17 રાજ્યો માટે IMDનું 48 કલાકનું એલર્ટ, અનેક વિસ્તારોમાં ભારે વરસાદ અને તોફાની પવનની આગાહી

IMD Rain Alert : ચક્રવાત 'અર્ણબ'ની સંભાવનાઓ વચ્ચે હવામાન વિભાગે દેશના 17 રાજ્યોમાં 25 સપ્ટેમ્બરે ભારે વરસાદ અને આંધીની ગંભીર ચેતવણી જારી કરી છે. બંગાળની ખાડીમાં સર્જાયેલા ડીપ ડિપ્રેશનના કારણે દરિયાકાંઠાના અને પૂર્વીય રાજ્યોમાં 85 કિલોમીટર પ્રતિ કલાકની ઝડપે તોફાની પવન ફૂંકાઈ શકે છે. હવામાન વિભાગે ખેડૂતો અને માછીમારોને ખાસ સાવચેતી રાખવાની સલાહ આપી છે.

ઓડિશા, આંધ્રપ્રદેશ અને પશ્ચિમ બંગાળ પર વાવાઝોડાનું જોખમ

પશ્ચિમ-મધ્ય અને તેને અડીને આવેલી ઉત્તર-પશ્ચિમ બંગાળની ખાડી પર બનેલા ડીપ ડિપ્રેશનના કારણે પૂર્વીય રાજ્યોમાં ભારે વરસાદ અને આંધીની શક્યતા છે. વિશાખાપટ્ટનમ અને ગોપાલપુર વચ્ચે, કલિંગપટ્ટનમ નજીકથી આ સિસ્ટમ ઉત્તર આંધ્રપ્રદેશ અને દક્ષિણ ઓડિશાના દરિયાકાંઠે પસાર થઈ શકે છે. તેના કારણે ઓડિશા, પશ્ચિમ બંગાળ અને આંધ્રપ્રદેશમાં ભારે નુકસાનની આશંકા વ્યક્ત કરવામાં આવી છે. લોકોને સલામત સ્થળોએ રહેવા અને જરૂરી સાવચેતી રાખવાની સલાહ આપવામાં આવી છે. પહાડી વિસ્તારોમાં ભૂસ્ખલનની ચેતવણી પણ આપવામાં આવી છે.

17 રાજ્યોમાં ભારે વરસાદ અને આંધીનું એલર્ટ

હવામાન વિભાગના અનુમાન મુજબ ઉત્તર પ્રદેશ, બિહાર, દિલ્હી, રાજસ્થાન, હરિયાણા, ઉત્તરાખંડ, પંજાબ, હિમાચલ પ્રદેશ, જમ્મુ-કાશ્મીર, ઓડિશા, આંધ્રપ્રદેશ, તેલંગાણા, પશ્ચિમ બંગાળ, ઝારખંડ, છત્તીસગઢ અને મધ્યપ્રદેશ સહિતના રાજ્યોમાં ભારે વરસાદ અને આંધીની ચેતવણી જારી કરવામાં આવી છે.

દિલ્હીમાં હળવાથી મધ્યમ વરસાદની આગાહી

દિલ્હીમાં 25 સપ્ટેમ્બરે મધ્યમ વરસાદ પડી શકે છે. આ દરમિયાન 20 થી 30 કિલોમીટર પ્રતિ કલાકની ઝડપે પવન ફૂંકાવાની શક્યતા છે. મહત્તમ તાપમાન 33 ડિગ્રી અને લઘુત્તમ તાપમાન 23 ડિગ્રી સેલ્સિયસ રહેવાની આગાહી છે.

ઉત્તર પ્રદેશના 30થી વધુ જિલ્લાઓમાં એલર્ટ

લખનઉ, કાનપુર, વારાણસી, ગોરખપુર, મેરઠ, ગાઝિયાબાદ, અયોધ્યા, મથુરા, આગ્રા અને ઝાંસી સહિતના વિસ્તારોમાં 45 થી 50 કિલોમીટર પ્રતિ કલાકની ઝડપે પવન સાથે ભારે વરસાદ પડી શકે છે. લખનઉમાં મહત્તમ તાપમાન 23 ડિગ્રી અને લઘુત્તમ તાપમાન 22 ડિગ્રી સેલ્સિયસ રહેવાની શક્યતા છે.

બિહારમાં વરસાદ અને વાવાઝોડાની ચેતવણી

પટના, ગયા, રોહતાસ, ભાગલપુર, દરભંગા અને પૂર્ણિયા સહિતના વિસ્તારોમાં 40 થી 50 કિલોમીટર પ્રતિ કલાકની ઝડપે પવન અને વીજળીના કડાકા સાથે વરસાદની શક્યતા છે. પટનામાં મહત્તમ તાપમાન 26 ડિગ્રી અને લઘુત્તમ તાપમાન 24 ડિગ્રી સેલ્સિયસ રહી શકે છે.

