યુદ્ધની અનિશ્ચિતતાઓ વચ્ચે ભારતનો GDP ગ્રોથ 7 ટકા રહેવાનો અંદાજ, વિશ્વનો સરેરાશ વિકાસદર 3.1 ટકા: IMF
Summarized by AI; it may make mistakes. Check important info
Summarized by AI; it may make mistakes. Check important info
IMF India GDP Growth Forecast 2026 2027 : ભારતીય અર્થતંત્ર માટે સારા સમાચાર સામે આવ્યા છે. ઇન્ટરનેશનલ મોનેટરી ફંડ (IMF)એ ભારતના આર્થિક વિકાસના અંદાજમાં વધારો કરીને 2026 માટે 7% કર્યો છે. અગાઉ જુલાઈમાં IMFએ ભારતનો GDP વૃદ્ધિદર 6.4% રહેવાનો અંદાજ આપ્યો હતો. આ સાથે 2027 માટે પણ ભારતનો વૃદ્ધિદર 7% રહેવાનો અંદાજ આપવામાં આવ્યો છે. આ અંદાજ અગાઉના 6.7% કરતાં વધારે છે. IMFના નવા અંદાજ પ્રમાણે ભારત આગામી બે વર્ષ સુધી વિશ્વની સૌથી ઝડપથી વિકસતી મોટી અર્થવ્યવસ્થા તરીકેનું સ્થાન જાળવી રાખશે.
IMFએ પોતાના અહેવાલમાં જણાવ્યું છે કે ભારતના આર્થિક વિકાસને મજબૂત સ્થાનિક માંગ અને સર્વિસ સેક્ટરની સારી કામગીરીનો ટેકો મળી રહ્યો છે. અનુકૂળ વસ્તી વિષયક પરિબળો, વિસ્તરતું સ્થાનિક બજાર અને સતત થઈ રહેલા માળખાકીય સુધારા પણ ભારતની વિકાસક્ષમતાને મજબૂત બનાવી રહ્યા છે.
RBIના અંદાજ કરતાં IMFનો આંકડો ઓછો
IMFનો આ નવો અંદાજ ભારતીય રિઝર્વ બેંક (RBI) દ્વારા જાહેર કરાયેલા અંદાજના એક અઠવાડિયા બાદ આવ્યો છે. RBIએ ચાલુ વર્ષ માટે ભારતનો GDP વૃદ્ધિદર 7.1% રહેવાનો અંદાજ આપ્યો હતો. બીજી તરફ, IMFએ વૈશ્વિક સ્તરે ઊભી થયેલી ભૌગોલિક રાજકીય અનિશ્ચિતતાઓ છતાં ભારતના વિકાસ અંગે આશાવાદ વ્યક્ત કર્યો છે. અમેરિકા-ઈરાન સંઘર્ષ અને રશિયા-યુક્રેન યુદ્ધ જેવી પરિસ્થિતિઓ ઊર્જાની આયાત પર નિર્ભર ભારત માટે પડકારરૂપ બની શકે છે. આ ઉપરાંત, ક્રૂડ ઓઇલના ઊંચા ભાવની અસર પણ અર્થતંત્ર પર પડી શકે છે. તેમ છતાં, સ્થાનિક માંગ અને સર્વિસ સેક્ટરની મજબૂત કામગીરી ભારતના વિકાસને ટેકો આપી રહી છે.
ક્રૂડ ઓઇલના ભાવમાં વધારાની આગાહી
IMFના અંદાજ મુજબ, 2026માં બ્રેન્ટ, દુબઈ ફતેહ અને વેસ્ટ ટેક્સાસ ઇન્ટરમીડિયેટ જેવા ક્રૂડ ઓઇલના સરેરાશ ભાવ પ્રતિ બેરલ 95.74 ડોલર રહી શકે છે. આ 2025ની સરખામણીમાં 41%નો વધારો દર્શાવે છે. 2027માં ક્રૂડ ઓઇલના ભાવ ઘટીને પ્રતિ બેરલ 87.39 ડોલર રહેવાનો અંદાજ છે, જે 2026ની સરખામણીમાં લગભગ 9% ઓછો છે. ક્રૂડ ઓઇલના ઊંચા ભાવ ભારત માટે પડકાર બની શકે છે, કારણ કે તેની અસર આયાત ખર્ચ, મોંઘવારી અને દેશની આર્થિક પ્રવૃત્તિઓ પર પડી શકે છે.
વિશ્વના વિકાસમાં ભારતની ભૂમિકા મહત્ત્વની
IMFએ 2026 માટે વિશ્વનો આર્થિક વિકાસદર 3.1% રહેવાનો અંદાજ આપ્યો છે, જે જુલાઈના 3%ના અંદાજ કરતાં થોડો વધારે છે. 2027માં વૈશ્વિક વિકાસદર 3.4% રહેવાની આગાહી યથાવત્ રાખવામાં આવી છે. બીજી તરફ, વિકસિત અર્થતંત્રોના વિકાસના અંદાજમાં પણ સુધારો થયો છે. જર્મનીનો વૃદ્ધિદર 2026માં 1.3% રહેવાનો અંદાજ છે, જે અગાઉ 0.7% હતો. બ્રિટન માટેનો અંદાજ પણ 1%થી વધારીને 1.3% કરવામાં આવ્યો છે. વિકસિત અર્થતંત્રોનો સંયુક્ત વૃદ્ધિદર 2026માં 2.1% રહેવાની આગાહી છે, જે અગાઉ 1.7% હતો.
ચીન અને રશિયાના વિકાસમાં ધીમી ગતિ
IMFએ ઊભરતાં બજારો અને વિકાસશીલ અર્થતંત્રો માટે 2026નો વૃદ્ધિદર 3.7% રહેવાનો અંદાજ આપ્યો છે. જુલાઈમાં આ અંદાજ 3.8% હતો. ચીન, રશિયા અને બ્રાઝિલ સહિતનાં કેટલાંક મોટાં અર્થતંત્રો તેમજ મધ્ય પૂર્વના કેટલાક દેશોમાં વિકાસ ધીમો પડવાની અથવા આર્થિક સંકોચન થવાની શક્યતાને કારણે આ ઘટાડો કરવામાં આવ્યો છે. આમ, વૈશ્વિક અર્થતંત્ર સામે પડકારો હોવા છતાં ભારતનો વિકાસદર મજબૂત રહેવાની આગાહી કરવામાં આવી છે. સ્થાનિક માંગ, સર્વિસ સેક્ટરની કામગીરી અને માળખાકીય સુધારા ભારતના આર્થિક વિકાસના મુખ્ય આધાર બની રહ્યા છે.
