અમદાવાદથી ઉજ્જૈન હવે માત્ર 6 કલાકમાં! સિંહસ્થ પહેલાં ગુજરાત-MP વચ્ચે તૈયાર થઈ જશે સુપરફાસ્ટ એક્સપ્રેસવે

Ujjain-Garoth Expressway: મધ્ય પ્રદેશના ઉજ્જૈનથી ગુજરાતના અમદાવાદ સુધીનો પ્રવાસ હવે વધુ ઝડપી અને સુવિધાજનક બનવા જઈ રહ્યો છે. ઉજ્જૈનને સીધા દિલ્હી-મુંબઈ એક્સપ્રેસવે સાથે જોડતા ઉજ્જૈન-ગરોઠ ફોર-લેન સેક્શન (NH-752D)નું નિર્માણ કાર્ય પૂરઝડપે ચાલી રહ્યું છે. આ મહત્ત્વપૂર્ણ પ્રોજેક્ટના પૂર્ણ થવાથી બંને રાજ્યો વચ્ચેની કનેક્ટિવિટી વધુ મજબૂત થશે.

અમદાવાદથી ઉજ્જૈન હવે માત્ર 6 કલાકમાં પહોંચી શકાશે

હાલમાં ઉજ્જૈનથી અમદાવાદ જવા માટે ઝાબુઆ-દાહોદના જૂના રૂટનો ઉપયોગ કરવો પડે છે, જેની કુલ લંબાઈ આશરે 420 કિલોમીટર છે. રસ્તા પરના ટ્રાફિક અને સિંગલ રોડને કારણે આ સફર પૂરી કરવામાં 9થી 10 કલાકનો સમય લાગતો હતો. પરંતુ ઉજ્જૈન-ગરોઠ હાઇવે બનવાથી તે ગરોઠ પાસે સીધો દિલ્હી-મુંબઈ એક્સપ્રેસવે સાથે જોડાઈ જશે. આ નવા એક્સપ્રેસવે પર વાહનોની ગતિ 100થી 120 કિલોમીટર પ્રતિ કલાકની રહેવાથી હવે આ પ્રવાસ માત્ર 5.5થી 6 કલાકમાં જ પૂરો થઈ જશે, જેનાથી મુસાફરોના 3થી 4 કલાકની બચત થશે.

ઇન્દોર, દેવાસ, રતલામ અને મંસૌરને પણ ફાયદો

આ નવા કોરિડોરનો લાભ માત્ર ઉજ્જૈન કે અમદાવાદના મુસાફરોને જ નહીં, પરંતુ મધ્ય પ્રદેશના અન્ય મોટા શહેરોને પણ મળશે. જેમ કે, ઇન્દોર અને દેવાસ ઉજ્જૈન રિંગ રોડ સાથે જોડાયેલા હોવાથી આ બંને શહેરોમાંથી દિલ્હી કે અમદાવાદ જતો ટ્રાફિક પણ આ રૂટનો સરળતાથી ઉપયોગ કરી શકશે. જ્યારે રતલામ અને મંસૌર જેવા માળવા ક્ષેત્રના જિલ્લાઓના લોકો પણ ગુજરાતના અમદાવાદ અને વડોદરા જેવા પ્રમુખ શહેરો સાથે વધુ મજબૂત રીતે જોડાઈ જશે.

ઉજ્જૈન-ગરોઠ એક્સપ્રેસવેના મુખ્ય શહેરો

આ કોરિડોરના માર્ગમાં આવતા મુખ્ય શહેરો અને વિસ્તારોમાં ઉજ્જૈન, મહિદપુર, ઘટીયા, બડોદ, આલોટ, સુવાસરા, શામગઢ અને ગરોઠનો સમાવેશ થાય છે.

સિંહસ્થ-2028ને ધ્યાનમાં રાખીને થઈ રહ્યું છે નિર્માણ

આગામી ઉજ્જૈન સિંહસ્થ-2028ના ભવ્ય આયોજનને ધ્યાનમાં રાખીને આ પ્રોજેક્ટને અગ્રતા આપવામાં આવી રહી છે. ગુજરાત અને દેશના અન્ય ભાગોમાંથી મહાકુંભમાં આવતા શ્રદ્ધાળુઓ માટે બાબા મહાકાલની નગરી સુધી પહોંચવું ખૂબ જ સરળ બનશે. ગરોઠ પાસે દિલ્હી-મુંબઈ એક્સપ્રેસવે સાથે સીધા જોડાણને કારણે બંને તરફથી આવતા લોકોને અવરજવરમાં સુવિધા રહેશે, જેને મધ્ય પ્રદેશ અને ગુજરાત માટે એક ગેમ-ચેંજર પ્રોજેક્ટ માનવામાં આવે છે.

90 ટકા કામ પૂર્ણ, ટૂંક સમયમાં જનતાને થશે સમર્પિત

નેશનલ હાઈવે ઓથોરિટી ઓફ ઈન્ડિયા (NHAI) અને કન્સ્ટ્રક્શન એજન્સી (GHV) દ્વારા આ પ્રોજેક્ટ પર ઝડપથી કામ ચાલી રહ્યું છે. અંદાજે 2600 કરોડ રૂપિયાના ખર્ચે બની રહેલા આ 136.1 કિલોમીટર લાંબા કોરિડોરનું 90 ટકા જેટલું કામ પૂરું થઈ ચૂક્યું છે અને તે પોતાના અંતિમ તબક્કામાં છે. તેના પૂરા થવાથી એમપી-ગુજરાત વચ્ચેની પરિવહન વ્યવસ્થા વધુ ઝડપી અને મજબૂત બનશે.