India

પંજાબના પટિયાલામાં ધડાકાભેર લોખંડનો પુલ તૂટ્યો, બે ટ્રકો લટકી પડતાં અફરાતફરી

By GS Team
19 Nov 20262 mins read
TukuTouch Logo
પંજાબના પટિયાલા-સંગરુર માર્ગ પર નહેર પરનો લોખંડનો પુલ ગુરુવારે સવારે અચાનક ધરાશાયી થયો હતો. પુલ તૂટતા જ તેના પરથી પસાર થઈ રહેલી 2 ટ્રક નહેરમાં ખાબકી હતી અને તેમાં આગ લાગી હતી. તંત્ર દ્વારા તાત્કાલિક બચાવ કામગીરી શરૂ કરાઈ હતી. સદનસીબે, બંને ટ્રક ડ્રાઈવરોને સુરક્ષિત બચાવી લેવાયા છે અને કોઈ જાનહાનિ થઈ નથી. પુલની ગુણવત્તા પર સવાલો ઉઠ્યા છે.

Summarized by AI; it may make mistakes. Check important info

પંજાબના પટિયાલામાં ધડાકાભેર લોખંડનો પુલ તૂટ્યો, બે ટ્રકો લટકી પડતાં અફરાતફરી

Punjab Bridge Collapse: પંજાબના પટિયાલા-સંગરુર માર્ગ પર નહેર પર બનેલો લોખંડનો એક પુલ અચાનક ધરાશાયી થતા અફરાતફરી મચી ગઈ હતી. આ દુર્ઘટના ગુરુવારે સવારે બની હોવાનું જાણવા મળ્યું છે. અકસ્માત સમયે પુલ પરથી બે ટ્રક પસાર થઈ રહ્યા હતા, જે પુલ તૂટવાની સાથે જ નીચે નહેરમાં ખાબક્યા હતા. ઘટનાની જાણ થતા જ વહીવટી તંત્રની ટીમો અને ફાયર બ્રિગેડનો કાફલો તાત્કાલિક ઘટનાસ્થળે દોડી ગયો હતો અને રાહત તેમજ બચાવ કામગીરી શરૂ કરી હતી.

નહેરમાં લટકતા ટ્રકોમાં લાગી આગ

પુલ તૂટી પડતા જ બંને ટ્રક નહેરમાં ફસાઈને લટકી ગયા હતા અને દુર્ઘટના બાદ તેમાં ભીષણ આગ પણ ફાટી નીકળી હતી. ફાયર વિભાગની ગાડીઓ દ્વારા આગ પર કાબૂ મેળવવાના પ્રયાસો હાથ ધરવામાં આવ્યા છે. બીજી તરફ, તૂટેલા પુલના કાટમાળ ઉપરથી ભાખડા નહેરનું પાણી વહેવા લાગતા પરિસ્થિતિ વધુ ગંભીર બની હતી, જેને સંભાળવા માટે તંત્ર દ્વારા યુદ્ધના ધોરણે કામગીરી કરવામાં આવી રહી છે.

બંને ટ્રક ડ્રાઇવર સુરક્ષિત, વાહનવ્યવહાર ડાયવર્ટ કરાયો

રાહતની વાત એ છે કે બચાવ ટીમો દ્વારા બંને ટ્રક ડ્રાઇવરોનું સુરક્ષિત રીતે રેસ્ક્યુ કરી લેવામાં આવ્યું છે અને આ ઘટનામાં કોઈ જાનહાનિના સમાચાર નથી. સુરક્ષાના કારણોસર વહીવટી તંત્રએ પુલની બંને તરફ બેરિકેડિંગ લગાવીને આ માર્ગ પર વાહનોની અવરજવર સંપૂર્ણપણે બંધ કરી દીધી છે. મુસાફરોની સુવિધા માટે વાહનવ્યવહારને બીજી તરફના પુલ પરથી પસાર કરવાની વ્યવસ્થા ગોઠવવામાં આવી છે.

પુલની ગુણવત્તા અને ઓવરલોડ ટ્રક પર ઉઠ્યા સવાલ

મળતી માહિતી મુજબ, આ નેશનલ હાઇવે અને પુલનું નિર્માણ વર્ષ 2016ની આસપાસ કરવામાં આવ્યું હતું. સ્થાનિક સ્તરે અગાઉ પણ આ પુલમાં તિરાડો પડી હોવાની ફરિયાદો સામે આવી હતી, ત્યારે અચાનક પુલ તૂટી પડતા તેના બાંધકામ અને મજબૂતી પર ગંભીર સવાલો ઉઠી રહ્યા છે. આ ઉપરાંત, દુર્ઘટના સમયે પુલ પરથી પસાર થઈ રહેલા ટ્રકો ઓવરલોડ હોવાની પણ ચર્ચા છે, જે અંગે તંત્ર દ્વારા વધુ તપાસ હાથ ધરવામાં આવી છે.