કોકરોચ આંદોલન પહેલા છાવણીમાં ફેરવાયું દિલ્હી: ટ્રેનો-મેટ્રો ઠપ, દારૂની દુકાનો બંધ, સ્ટેડિયમમાં બનાવાઈ અસ્થાયી જેલ

Delhi CJP Protest Crackdown: Trains Metros Cancelled CAPF Deployed Section 163 | મુખ્ય ચૂંટણી કમિશનર જ્ઞાનેશ કુમાર વિરુદ્ધ શનિવાર, 10 ઑક્ટોબરના રોજ જંતર-મંતર ખાતે આયોજિત કોકરોચ જનતા પાર્ટી અને AISAના વિશાળ વિરોધ પ્રદર્શનને ધ્યાનમાં રાખીને દિલ્હી વહીવટી તંત્ર અને પોલીસે સમગ્ર રાષ્ટ્રીય રાજધાનીને અભેદ્ય કિલ્લામાં ફેરવી દીધી છે. દિલ્હી પોલીસે ભારતીય નાગરિક સુરક્ષા સંહિતાની કલમ 163 હેઠળ જાહેર મનાઈહુકમનો હવાલો આપીને આ પ્રદર્શન માટે સત્તાવાર પરવાનગી આપવાનો સ્પષ્ટ ઇન્કાર કરી દીધો છે.

ભીડની હિલચાલ અટકાવવા માટે દિલ્હી-એનસીઆરમાં રેલવે, મેટ્રો, કેબ, હોટલ બુકિંગથી માંડીને દારૂના વેચાણ પર અભૂતપૂર્વ નિયંત્રણો લાદી દેવામાં આવ્યા છે.

10 કલાક માટે ટ્રેનો રદ અને નિયંત્રિત: રાજધાની પણ કેન્સલ

શનિવાર, 10 ઑક્ટોબરના રોજ સવારે 04:00 વાગ્યાથી બપોરે 2:00 વાગ્યા સુધી નવી દિલ્હી (NDLS) અને હઝરત નિઝામુદ્દીન સ્ટેશને આવતી-જતી તમામ ટ્રેનો રદ રહેશે. 9 ઑક્ટોબરના રોજ બપોરે 14:00 વાગ્યા પછી ઉપડતી સંબંધિત ટ્રેનોને સોર્સ પરથી જ રદ કરી દેવાઈ છે.

પશ્ચિમ બંગાળથી ઉપડતી 12301 હાવડા-નવી દિલ્હી રાજધાની એક્સપ્રેસ અને 12313 શિયાલદહ-નવી દિલ્હી રાજધાની એક્સપ્રેસ પણ રદ કરી દેવામાં આવી છે.

તમામ મેટ્રો સ્ટેશનો આજે રાત્રે 9:00 વાગ્યાથી બંધ થવાની શક્યતા

10 ઑઑક્ટોબરના રોજ સંભવિત આંદોલનને ધ્યાનમાં રાખીને, દિલ્હી પોલીસે DMRC ને પત્ર લખીને રાષ્ટ્રીય રાજધાનીના 57 મેટ્રો સ્ટેશનોના એન્ટ્રી-એક્ઝિટ ગેટ 9 ઑક્ટોબર રાત્રે 9:00 વાગ્યાથી 10 ઑક્ટોબર સ્થિતિ સામાન્ય થાય ત્યાં સુધી બંધ રાખવા તેમજ આ સ્ટેશનો પર ટ્રેનોની ફ્રીક્વન્સી ઘટાડવા પ્રસ્તાવ મૂક્યો છે.

CAPFની 221 કંપનીઓ અને 23,000 જવાનો તૈનાત

ગૃહ મંત્રાલયે 8 થી 12 ઑક્ટોબર સુધી દિલ્હી પોલીસને સહાય માટે CAPFની 221 કંપનીઓ ફાળવી છે, જેમાં અંદાજે 23,000 જવાનો સામેલ છે. સુરક્ષા બંદોબસ્તમાં 5 ઓલ-વુમન પેરામિલીટરી કંપનીઓ પણ સામેલ રહેશે. આ સઘન બંદોબસ્ત માટે સીઆરપીએફની કંપનીઓને જમ્મુ અને કાશ્મીર, પશ્ચિમ બંગાળ અને છત્તીસગઢથી ખાસ દિલ્હી બોલાવવામાં આવી છે.

સ્પોર્ટ્સ સ્ટેડિયમોને અસ્થાયી જેલમાં ફેરવાયા

પ્રદર્શન દરમિયાન અટકાયત કરવામાં આવનારા લોકોને રાખવા માટે વિવિધ જિલ્લાઓમાં અંદાજે 10 ડિટેન્શન સેન્ટરો તૈયાર કરવામાં આવી રહ્યા છે. બવાના ખાતે આવેલા રાજીવ ગાંધી સ્ટેડિયમ અને છત્રસાલ સ્ટેડિયમ સહિતની નિર્ધારિત સરકારી સુવિધાઓને અટકાયત કેન્દ્રો તરીકે સજ્જ કરાઈ છે. આ ઉપરાંત નરેલા, પૂર્વ દિલ્હી અને ઉત્તર-પશ્ચિમ દિલ્હીમાં પણ આવા અસ્થાયી કેન્દ્રો ઊભા કરવામાં આવ્યા છે.

દિલ્હી બોર્ડર પર કડક ચેકિંગ

દિલ્હીના તમામ એન્ટ્રી પોઈન્ટ્સ પર પોલીસે હાઈ-એલર્ટ જાહેર કરીને તકેદારી વધારી દીધી છે. બહારના રાજ્યોમાંથી ટોળાંઓને ભેગા કરવાના ઈરાદે પ્રવેશવાનો પ્રયાસ કરનાર શંકાસ્પદ વ્યક્તિઓને સરહદ પર જ અટકાવીને કસ્ટડીમાં લેવામાં આવશે.

દિલ્હીમાં 9 અને 10 ઑક્ટોબરે દારૂની દુકાનો બંધ

દિલ્હી એક્સાઇઝ વિભાગે પોલીસ ઈનપુટ્સના આધારે 9 અને 10 ઑક્ટોબરના રોજ શહેરની તમામ દારૂની દુકાનો બંધ રાખવાનો સત્તાવાર આદેશ કર્યો છે.

ઇન્ટરનેટ સેવાઓ સ્થગિત કરવાની તૈયારી

અટકાયત કરાયેલા લોકોને જે વિસ્તારોમાં રાખવામાં આવ્યા છે ત્યાં ભીડ એકઠી ન થાય તે માટે ઇન્ટરનેટ સેવાઓ પર પ્રતિબંધ મુકાઈ શકે છે. સુરક્ષાની સ્થિતિ મુજબ આ પ્રતિબંધો નવી દિલ્હી અને સેન્ટ્રલ દિલ્હીના કેટલાક ભાગોમાં પણ લંબાવી શકાય છે.

મીડિયાકર્મીઓ માટે વેલિડ આઈડી કાર્ડ ફરજિયાત

પોલીસે તમામ મીડિયા સંસ્થાઓને વિનંતી કરી છે કે પ્રદર્શનનું કવરેજ કરતા તમામ પત્રકારો અને કેમેરામેન બેરિકેડ્સ અને સંવેદનશીલ સ્થળો પર પોતાનું માન્ય પ્રેસ આઈડેન્ટિફિકેશન કાર્ડ ફરજિયાતપણે સ્પષ્ટ દેખાય તે રીતે પહેરીને રાખે.