ઈરાનનું ખતરનાક એલાન: અમેરિકી સૈનિકને મારવા કે પકડવા પર મળશે 30,000 ડોલરનું ઈનામ

US-Iran Tension : મધ્ય પૂર્વમાં ચાલી રહેલા ભારે તણાવ વચ્ચે ઈરાન તરફથી અત્યંત ઉશ્કેરણીજનક નિવેદન સામે આવ્યું છે. ઈરાની સેનાના એક ટોચના કમાન્ડરે જાહેરાત કરી છે કે અમેરિકી સૈનિકોને પકડનાર અથવા ઠાર કરનાર ઈરાની લડવૈયાઓને 30,000 ડૉલર (અંદાજે 28 લાખ રૂપિયા)નું મોટું ઈનામ આપવામાં આવશે. આ જાહેરાત બાદ અમેરિકા અને ઈરાન વચ્ચેના સંબંધોમાં વધુ ગંભીર તણાવ સર્જાય તેવી શક્યતાઓ ઊભી થઈ છે.

તેહરાનમાં આપેલા ભાષણ દરમિયાન મોટી જાહેરાત

તસ્નીમ સમાચાર એજન્સીના અહેવાલ મુજબ, ઈરાની સેનાના કમાન્ડર-ઇન-ચીફ અમીર હાતમીએ રવિવાર, 16 ઓગસ્ટના રોજ રાજધાની તેહરાનમાં એક જાહેર કાર્યક્રમમાં સંબોધન કરતી વખતે આ સનસનાટીપૂર્ણ જાહેરાત કરી હતી. તેમણે પોતાના ભાષણમાં સ્પષ્ટ શબ્દોમાં જણાવ્યું હતું કે જે કોઈ પણ ઈરાની નાગરિક કે લડવૈયો અમેરિકી સૈન્યના જવાનને જીવતો પકડશે અથવા તેને મારી નાખશે, તેને સમગ્ર ઈરાની જનતા તરફથી રોકડ ઈનામ આપીને સન્માનિત કરવામાં આવશે.

ઈરાની ચલણમાં 5 અબજ તોમાનની બરાબર રકમ

રોઇટર્સના અહેવાલ અનુસાર, કમાન્ડર અમીર હાતમીએ પોતાના સંબોધનમાં આગળ જણાવ્યું હતું કે, આ કામગીરી કરનાર વ્યક્તિને યોગ્ય અને મોટી ભેટ આપવામાં આવશે. તેમણે વિગત આપતાં ઉમેર્યું હતું કે, આ ઈનામની રકમ ઈરાનના સ્થાનિક ચલણમાં અંદાજે 5 અબજ તોમાન જેટલી થાય છે. આ જાહેરાત પાછળનો મુખ્ય ઉદ્દેશ્ય ઈરાની લડવૈયાઓ અને સમર્થકોને અમેરિકી સૈન્ય સામે આક્રમક રીતે પ્રતિકાર કરવા પ્રોત્સાહિત કરવાનો હોવાનું માનવામાં આવે છે.

હોર્મુઝ સંકટ અને શાંતિ વાટાઘાટો ઠપ થતાં સ્થિતિ વણસી

ઈરાની કમાન્ડરનું આ આક્રમક નિવેદન એવા સમયે આવ્યું છે, જ્યારે બંને પક્ષો વચ્ચે શાંતિ સ્થાપવા માટે ચાલી રહેલી વાટાઘાટોમાં કોઈ નોંધપાત્ર પ્રગતિ થઈ નથી. આ ઉપરાંત, વૈશ્વિક ઊર્જા સપ્લાય માટે વ્યૂહાત્મક રીતે અત્યંત મહત્ત્વપૂર્ણ ગણાતા હોર્મુઝ જળમાર્ગમાંથી તેલ ટેન્કરોની અવરજવર પણ હાલ અટકી ગઈ છે. સંઘર્ષમાં સામેલ કોઈપણ પક્ષ તરફથી યુદ્ધવિરામ કે તણાવ ઘટાડવાના કોઈ સકારાત્મક સંકેતો દેખાઈ રહ્યા નથી, જેને કારણે સમગ્ર ખાડી વિસ્તારમાં યુદ્ધના વાદળો વધુ ઘેરા બન્યા છે.