વાવાઝોડું ‘અર્નબ’નું આંધ્રપ્રદેશમાં તાંડવ : 5ના મોત, 13 જિલ્લામાં પૂરનું એલર્ટ, અન્ય 4 રાજ્યોમાં પણ અસર

Cyclone Arnab Landfall : વાવાઝોડું ‘અર્નબ’ બુધવારે વહેલી સવારે આંધ્રપ્રદેશના દરિયાકાંઠે ત્રાટકતાં ભારે તબાહી સર્જાઈ છે. 125 થી 135 કિલોમીટર પ્રતિ કલાકની ઝડપે ફૂંકાયેલા પવનો અને મુશળધાર વરસાદને કારણે જનજીવન સંપૂર્ણપણે અસ્તવ્યસ્ત થઈ ગયું છે. રાજ્યમાં અલગ અલગ ઘટનાઓમાં 5 લોકોના મોત થયા છે અને ભારે નુકસાન થયું છે. આ તોફાનની અસર પશ્ચિમ બંગાળ, ઓડિશા અને છત્તીસગઢ સુધી જોવા મળી રહી છે.

આંધ્રપ્રદેશમાં દરિયાકાંઠે લેન્ડફોલ અને ભયાનક વિનાશ

હવામાન વિભાગ (IMD) અનુસાર વાવાઝોડું ‘અર્નબ’ 28 ઓક્ટોબર 2026ની વહેલી સવારે આશરે 1:20 વાગ્યે બાપટલા અને વિશાખાપટ્ટનમ વચ્ચે, યનમની દક્ષિણે કાકીનાડા નજીકથી દરિયાકાંઠો વટાવી ગયું હતું. આ દરમિયાન પવનના ઝાપટાં 150 કિલોમીટર પ્રતિ કલાક સુધી પહોંચ્યા હતા. કાકીનાડામાં દરિયાકાંઠાનો ઉપ્પાડા રોડ સંપૂર્ણપણે ધોવાઈ ગયો છે, જ્યારે વિશાખાપટ્ટનમમાં 400 થી વધુ વૃક્ષો અને કાકીનાડામાં 100 થી વધુ વીજપોલ ધરાશાયી થતાં વીજળી ગુલ થઈ ગઈ છે. અનકાપલ્લીના કન્નૂરીપાલેમમાં સૌથી વધુ 261.5 મિલીમીટર વરસાદ નોંધાયો છે. આ ઉપરાંત અલ્લૂરી સીતારામરાજુ જિલ્લામાં પુલ તૂટી જતાં સંપર્ક કપાઈ ગયો છે.

પાંચ લોકોનાં મોત અને મુખ્યમંત્રીનું નિવેદન

આંધ્રપ્રદેશના મુખ્યમંત્રી ચંદ્રબાબુ નાયડુએ વાવાઝોડાના કારણે 5 લોકોના મોતની પુષ્ટિ કરી છે. કોનાસીમા, વિશાખાપટ્ટનમ, અનકાપલ્લી અને ભીમાવરમમાં વૃક્ષો અને વીજપોલ પડવાથી તેમજ કરંટ લાગવાથી આ દુર્ઘટનાઓ બની છે. મુખ્યમંત્રીએ પીડિત પરિવારો પ્રત્યે સંવેદના વ્યક્ત કરી યુદ્ધના ધોરણે રાહત અને બચાવ કામગીરી હાથ ધરવા અધિકારીઓને સૂચના આપી છે. તેમણે જણાવ્યું કે પ્રશાસન રિયલ ટાઈમ ગવર્નન્સ સેન્ટર દ્વારા સમગ્ર સ્થિતિ પર સતત નજર રાખી રહ્યું છે.

13 જિલ્લામાં પૂરનું જોખમ અને મોટા પાયે બચાવ કાર્ય

હવામાન વિભાગે આંધ્રપ્રદેશના 13 જિલ્લાઓમાં અચાનક પૂર આવવાની ચેતવણી જાહેર કરી છે. સંભવિત ખતરાને ધ્યાને રાખીને અત્યાર સુધીમાં આશરે 57000 લોકોને સુરક્ષિત રાહત શિબિરોમાં ખસેડવામાં આવ્યા છે. વિઝિયાનગરમના ધર્મપુરી ગામમાં પાણી ભરાઈ જતાં ઘરમાં ફસાયેલા 5 લોકોને પોલીસે દોરડા અને જેસીબીની મદદથી સલામત બહાર કાઢ્યા હતા. ગુંટુર અને રાજમહેન્દ્રી જેવા શહેરોમાં નહેરો છલકાઈ જતાં માર્ગો જળબંબાકાર બન્યા છે. વાયુસેનાના બે C-130J વિમાનો દ્વારા વિજયવાડા ખાતે 23 ટન રાહત સામગ્રી પહોંચાડવામાં આવી છે, જ્યારે એનડીઆરએફની ટીમો સતત રાહત કામગીરીમાં લાગેલી છે.

દરિયામાં માલવાહક જહાજ ફસાયું

વાવાઝોડા વચ્ચે વિશાખાપટ્ટનમથી સિંગાપોર જઈ રહેલું સલ્ફર ભરેલું એક મોટું માલવાહક જહાજ એન્જિનમાં ખામી સર્જાતાં ભટકી ગયું હતું. આ જહાજ આંધ્રપ્રદેશના અંતરવેદી નજીક છીછરા દરિયાઈ વિસ્તારમાં ફસાઈ ગયું છે. બંદર સત્તાવાળાઓ અને દરિયાઈ સુરક્ષા એજન્સીઓ હાલ સમગ્ર સ્થિતિનું નિરીક્ષણ કરી આગળની કાર્યવાહીની તૈયારી કરી રહી છે.

ફ્લાઈટ્સ રદ અને પડોશી રાજ્યોમાં એલર્ટ

વાવાઝોડાના કારણે હવાઈ સેવાઓ પર ગંભીર અસર પડી છે. વિશાખાપટ્ટનમ, વિજયવાડા અને રાજમુંદરી એરપોર્ટ પર ફ્લાઈટ્સ ખોરવાઈ ગઈ છે. એર ઈન્ડિયાએ 6 અને એર ઈન્ડિયા એક્સપ્રેસે 13 ફ્લાઈટ્સ રદ કરી છે, જ્યારે ઈન્ડિગોએ વિશાખાપટ્ટનમ ખાતેનું સંચાલન સ્થગિત કરી દીધું છે. બીજી તરફ કોલકાતામાં 5 ફ્લાઈટ્સ રદ થઈ છે અને દક્ષિણ બંગાળના ચાર જિલ્લાઓમાં ભારે વરસાદની ચેતવણી આપવામાં આવી છે. ઓડિશાના પુરી અને ગંજમમાં તોફાની પવનો ફૂંકાતાં ઝાડ પડી જવાની ઘટનાઓ બની છે, જ્યારે છત્તીસગઢમાં પણ આગામી 3 દિવસ માટે પાકને નુકસાન પહોંચાડી શકે તેવા વરસાદનું એલર્ટ જારી કરવામાં આવ્યું છે.