મુંબઈ-ગુજરાતમાં એકસાથે 20 સ્થળોએ દરોડાથી અંડરવર્લ્ડમાં ફફડાટ! દાઉદના ખાસ સલીમ ડોલા પર EDનો સકંજો
Summarized by AI; it may make mistakes. Check important info
Summarized by AI; it may make mistakes. Check important info
ED Raids Mumbai-Gujarat : એન્ફોર્સમેન્ટ ડિરેક્ટોરેટ (ED)ની મુંબઈ ઝોનલ ઓફિસે અંડરવર્લ્ડ ડોન દાઉદ ઈબ્રાહિમના નજીકના સાથી અને આંતરરાષ્ટ્રીય ડ્રગ તસ્કર સલીમ ઈસ્માઈલ ડોલાના નેટવર્ક પર મોટી કાર્યવાહી શરૂ કરી છે. EDની ટીમે મુંબઈ તેમજ ગુજરાતના સુરત, અંકલેશ્વર અને રાજકોટ સહિત 20 સ્થળોએ એકસાથે દરોડા પાડ્યા છે. આ ઓપરેશન મની લોન્ડરિંગ અને આંતરરાષ્ટ્રીય ડ્રગ્સની હેરાફેરીના કેસ અંતર્ગત હાથ ધરવામાં આવ્યું છે.
ડ્રગ સિન્ડિકેટ પર ભારતનો સકંજો
આ કાર્યવાહી સલીમ ઈસ્માઈલ ડોલા અને તેના સાથીદારો દ્વારા ચલાવવામાં આવતા એવા ડ્રગ સિન્ડિકેટ સામે છે, જેનું નેટવર્ક કેટલાય દેશોમાં ફેલાયેલું છે અને તે હજારો કરોડ રૂપિયાના ડ્રગ્સ કારોબાર સાથે જોડાયેલું છે. ભારત સરકાર તાજેતરમાં જ સલીમ ડોલાને તુર્કિયેથી પ્રત્યાર્પણ કરીને ભારત લાવી હતી. તપાસ એજન્સીઓ મુજબ, તે લાંબા સમયથી આંતરરાષ્ટ્રીય સ્તરે પ્રતિબંધિત માદક પદાર્થોનું નેટવર્ક ચલાવીને મોટા પાયે ગેરકાયદે કમાણી કરતો હતો.
STORY | ED raids in Maharashtra, Gujarat in Salim Dola drugs case
— Press Trust of India (@PTI_News) June 2, 2026
The Enforcement Directorate on Tuesday raided multiple locations in Maharashtra and Gujarat as part of a money laundering probe against Mohammad Salim Dola, an alleged Dawood gang drug trafficker who was recently… pic.twitter.com/dKu04Lv6IV
ડ્રગ્સના કારોબારમાં સામેલ આરોપીઓ પર EDની નજર
EDની આ તપાસ ડ્રગ્સ બનાવવા માટે વપરાતા પ્રીકર્સર કેમિકલ્સના સપ્લાયર્સ, કેમિકલ બિઝનેસના વચેટિયાઓ, સિન્થેટિક ડ્રગ મેફેડ્રોનના ઉત્પાદકો અને વિતરકો પર કેન્દ્રિત છે. આ સિવાય હવાલા ઓપરેટરો અને બેનામી મિલકતોના માલિકોને પણ તપાસના દાયરામાં લેવાયા છે. પ્રિવેન્શન ઓફ મની લોન્ડરિંગ એક્ટ (PMLA), 2002 હેઠળ શરૂ કરાયેલી આ તપાસ મુંબઈમાં સલીમ ડોલા અને અન્ય આરોપીઓ સામે નોંધાયેલી અસંખ્ય FIRના આધારે શરૂ કરવામાં આવી છે.
આ પણ વાંચો : ભાજપને ભારે પડશે અન્નામલાઈની નારાજગી? તમિલનાડુના રાજકારણમાં મોટા ફેરબદલના સંકેત
ઈડીને પુરાવા મળ્યા
તપાસ દરમિયાન EDને પુરાવા મળ્યા છે કે, આ સંગઠિત ગુનાહિત નેટવર્ક કેમિકલની ખરીદી, ગુપ્ત રીતે મેફેડ્રોનનું ઉત્પાદન, રાજ્યો વચ્ચે ડ્રગ્સની સપ્લાય અને વિદેશમાં તસ્કરી જેવી પ્રવૃત્તિઓ કરતું હતું. ગુના દ્વારા મેળવેલા આ નાણાંને હવાલા ચેનલ દ્વારા ટ્રાન્સફર કરવામાં આવતા હતા અને વિવિધ સહયોગીઓના નામે ચલ-અચલ તેમજ બેનામી મિલકતો ખરીદવા માટે રોકાણ કરવામાં આવતું હતું. હાલમાં EDની ટીમ આ સમગ્ર નેટવર્કની નાણાકીય ગતિવિધિઓની તપાસ કરી રહી છે. આ તપાસ કેમિકલ ફેક્ટરીઓથી લઈને એકાઉન્ટન્ટ, ચાર્ટર્ડ એકાઉન્ટન્ટ (CA) અને અન્ય નાણાકીય સલાહકારોની ભૂમિકા સુધી વિસ્તરેલી છે. હવાલા દ્વારા મોકલાયેલી રકમનો ઉપયોગ ભારત અને વિદેશમાં ક્યાં થયો તે જાણવા માટે દરોડા દરમિયાન દસ્તાવેજો, નાણાકીય રેકોર્ડ અને ડિજિટલ પુરાવા એકત્ર કરવામાં આવી રહ્યા છે.
