8 ઈમેઇલ છતાં 97 નાગરિકોના મત કેમ છીનવાયા? ચૂંટણી પંચ સામે વિપક્ષ આક્રમક

Goa SIR voter deletion row: ગોવામાં 'સ્પેશિયલ ઇન્ટેન્સિવ રિવિઝન' (SIR) પ્રક્રિયા દરમિયાન અંતિમ મતદાર યાદીમાંથી 97 જેટલા મતદારોના નામ ગાયબ હોવાની ચોંકાવનારી વિગતો સામે આવી છે. ખાસ વાત એ છે કે સ્થાનિક ઇલેક્ટોરલ રજિસ્ટ્રેશન ઑફિસર્સ(EROs) દ્વારા ચકાસણી કરીને આ તમામ મતદારોને યોગ્ય અને લાયક જાહેર કરવામાં આવ્યા હતા, તેમ છતાં આખરી યાદીમાં તેમના નામનો સમાવેશ થયો ન હતો. આ ગરબડ પાછળ ECINet સિસ્ટમનું સેન્ટ્રલાઇઝ્ડ હોવાનું મુખ્ય કારણ હોવાનું સામે આવ્યું છે, જેના પર અગાઉ ચૂંટણી કમિશનરો સુખબીર સિંહ સંધુ અને વિવેક જોષીએ પણ વાંધો ઉઠાવ્યો હતો.

અંતિમ યાદી બહાર આવતા પહેલાં અનેક ઈમેઇલ મોકલવા છતાં કોઈ ઉકેલ આવ્યો નહીં

આ મામલાની વિગતવાર વાત કરીએ તો, 17 ફેબ્રુઆરી 2026ના રોજ ગોવામાં SIR અંતર્ગત આખરી યાદી બહાર આવવાની હતી, તેના ચાર દિવસ પહેલાં રાજ્યના મુખ્ય ચૂંટણી અધિકારી (CEO) સંજય ગોયલે દિલ્હી સ્થિત ચૂંટણી પંચને ઈમેઈલ લખ્યો હતો. આ અગાઉ તેઓ આવા સાત ઈમેઇલ મોકલી ચૂક્યા હતા. આ ઈમેઈલ સાથે 97 પાત્ર મતદારોની યાદી પણ જોડવામાં આવી હતી, જેમને સુપ્રીમ કોર્ટની પ્રક્રિયા મુજબ યોગ્ય ઠેરવવામાં આવ્યા હતા. CEOએ સ્પષ્ટ કર્યું હતું કે આ મતદારોના નામ રદ કરવાના નિર્ણયને બદલવો જરૂરી છે, જે દિલ્હી સ્થિત ECINet પોર્ટલ દ્વારા જ થઈ શકે તેમ હતું.

બીજા દિવસે કમિશનના ડેપ્યુટી ઇલેક્શન કમિશનરે આઈટી વિભાગના ડિરેક્ટર જનરલ સીમા ખન્નાને ઈમેઇલ લખીને જરૂરી કાર્યવાહી કરવા નિર્દેશ પણ આપ્યો હતો. જો કે 20 સપ્ટેમ્બર, 2026ના રોજ જ્યારે આખરી યાદી તપાસવામાં આવી ત્યારે તેમાં આ મતદારોના નામ નહોતા. CEO સંજય ગોયલે જણાવ્યું કે નામ હટાવવાનો નિર્ણય બાદમાં બદલવામાં આવ્યો હોવા છતાં સિસ્ટમમાં તેને પલટવાની (રોલબેક કરવાની) કોઈ સુવિધા ઉપલબ્ધ ન હોવાને કારણે આ સમસ્યા સર્જાઈ હતી.

કોંગ્રેસના ગંભીર આક્ષેપો અને રાજીનામાની માગ

કોંગ્રેસ નેતા જયરામ રમેશે દાવો કર્યો છે કે ચૂંટણી પ્રક્રિયા સાથે ગંભીર છેડછાડ કરવામાં આવી છે અને પક્ષે મુખ્ય ચૂંટણી કમિશનર જ્ઞાનેશ કુમારના રાજીનામાની ફરી માગ કરી છે. કોંગ્રેસ દ્વારા સોશિયલ મીડિયા પર આક્ષેપ કરાયો છે કે વડાપ્રધાનના ઇશારે આખી સિસ્ટમ પર કાબૂ મેળવીને કથિત રીતે 'વોટ ચોરી' જેવા કૃત્યો થઈ રહ્યા છે. આ ઉપરાંત, વરિષ્ઠ નેતા શશિ થરૂરે પણ આ ઘટનાને અત્યંત ગંભીર ગણાવતા જણાવ્યું હતું કે આ નાગરિકોના બંધારણીય અધિકારો છીનવી લેવા સમાન છે અને કમિશને આ માટે દેશની માફી માંગવી જોઈએ.

22 જાન્યુઆરીથી ઈમેઇલ કર્યા છતાં અધિકારીઓ તરફથી કોઈ પ્રતિક્રિયા નહીં

આ સમસ્યા અંગે 22 જાન્યુઆરીથી જ ફિલ્ડ સ્તરેથી વિનંતીઓ મોકલવામાં આવી રહી હતી. 13 ફેબ્રુઆરીથી લઈને 18 ફેબ્રુઆરી સુધી સતત 8 ઈમેઇલ મોકલીને રોલબેક અથવા ડેટા ફરીથી અપલોડ કરવાની સુવિધા માંગવામાં આવી હતી, પરંતુ તે તમામ ઈમેઇલના કોઈ જવાબ આવ્યા નહોતા અને ન તો કોઈ સંતોષકારક પગલાં લેવાયા હતા. અંતે, યાદીમાં નામ ન આવતા અધિકારીઓએ આ અસરગ્રસ્ત મતદારોને નવા મતદારો માટેના 'ફોર્મ 6' પર ફરીથી અરજી કરવા જણાવ્યું છે. આ સમગ્ર ઘટનાક્રમે ચૂંટણી પંચની કેન્દ્રીયકૃત કાર્યપ્રણાલી અને ટેકનિકલ વ્યવસ્થા સામે ગંભીર સવાલો ઊભા કર્યા છે.

ચૂંટણી કમિશનરો વચ્ચે મતભેદોનો દાવો

આ સમગ્ર વિવાદ એવા સમયે સામે આવ્યો છે જ્યારે અગાઉ એવા અહેવાલો આવ્યા હતા કે ચૂંટણી કમિશનર સુખબીર સિંહ સંધુ અને વિવેક જોષીએ મુખ્ય ચૂંટણી કમિશનર જ્ઞાનેશ કુમારના નેતૃત્વમાં લેવાયેલા નિર્ણયો સામે ઓછામાં ઓછા 14 વખત વાંધો ઉઠાવ્યો હતો. જોકે, ચૂંટણી કમિશને એક નિવેદન જાહેર કરીને સ્પષ્ટતા કરી છે કે કમિશનરો વચ્ચે સામાન્ય મતભેદો હોઈ શકે છે, પરંતુ SIR સહિતના તમામ નિર્ણયો સર્વાનુમતે લેવામાં આવ્યા હતા.