શ્રદ્ધા કે ષડયંત્ર! વિરાટ કોહલી-પ્રેમાનંદ મહારાજ આશ્રમ વિવાદમાં કઈ ઘટના રહેલી છે, 5 કરોડના દાવામાં કેટલું સત્ય?

Virat Kohli Premanand Maharaj 5 Crore Controversy : આધ્યાત્મિકતા અને શાંતિની શોધમાં જ્યારે કોઈ જાણીતી હસ્તી આશ્રમમાં જાય, ત્યારે તેને શ્રદ્ધા કહેવાય. પરંતુ જ્યારે આ શ્રદ્ધા પર 5 કરોડ રૂપિયાના સોદાનો અને જમીન માફિયાઓનો આરોપ લાગે, ત્યારે તે એક મોટો વિવાદ બની જાય છે. હાલમાં વૃંદાવનના પ્રખ્યાત સંત પ્રેમાનંદ મહારાજના આશ્રમ અને ભારતીય ક્રિકેટર વિરાટ કોહલીને લઈને એક આવો જ મોટો વિવાદ સામે આવ્યો છે. આશ્રમનું આંતરિક રાજકારણ, જમીન વિવાદ અને એક શિષ્યના શંકાસ્પદ મૃત્યુના મામલામાં વિરાટ કોહલીનું નામ પણ સાંકળવામાં આવ્યું છે. ચાલો, સમજીએ કે મામલો શું છે અને તેમાં કેટલી સત્યતા છે.

વિવાદના મૂળમાં કઈ ઘટના રહેલી છે?

આ સમગ્ર ઘટનાની શરૂઆત વૃંદાવનમાં આવેલા સંત પ્રેમાનંદ મહારાજના આશ્રમથી થાય છે. પ્રેમાનંદ મહારાજ તેમના સત્સંગ અને સોશિયલ મીડિયાના કારણે દેશભરમાં ખૂબ જ લોકપ્રિય છે. 25 સપ્ટેમ્બર 2026ના રોજ મહારાજના એક શિષ્ય રસિક દુલારી શરણ(મૂળ નામ- દીપક લોધી)નું શંકાસ્પદ સંજોગોમાં મૃત્યુ થયું હતું. તેઓ આશ્રમના ચોથા માળેથી નીચે પડીને મૃત્યુ પામ્યા હતા. તેમનું ગુપ્તાંગ કપાયેલી હાલતમાં હતું અને તેમના રૂમમાંથી લોહીથી ખરડાયેલું ઇલેક્ટ્રિક ગ્રાઇન્ડર મશીન મળી આવ્યું હતું. આશ્રમમાંથી અન્ય કેટલાક લોકો ગુમ થયા હોવાના અહેવાલો પણ સામે આવ્યા છે.

ફલાહારી મહારાજે વિવાદ ગરમાવ્યો

આશ્રમ સંબંધિત ગંભીર બાબતો સામે આવ્યા પછી ‘શ્રી કૃષ્ણ જન્મભૂમિ સંઘર્ષ ન્યાસ’ના પ્રમુખ દિનેશ શર્મા (જેઓ ‘ફલાહારી મહારાજ’ તરીકે ઓળખાય છે) મેદાનમાં આવ્યા. તેમણે ઉત્તર પ્રદેશના મુખ્યમંત્રી યોગી આદિત્યનાથને પત્ર લખીને દાવો કર્યો કે પ્રેમાનંદ મહારાજના આશ્રમમાં નકલી સંતો અને જમીન માફિયાઓનું એક જૂથ સક્રિય છે, જે તેમની છબીનો દુરુપયોગ કરી રહ્યું છે. તેમણે મહારાજ માટે સુરક્ષાની પણ માંગ કરી હતી.

વિરાટ કોહલીનું નામ કેવી રીતે ઉછળ્યું?

આ વિવાદમાં ફલાહારી મહારાજે એક મોટો દાવો કરીને વિરાટ કોહલીને પણ સંડોવી લીધો. ફલાહારી મહારાજે આરોપ લગાવ્યો કે, આશ્રમની આસપાસની જમીનના સોદામાં ફાયદો કરાવવા અને પ્રેમાનંદ મહારાજની લોકપ્રિયતા ઔર વધારવા માટે એક ષડયંત્ર ઘડવામાં આવ્યું હતું. તેમના કહેવા મુજબ, રાજસ્થાનની એક ખાનગી કંપની અને પ્રોપર્ટી બિલ્ડર લોબીએ વિરાટ કોહલીને આશ્રમમાં લાવવા અને તે મુલાકાતનો પ્રચાર કરવા માટે 5 કરોડ રૂપિયાનો ખર્ચ કર્યો હતો.

