'5 લાખમાં ખરીદ્યા પેપર, 111 સવાલ મેચ થયા...' NEET પેપર લીક કાંડમાં CBIનો મોટો ધડાકો
Summarized by AI; it may make mistakes. Check important info
Summarized by AI; it may make mistakes. Check important info
NEET UG Paper Leak: દેશની નામાંકિત મેડિકલ કોલેજોમાં એડમિશન મેળવવા માટે લેવાયેલી NEET(UG) પરીક્ષાના પેપર લીક મામલે સીબીઆઈ (CBI) દ્વારા એક ખાસ કોર્ટમાં કેટલાક અત્યંત ચોંકાવનારા ખુલાસા કરવામાં આવ્યા છે. સીબીઆઈએ કોર્ટ સમક્ષ રજૂ કરેલા પુરાવાઓમાં સ્પષ્ટ કર્યું છે કે આ આખીયે સરકારી પરીક્ષાના કૌભાંડ પાછળ એનટીએ (NTA)ની સરકારી પેનલના સભ્યો અને ખાનગી કોચિંગ સેન્ટરોના સંચાલકો વચ્ચે બહુ મોટી મિલીભગત અને સાંઠગાંઠ ચાલતી હતી.
કેમેસ્ટ્રીનું પેપર લીક કરવા ₹5 લાખની લાંચ અપાઈ
સીબીઆઈએ કોર્ટમાં આરોપી કોચિંગ સંચાલક શિવરાજ રઘુનાથ મોટેગાવકરની જામીન અરજીનો વિરોધ કરતા જણાવ્યું કે, તેણે કેમેસ્ટ્રી વિષયના પ્રશ્નો પરીક્ષા પહેલાં જ મેળવી લેવા માટે ₹5 લાખની મોટી રકમ ચૂકવી હતી. આ પ્રશ્નો નેશનલ ટેસ્ટિંગ એજન્સી (NTA)ના તે નિષ્ણાત પેનલ મેમ્બર પી.વી. કુલકર્ણી પાસેથી મેળવવામાં આવ્યા હતા, જે પોતે જ આ પ્રશ્નપત્ર તૈયાર કરવાની પ્રક્રિયામાં સામેલ હતા.
કોચિંગ ક્લાસ દરમિયાન પ્રશ્નો લીક થયા
તપાસ એજન્સીના જણાવ્યા પ્રમાણે, આ કેસના મુખ્ય આરોપી મોટેગાવકરનો દીકરો કુલકર્ણીના જ કેમેસ્ટ્રી ટ્યુટોરિયલ ક્લાસીસમાં ભણતો હતો. આ ક્લાસ દરમિયાન જ પરીક્ષાના અત્યંત ગુપ્ત અને મહત્ત્વના પ્રશ્નો લીક કરીને મોટેગાવકર સુધી પહોંચાડવામાં આવ્યા હતા. આ પ્રશ્નો હાથમાં આવ્યા બાદ મોટેગાવકરે પોતાની હસ્તાક્ષરમાં તેની અલગથી નોટ્સ પણ તૈયાર કરી લીધી હતી.
આરોપીના મોબાઇલમાંથી મળ્યા 132 સવાલોના પુરાવા
સીબીઆઈને આરોપી મોટેગાવકરના મોબાઈલ ફોનમાંથી અત્યંત મહત્ત્વના ડિજિટલ પુરાવા મળ્યા છે. તેના ફોનમાંથી કુલ 36 ફોટો મળી આવ્યા છે, જેમાં હાથેથી લખેલા કેમેસ્ટ્રીના 132 પ્રશ્નો હતા. સીબીઆઈની તપાસમાં બહાર આવ્યું છે કે આમાંથી 111 પ્રશ્નો NTA દ્વારા NEET (UG) માટે તૈયાર કરવામાં આવેલા માસ્ટર પ્રશ્નપત્ર સેટ સાથે હૂબહૂ મેચ થતા હતા.
પરીક્ષાના 10 દિવસ પહેલાં જ પ્રશ્નો ચોરાયા હતા
મોબાઈલના મેટાડેટા એનાલિસિસ (ડિજિટલ તપાસ) પરથી સાબિત થયું છે કે આ તમામ તસવીરો 3 મેના રોજ યોજાયેલી પરીક્ષાના આશરે 10 દિવસ પહેલાં જ ક્લિક કરવામાં આવી હતી. આ પ્રશ્નો મેળવવા માટે આપેલી ₹5 લાખની લાંચની રકમ પણ સીબીઆઈએ અન્ય એક આરોપી મનોજ ભગવાનરાવ શિરૂરેના ઠેકાણેથી રિકવર કરી લીધી છે.
અત્યાર સુધી 13 લોકોની ધરપકડ, પરીક્ષા ફરીથી લેવાઈ હતી
આ હાઈ-પ્રોફાઈલ પેપર લીક કેસમાં સીબીઆઈ દ્વારા અત્યાર સુધીમાં કુલ 13 આરોપીઓની ધરપકડ કરવામાં આવી છે અને તેઓ હાલ જેલમાં બંધ છે. ઉલ્લેખનીય છે કે 3 મેના રોજ લેવાયેલી આ પરીક્ષામાં દેશભરમાં ભારે હોબાળો મચ્યા બાદ, નેશનલ ટેસ્ટિંગ એજન્સી (NTA) દ્વારા 12 મેના રોજ પરીક્ષા રદ કરવામાં આવી હતી અને ત્યારબાદ 21 જૂને આ પરીક્ષા ફરીથી યોજાઈ હતી.
