US ચૂંટણી, હોર્મુઝ અને ચીની વ્લોગર્સના વિવાદ સહિત 7 મુદ્દે વિદેશ મંત્રાલયનું મહત્ત્વનું નિવેદન, જાણો શું કહ્યું

MEA Press Conference : વિદેશ મંત્રાલય (MEA) ના પ્રવક્તા રણધીર જાયસવાલે સાપ્તાહિક પ્રેસ કોન્ફરન્સ દરમિયાન અમેરિકાની મિડ-ટર્મ ચૂંટણી, બાંગ્લાદેશનાં પૂર્વ વડાપ્રધાન શેખ હસીનાનો પાસપોર્ટ વિવાદ, રશિયા-યુક્રેન યુદ્ધ, સ્ટ્રેટ ઓફ હોર્મુઝની સુરક્ષા સહિતના વૈશ્વિક મુદ્દાઓ પર ભારતનું સત્તાવાર વલણ સ્પષ્ટ કર્યું છે.

1… અમેરિકાની મિડ-ટર્મ ચૂંટણી અને ભારત-અમેરિકા સંબંધો

અમેરિકામાં યોજાયેલી ચૂંટણી અંગે સ્પષ્ટતા કરતાં વિદેશ મંત્રાલયના પ્રવક્તા રણધીર જાયસવાલે કહ્યું કે, 'અમેરિકામાં યોજાયેલી મિડ-ટર્મ ચૂંટણી ત્યાંની આંતરિક બાબત છે અને તેનાથી નવી દિલ્હી તથા વોશિંગ્ટનના સંબંધો પર કોઈ અસર પડવાની શક્યતા નથી.' તેમણે વધુમાં ભાર મૂક્યો હતો કે ભારત-અમેરિકા ભાગીદારીને વોશિંગ્ટનમાં મજબૂત દ્વિપક્ષીય સમર્થન પ્રાપ્ત છે અને બંને દેશો આ સંબંધોને વધુ મજબૂત કરવા પ્રતિબદ્ધ છે.

2… શેખ હસીનાના પાસપોર્ટની અરજીનો મુદ્દો

બાંગ્લાદેશનાં પૂર્વ વડાપ્રધાન શેખ હસીનાના પાસપોર્ટ અરજી સંદર્ભે પૂછાયેલા પ્રશ્ન અંગે રણધીર જાયસવાલે સ્પષ્ટ કર્યું કે, 'આ સવાલ બાંગ્લાદેશ હાઈ કમિશનને પૂછવો વધુ યોગ્ય રહેશે, કારણ કે તેઓ આ અંગે વધુ સચોટ માહિતી આપી શકશે.'

3… રશિયા-યુક્રેન સંઘર્ષ અને વડાપ્રધાન મોદીની પહેલ

રશિયા-યુક્રેન યુદ્ધ પર વાતચીત અને રાજદ્વારી સંબંધોને જ એકમાત્ર ઉકેલ ગણાવતા રણધીર જાયસવાલે કહ્યું કે, 'તમે જાણો છો કે ગઈકાલે PM મોદીએ યુક્રેનના રાષ્ટ્રપ્રમુખ સાથે વાતચીત કરી હતી. બંને નેતાઓએ પોતાના દ્રષ્ટિકોણ, માનવીય સંકટ અને આ સંઘર્ષનો અંત લાવવાના વિચારો પર ચર્ચા કરી. વડાપ્રધાને ભારપૂર્વક જણાવ્યું કે ભારત આ સંઘર્ષનો અંત લાવવામાં મદદ કરવા માટે તૈયાર છે.' તેમણે ઉમેર્યું કે ભારત બંને દેશો સાથે સતત સંપર્કમાં છે.

4… સ્ટ્રેટ ઓફ હોર્મુઝમાં સુરક્ષિત અવરજવરની માગ

હોર્મુઝ જળડમરૂમધ્ય (સ્ટ્રેટ ઓફ હોર્મુઝ) માં જહાજોની સલામતી અંગે રણધીર જાયસવાલે કહ્યું કે, 'અમે સ્ટ્રેટ ઓફ હોર્મુઝમાં સુરક્ષિત, મુક્ત અને કોઈપણ અડચણ વિનાની અવરજવરની માગ સતત કરતા આવ્યા છીએ. અમે તમામ સંબંધિત પક્ષોના સંપર્કમાં છીએ જેથી સામાન્ય નાગરિક જહાજો અને નાવિકો પર હુમલા ન થાય. જેમાં ભારતીય ધ્વજ ધરાવતા જહાજો અને ભારતીય નાવિકો પણ સામેલ છે.'

5… નેપાળના વડાપ્રધાનની ભારત મુલાકાત

નેપાળના વડાપ્રધાનના પ્રવાસ સંદર્ભે વિદેશ મંત્રાલયના પ્રવક્તા રણધીર જાયસવાલે માહિતી આપતાં જણાવ્યું કે, 'ભારતે નેપાળના PM ને ભારત મુલાકાતનું આમંત્રણ મોકલ્યું છે. યાત્રાની તારીખો અંગે હાલ વાતચીત ચાલી રહી છે અને તારીખો નક્કી થતાં જ તેની સત્તાવાર માહિતી આપવામાં આવશે. બંને દેશો વચ્ચે મજબૂત અને વ્યાપક સંબંધો છે, જેથી પરસ્પર હિતના અનેક મહત્વપૂર્ણ મુદ્દાઓ પર ચર્ચા થશે.'

6… ઢાકાની ઝૂંપડપટ્ટીના વાયરલ વિડીયો અને ચીની વ્લોગર્સ

ઢાકાની ઝૂંપડપટ્ટીને દિલ્હી તરીકે દર્શાવતા ચીની વ્લોગર્સના લાઈવસ્ટ્રીમિંગ અંગે રણધીર જાયસવાલે કહ્યું કે, 'અમે આ સંદર્ભે મીડિયા અહેવાલો જોયા છે. કોઈ દેશની ખોટી છબી રજૂ કરવાના આવા પ્રયાસો દુર્ભાગ્યપૂર્ણ છે. જ્યાં સુધી ઢાકાને દિલ્હી તરીકે દર્શાવવા માટે બહારના લોકોને નાણાં આપીને ઉપયોગ કરવાની વાત છે, તો આવા ખોટા નેરેટિવ ફેલાવવાથી ફક્ત એ લોકોની વિશ્વસનીયતા ઘટે છે જે આવું કરી રહ્યા છે અને જે લોકો આની પાછળ છે. હું સંબંધિત અધિકારીઓને વિનંતી કરીશ કે તેઓ આવા લોકો સામે કાર્યવાહી કરે.'

7… ક્વાડ સમિટ અને ઉચ્ચ-સ્તરીય બેઠકો

ક્વાડ સંબંધિત પ્રશ્ન પર રણધીર જાયસવાલે નિવેદન આપતાં કહ્યું કે, 'તાજેતરમાં તમે જોયું હશે કે ક્વાડ સમિટ અંતર્ગત ઘણી ઉચ્ચ-સ્તરીય બેઠકો યોજાઈ છે. એટલાન્ટામાં G20 બેઠક દરમિયાન વિદેશ મંત્રીઓની પણ એક બેઠક મળી હતી. અમે તમને ક્વાડની અન્ય ઉચ્ચ-સ્તરીય બેઠકો, જેમાં સમિટ સ્તરની બેઠકો પણ સામેલ છે, તે અંગે માહિતી આપતા રહીશું.'