મમતા બેનર્જીને વધુ એક મોટો ઝટકો, તૃણમૂલ કોંગ્રેસના રાજ્યસભા સાંસદ કોયલ મલિકનું રાજીનામું

Another day, another resignation for TMC: પશ્ચિમ બંગાળમાં સત્તાધારી તૃણમૂલ કોંગ્રેસને વધુ એક મોટો આંચકો લાગ્યો છે. પક્ષના નેતા અને જાણીતા અભિનેત્રી કોયલ મલ્લિકે ગુરુવારે રાજ્યસભાના સભ્યપદેથી રાજીનામું આપી દીધું છે. મમતા બેનર્જીની આગેવાની હેઠળના પક્ષમાંથી સાંસદો અને ધારાસભ્યોના સતત થઈ રહેલા પક્ષપલટા વચ્ચે આ નવો ઘટનાક્રમ સામે આવ્યો છે. સૂત્રોના જણાવ્યા અનુસાર, તૃણમૂલના રાજ્યસભા સાંસદ કોયલ મલ્લિકે ઉપરાષ્ટ્રપતિ અને રાજ્યસભાના અધ્યક્ષ સી. પી. રાધાકૃષ્ણન સાથે મુલાકાત કરીને રાજીનામું સુપરત કર્યું હતું.

એક દિવસ પહેલા જ મદન મિત્રાએ છોડ્યો હતો સાથ

કોયલ મલ્લિકનું રાજીનામું મમતા બેનર્જીના અત્યંત નજીકના ગણાતા અને તૃણમૂલ ધારાસભ્ય મદન મિત્રાએ પક્ષ છોડ્યાના બરાબર એક દિવસ બાદ આવ્યું છે. મદન મિત્રાએ પક્ષમાંથી છેડો ફાડીને ઋતબ્રત બેનર્જીની આગેવાની હેઠળના બળવાખોર તૃણમૂલ કોંગ્રેસ જૂથમાં જોડાવાનો નિર્ણય કર્યો હતો.

અગાઉના રાજીનામા અને ભાજપનો પક્ષ

અગાઉ પણ તૃણમૂલને મોટા ઝટકા લાગી ચૂક્યા છે, જેમાં સુખેન્દુ શેખર રોય, સુષ્મિતા દેવ અને પ્રકાશ ચિક બડાઈકે રાજ્યસભા તેમજ તૃણમૂલ કોંગ્રેસ પક્ષમાંથી રાજીનામું આપી દીધું હતું. ત્યારબાદ તેઓ ભાજપમાં જોડાયા હતા. આ નેતાઓએ પશ્ચિમ બંગાળમાં યોજાનારી રાજ્યસભાની પેટા ચૂંટણી માટે સોમવારે ઉમેદવારી પણ નોંધાવી દીધી છે.