કેટલું ભણેલા છે પ્રહલાદ જોશી?, જાણો દેશના નવા શિક્ષણમંત્રી પાસે કઈ ડિગ્રી છે

Pralhad Joshi Education : દેશના શિક્ષણ મંત્રાલયની કમાન હવે પ્રહલાદ જોશીના હાથમાં રહેશે. રાષ્ટ્રપતિ દ્રૌપદી મુર્મૂએ વડાપ્રધાનની સલાહ પર કેન્દ્રીય શિક્ષણ મંત્રી ધર્મેન્દ્ર પ્રધાનનું રાજીનામું મંજૂર કરી લીધું છે. આ સાથે પ્રહલાદ જોશીને તેમના હાલના મંત્રાલયોની સાથે શિક્ષણ મંત્રાલયનો વધારાનો હવાલો પણ સોંપવામાં આવ્યો છે. હવે પ્રહલાદ જોશી ઉપભોક્તા બાબતો, ખાદ્ય અને સાર્વજનિક વિતરણ મંત્રાલયની સાથે શિક્ષણ મંત્રાલયની જવાબદારી પણ નિભાવશે.

પ્રહલાદ જોશી આ પહેલાં નવીન અને પુનઃપ્રાપ્ય ઊર્જા, સંસદીય બાબતો અને સરકારના અનેક મહત્વના મંત્રાલયોની જવાબદારી સંભાળી ચૂક્યા છે. આવી પરિસ્થિતિમાં લોકોના મનમાં સવાલ ઊઠી રહ્યો છે કે, દેશના નવા શિક્ષણ મંત્રીનું શિક્ષણ કેટલું છે?, અને અત્યાર સુધીની તેમની રાજકીય સફર કેવી રહી છે. તો ચાલો જાણીએ કે નવા શિક્ષણ મંત્રી પ્રહલાદ જોશી પાસે કઈ ડિગ્રી છે.

દેશના નવા શિક્ષણ મંત્રીનો જન્મ ક્યાં થયો હતો?

પ્રહલાદ જોશીનો જન્મ 27 નવેમ્બર 1962ના રોજ કર્ણાટકના વિજયપુરામાં થયો હતો. તેમના પિતા સ્વર્ગસ્થ વેંકટેશ જોશી ભારતીય રેલવેમાં કર્મચારી હતા, અને તેમની માતાનું નામ માલતીબાઈ હતું. નાનપણથી જ તેમનું જીવન એક સામાન્ય પરિવારમાં વિત્યું. વિદ્યાર્થી કાળ દરમિયાન તેમનો રસ સામાજિક કાર્યો અને જનહિતના વિષયોમાં રહ્યો. આગળ જતાં તેમણે સામાજિક પ્રવૃત્તિઓની સાથે એક નાના ઉદ્યોગની સ્થાપના પણ કરી. ત્યારબાદ તેમણે સક્રિય રાજકારણમાં પગ મૂક્યો અને ધીમે ધીમે રાષ્ટ્રીય સ્તરે પોતાની ઓળખ બનાવી.

નવા શિક્ષણ મંત્રી પ્રહલાદ જોશી પાસે કઈ ડિગ્રી છે?

પ્રહલાદ જોશીનું પ્રાથમિક શિક્ષણ રેલવે સ્કૂલમાં થયું હતું. ત્યારબાદ તેમણે હુબલીની ન્યૂ ઈંગ્લિશ સ્કૂલમાંથી પોતાનું શાળાકીય શિક્ષણ પૂરું કર્યું. ઉચ્ચ શિક્ષણ માટે તેમણે કર્ણાટક યુનિવર્સિટી, ધારવાડ સાથે સંલગ્ન K.S. આર્ટસ કોલેજ, હુબલીમાં પ્રવેશ લીધો. અહીંથી તેમણે બેચલર ઓફ આર્ટ્સ (B.A.) ની ડિગ્રી મેળવી. અધિકૃત સંસદીય પ્રોફાઇલ અનુસાર, તેમણે વર્ષ 1983માં B.A. નો અભ્યાસ પૂર્ણ કર્યો હતો. કર્ણાટક યુનિવર્સિટીની સ્થાપના વર્ષ 1949માં થઈ હતી, અને તેની ઉત્તર કર્ણાટકની અગ્રણી યુનિવર્સિટીઓમાં ગણના થાય છે.

રાજકીય સફર કેવી રીતે શરૂ થઈ?

પ્રહલાદ જોશી વર્ષ 2004માં પહેલીવાર કર્ણાટકની ધારવાડ લોકસભા બેઠક પરથી સાંસદ તરીકે ચૂંટાયા હતા. ત્યારબાદ તેમણે સતત દરેક લોકસભા ચૂંટણીમાં જીત મેળવી છે. આ જ કારણ છે કે, તેઓ કર્ણાટકમાં ભારતીય જનતા પાર્ટીના સૌથી લાંબા સમય સુધી સાંસદ રહેનારા નેતાઓમાં સામેલ છે. રાજકારણમાં આવતા પહેલા તેઓ વેપાર અને સામાજિક કાર્યો સાથે જોડાયેલા હતા.

કેન્દ્ર સરકારમાં અનેક મહત્વના મંત્રાલયો સંભાળી ચૂક્યા છે

30 મે 2019ના રોજ પ્રહલાદ જોશીએ પહેલીવાર કેન્દ્રીય મંત્રી તરીકે શપથ લીધા હતા. એ સમયે તેમને સંસદીય બાબતો, કોલસા અને ખાણ મંત્રાલયની જવાબદારી સોંપવામાં આવી હતી. ત્યારબાદ કેન્દ્ર સરકારમાં તેમને સમય-સમય પર અનેક મહત્વના મંત્રાલયોની જવાબદારી મળી છે. તેઓ સોલર અને વિન્ડ એનર્જી જેવા કાર્યો પણ સંભાળી ચૂક્યા છે.