છે કે ખાનગી કંપનીઓ, સ્ટાર્ટ-અપ્સ અને PSUs હવે ISRO દ્વારા પહેલાથી જ નિપુણ બનેલી ટેકનોલોજીના મોટા પાયે ઉત્પાદનનું સંચાલન કરશે, જેમ કે નિયમિત ઉપગ્રહો અને લેગસી લોન્ચ વાહનો વગેરે.
કઈ બાબત પર હવે ISROનું ફોકસ?
એકવાર ખાનગી ઉદ્યોગ નિયમિત કામગીરી સંભાળી લેશે, પછી ISROના વૈજ્ઞાનિકો તેમના પ્રયત્નોને આગામી સ્તરના પ્રયાસો માટે સમર્પિત કરશે. આમાં વર્ષ 2035 સુધીમાં ભારતનું પોતાનું અવકાશ મથક સ્થાપિત કરવું, વર્ષ 2040 સુધીમાં ચંદ્ર પર ભારતીય અવકાશયાત્રીને ઉતારવું, મંગળ અને શુક્ર જેવા સ્થળોએ ઊંડા અવકાશ મિશન હાથ ધરવા અને ફરીથી વાપરી શકાય તેવા પ્રક્ષેપણ વાહનો વિકસાવવાનો સમાવેશ થાય છે.
44 અબજ ડોલરના સ્પેસ ઈકોનોમી પર નજર
ભારતનું સ્પેસ ઈકોનોમી હાલમાં 8.4 અબજ ડોલરની છે, જે 2033 સુધીમાં 44 અબજ ડોલર સુધી પહોંચવાનો ટાર્ગેટ છે. આટલું મોટું બજાર ફક્ત ISROના સંસાધનો પર આધાર રાખીને મેળવી શકાય નહીં. 2020માં જ્યારે ફક્ત થોડા જ સ્ટાર્ટ-અપ્સ હતા, ત્યારે આજે ભારતમાં 450 થી વધુ સ્પેસ સ્ટાર્ટ-અપ્સ કાર્યરત છે. ખાનગી ક્ષેત્ર ISROનું સ્થાન લઈ રહ્યું નથી પરંતુ ભારતને સ્પેસ સુપરપાવરમાં પરિવર્તિત કરવા માટે તેની સાથે સહયોગ કરી રહ્યું છે. જેમાં મહત્ત્વપૂર્ણ માળખાગત સુવિધાઓ અને રાષ્ટ્રીય સુરક્ષા સંબંધિત તમામ પ્રોજેક્ટ્સ પર નિયંત્રણ સંપૂર્ણપણે સરકાર અને ISROના હાથમાં રહેશે.
