અંધારામાં ડૂબ્યા ઘરો, પાણીની તંગી, લોકો રસ્તા પર ઉતર્યા...: 40 હજાર વીજકર્મીઓની હડતાળથી ગુરુગ્રામમાં ભયાનક સંકટ

Haryana Electricity Employees Strike News : હરિયાણામાં વીજ કર્મચારીઓની ત્રણ દિવસની હડતાળને કારણે ગુરુગ્રામ સહિત અનેક વિસ્તારોમાં વીજ પુરવઠો ખોરવાયો છે. ગુરુવારે 50 હજારથી વધુ ઘરો પ્રભાવિત થયા હતા, જ્યારે લગભગ 1,800 ઔદ્યોગિક એકમોની કામગીરી અટકી હતી. વીજળી બંધ રહેતાં અનેક વિસ્તારોમાં પાણીની સમસ્યા પણ સર્જાઈ હતી. રહેવાસીઓ રસ્તા પર ઊતરી વિરોધ કરવા મજબૂર બન્યા હતા. હરિયાણા વીજ નિયમન પંચે (HERC) ગુરુગ્રામ અને નૂહમાં ખાનગી કંપની ઇલેવન પાવરને 25 વર્ષ માટે વીજ વિતરણનું સમાંતર લાઇસન્સ આપ્યું છે. આ નિર્ણયના વિરોધમાં વીજ કર્મચારીઓએ હડતાળ શરૂ કરી છે. કર્મચારી સંગઠનોનો દાવો છે કે ખાનગી કંપનીને લાઇસન્સ આપવાથી સરકારી વીજ વિતરણ વ્યવસ્થાને નુકસાન થશે.

વીજળી બંધ થતાં પાણીની પણ અછત

ગુરુગ્રામમાં આશરે 8.5 લાખ વીજ ગ્રાહકો છે. જૂના ગુરુગ્રામ સહિત અનેક વિસ્તારોમાં લાંબા સમય સુધી વીજળી બંધ રહી હતી. સેક્ટર-9Aમાં આશરે 6,000 પરિવારોને અસર થઈ હતી. વીજળી ન હોવાથી પાણી પહોંચાડતું બૂસ્ટિંગ સ્ટેશન પણ બંધ પડ્યું હતું. હરિ નગરમાં 7,000થી વધુ પરિવારોને વીજ કાપનો સામનો કરવો પડ્યો હતો. ઇન્વર્ટરની બેટરી ખૂટી જતાં ઘરના રોજિંદા કામ, બાળકોનો અભ્યાસ અને રસોઈ પણ ખોરવાયાં હતાં. રાજેન્દ્ર પાર્ક અને ગુરુગ્રામ રેલવે સ્ટેશન નજીકના વિસ્તારોમાં રહેવાસીઓએ વીજળી શરૂ કરવાની માગ સાથે વિરોધ નોંધાવ્યો હતો. ફરીદાબાદ અને નૂહમાં પણ વીજ કાપની અસર જોવા મળી હતી.

1,800 ઔદ્યોગિક એકમો પ્રભાવિત

સેક્ટર-37 અને કાદીપુરના ઔદ્યોગિક વિસ્તારોમાં લગભગ 1,800 એકમોની કામગીરી ખોરવાઈ હતી. મશીનો બંધ પડતાં ઉત્પાદન અટક્યું હતું. ઉદ્યોગકારોએ કરોડો રૂપિયાના નુકસાનની ભીતિ વ્યક્ત કરી હતી. ડીઝલ જનરેટરથી કામ ચલાવવાના પ્રયાસો પણ લાંબા સમય સુધી સફળ રહ્યા નહોતા. પ્રદૂષણ નિયંત્રણ હેઠળનાં નિયંત્રણોને કારણે જનરેટરનો ઉપયોગ કરવામાં પણ મુશ્કેલી પડી હતી.

98 ટકા કર્મચારીઓ હડતાળમાં

દક્ષિણ હરિયાણા વીજ વિતરણ નિગમના મુખ્ય ઇજનેર પી.કે. ચૌહાણના જણાવ્યા પ્રમાણે, આશરે 98 ટકા અધિકારીઓ અને કર્મચારીઓ હડતાળમાં જોડાયા હતા. ફરિયાદોનો નિકાલ કરવા માટે કોન્ટ્રાક્ટ પર રાખેલા આશરે 100 કર્મચારીઓની મદદ લેવાઈ હતી, છતાં મુશ્કેલીઓ યથાવત્ રહી હતી.

સરકાર કાનૂની લડત લડશે

મુખ્યમંત્રી નાયબ સિંહ સૈનીએ લાઇસન્સના નિર્ણયને અપીલેટ ટ્રિબ્યુનલ ફોર ઇલેક્ટ્રિસિટી (APTEL)માં પડકારવાની જાહેરાત કરી છે. ઊર્જા મંત્રી અનિલ વિજે પણ ખાનગીકરણનો વિરોધ કરતાં કર્મચારીઓને હડતાળ પાછી ખેંચવા અપીલ કરી હતી. જોકે, કર્મચારી સંગઠનો લાઇસન્સ પાછું ખેંચવાની અને રાજ્યમાં સમાંતર વીજ વિતરણ સામે નીતિ બનાવવાની માગ પર અડગ છે. માગણીઓ સ્વીકારાય નહીં તો 24 ઓક્ટોબર પછી હડતાળ લંબાવવી કે નહીં તે અંગે નિર્ણય લેવાશે.