વિરાટ કોહલીએ આપ્યો જડબાતોડ જવાબ

આવા ગંભીર અને સનસનીખેજ આરોપો બાદ વિરાટ કોહલીની ટીમ તરફથી સ્પષ્ટતા કરવામાં આવી. 7 ઑક્ટોબર, 2026ના રોજ વિરાટના સત્તાવાર પ્રવક્તાએ એક નિવેદન જારી કરીને ફલાહારી મહારાજના તમામ દાવાઓને ફગાવી દેતાં કહ્યું કે, વિરાટ કોહલી અને તેમની પત્ની અનુષ્કા શર્માની પ્રેમાનંદ મહારાજની મુલાકાત પાછળ માત્રને માત્ર તેમની ‘ઊંડી આધ્યાત્મિક શ્રદ્ધા અને ભક્તિ’ છે. તેઓ ભૂતકાળમાં પણ ઘણી વાર આશ્રમની મુલાકાત લઈ ચૂક્યા છે. આ મુલાકાતો માટે પૈસા લેવા કે કોઈ નાણાકીય વ્યવહાર કરવાના આરોપોને તેમણે ‘સંપૂર્ણપણે ખોટા, પાયાવિહોણા અને બકવાસ’ ગણાવ્યા. સાથે જ મીડિયાને પણ અપીલ કરી કે આવી ખોટી અફવાઓ ફેલાવતા પહેલા તથ્યોની ચકાસણી કરવી જોઈએ.

અત્રે ઉલ્લેખનીય છે કે, વિરાટ અને અનુષ્કા 4 જાન્યુઆરી, 2023ના રોજ પહેલીવાર રાધા કેલી કુંજ આશ્રમમાં દર્શન માટે ગયા હતા. T20 ઇન્ટરનેશનલમાંથી નિવૃત્તિ લીધા બાદ પણ વિરાટે આશ્રમની મુલાકાત લીધી છે, જે તેમની અતૂટ શ્રદ્ધા દર્શાવે છે.

ફલાહારી મહારાજ કોણ છે?

કોહલી પર આરોપ લગાવનાર ફલાહારી મહારાજ મથુરામાં શ્રી કૃષ્ણ જન્મભૂમિ સંઘર્ષ ટ્રસ્ટના પ્રમુખ છે. તેમનો પોતાનો ભૂતકાળ પણ વિવાદિત રહ્યો છે. જૂન 2026માં, શ્રી કૃષ્ણ જન્મસ્થાન સેવા સંસ્થાન દ્વારા તેમની સામે છેતરપિંડી અને ગુનાહિત પ્રવૃત્તિઓ અંગે પોલીસ ફરિયાદ નોંધાવવામાં આવી હતી.

આશ્રમમાં હવે બે જૂથ પડી ગયા છે: ફલાહારી મહારાજ

ફલાહારી મહારાજનું કહેવું છે કે આશ્રમમાં હવે બે જૂથ પડી ગયા છે, જેમાંથી એક સાચા ભક્તોનું છે અને બીજું જમીન માફિયાઓનું અને નકલી સંતોનું બનેલું છે, જેઓ પ્રેમાનંદ મહારાજની લોકપ્રિયતાનો ઉપયોગ કરીને જમીનના વ્યવહારો પાર પાડવામાં લાગેલા છે. તેમના દાવા મુજબ, આવી બધી પ્રવૃત્તિઓથી નારાજ થઈને પ્રેમાનંદ મહારાજ પોતે આશ્રમ છોડીને બેલવન આશ્રમમાં જતા રહ્યા છે.

સત્ય શું છે?

હાલ પૂરતું તો વિરાટ કોહલી પાછળ 5 કરોડ રૂપિયા ખર્ચાયા હોવાના દાવાને સાબિત કરતો એક પણ નક્કર પુરાવો સામે આવ્યો નથી. પોલીસ હાલમાં માત્ર શિષ્યના મૃત્યુની તપાસ કરી રહી છે, નાણાકીય વ્યવહારો અંગે કોઈ સત્તાવાર તપાસ શરૂ કરવામાં આવી નથી. એક આધ્યાત્મિક આશ્રમની આંતરિક ખેંચતાણમાં ક્રિકેટરનું નામ બિનજરૂરી રીતે ઉછાળવામાં આવ્યું હોવાનું સ્પષ્ટ દેખાઈ રહ્યું છે.