રાજસ્થાનમાં વરસાદી માહોલ

જયપુર, ઉદયપુર, કોટા, સવાઈ માધોપુર, જેસલમેર, બાડમેર અને અલવર સહિતના જિલ્લાઓમાં મધ્યમથી ભારે વરસાદની આગાહી છે. 50 કિલોમીટર પ્રતિ કલાકની ઝડપે પવન ફૂંકાઈ શકે છે. જયપુરમાં મહત્તમ તાપમાન 33 ડિગ્રી અને લઘુત્તમ 22 ડિગ્રી સેલ્સિયસ રહેવાની શક્યતા છે.

મધ્યપ્રદેશમાં ભારે વરસાદ અને આંધી

ભોપાલ, ઈન્દોર, રતલામ, હોશંગાબાદ અને ખંડવા સહિતના વિસ્તારોમાં 55 થી 60 કિલોમીટર પ્રતિ કલાકની ઝડપે પવન સાથે ભારે વરસાદની ચેતવણી આપવામાં આવી છે. ભોપાલમાં મહત્તમ તાપમાન 28 ડિગ્રી અને લઘુત્તમ 22 ડિગ્રી સેલ્સિયસ રહેવાની શક્યતા છે.

ઝારખંડમાં 25-26 સપ્ટેમ્બર સુધી એલર્ટ

રાંચી, ધનબાદ, બોકારો, દેવઘર અને પલામુ સહિતના વિસ્તારોમાં 25 અને 26 સપ્ટેમ્બરે 50 થી 60 કિલોમીટર પ્રતિ કલાકની ઝડપે પવન અને ભારે વરસાદની આગાહી છે. રાંચીમાં મહત્તમ તાપમાન 24 ડિગ્રી અને લઘુત્તમ 22 ડિગ્રી સેલ્સિયસ રહેવાની શક્યતા છે.

પશ્ચિમ બંગાળમાં તોફાની પવનની ચેતવણી

કોલકાતા, દાર્જિલિંગ, હાવડા, જલપાઈગુડી અને કાલિમપોંગમાં 70 કિલોમીટર પ્રતિ કલાકની ઝડપે પવન ફૂંકાવાની શક્યતા છે. કોલકાતામાં મહત્તમ તાપમાન 29 ડિગ્રી અને લઘુત્તમ 26 ડિગ્રી સેલ્સિયસ રહી શકે છે.

ઓડિશા અને આંધ્રપ્રદેશમાં ભારે વરસાદની આગાહી

ઓડિશાના ભુવનેશ્વર, પુરી અને બાલાસોરમાં 65 કિલોમીટર પ્રતિ કલાકની ઝડપે તોફાની પવન સાથે ભારેથી અતિભારે વરસાદ પડી શકે છે. આંધ્રપ્રદેશના વિશાખાપટ્ટનમ, કાકીનાડા, ગુંટુર અને વિજયનગરમમાં 75 કિલોમીટર પ્રતિ કલાકની ઝડપે પવન ફૂંકાવાની શક્યતા છે.

ઉત્તરાખંડ અને હિમાચલમાં ભૂસ્ખલનનો ખતરો

ઉત્તરાખંડના નૈનીતાલ, ચંપાવત, પિથોરાગઢ, પૌડી ગઢવાલ, ઉત્તરકાશી, ચમોલી, બાગેશ્વર અને ટેહરી ગઢવાલમાં ભારે વરસાદની ચેતવણી આપવામાં આવી છે. દહેરાદૂનમાં મહત્તમ તાપમાન 28 ડિગ્રી અને લઘુત્તમ 20 ડિગ્રી સેલ્સિયસ રહેવાની શક્યતા છે.

હિમાચલ પ્રદેશના મંડી, કાંગડા અને સોલનમાં 40 થી 50 કિલોમીટર પ્રતિ કલાકની ઝડપે પવન સાથે વરસાદ પડી શકે છે. મનાલીમાં મહત્તમ તાપમાન 12 ડિગ્રી અને લઘુત્તમ 2 ડિગ્રી સેલ્સિયસ રહેવાની આગાહી છે.

જમ્મુ-કાશ્મીર, પંજાબ અને છત્તીસગઢમાં પણ એલર્ટ

જમ્મુ, પૂંચ, બારામુલ્લા અને શ્રીનગર સહિતના વિસ્તારોમાં ભારે વરસાદની ચેતવણી આપવામાં આવી છે. શ્રીનગરમાં મહત્તમ તાપમાન 26 ડિગ્રી અને લઘુત્તમ 13 ડિગ્રી સેલ્સિયસ રહેવાની શક્યતા છે.

પંજાબના અમૃતસર, લુધિયાણા અને ચંદીગઢમાં 60 કિલોમીટર પ્રતિ કલાકની ઝડપે પવનના ઝાપટાં સાથે ભારે વરસાદ પડી શકે છે.

છત્તીસગઢના રાયપુર, બિલાસપુર અને કોરબામાં 65 થી 70 કિલોમીટર પ્રતિ કલાકની ઝડપે પવન ફૂંકાવાની સાથે ભારે વરસાદની શક્યતા વ્યક્ત કરવામાં આવી છે.