સિંહગઢ ફોર્ટ પર મુસ્લિમોને પ્રવેશ પર પ્રતિબંધના પોસ્ટરો

મુંબઈ: પુણે નજીકના સિંહગઢ ફોર્ટ પર મુસ્લિમોને પ્રવેશબંધી ફરમાવતું પોસ્ટર કોઈ લગાડી જતાં પુણે ગ્રામ્ય પોલીસે તપાસ શરુ કરી હતી.
વન વિભાગન અધિકારીઓના જણાવ્યા અનુસાર મરાઠી ભાષામાં પોસ્ટર લગાડાયું હતું. તેના પર 'આ ગઢ ફક્ત હિંદુઓનો છે, મુસ્લિમોએ અહીં પ્રવેશવું નહીં, એવું લખાણ લખાયું હતું. તેની નીચે, 'હુકમથી' એવો પણ નિર્દેશ કરી જાણે આ સત્તાવાર સૂચના હોય તેવી છાપ ઉભી કરવા પ્રયાસ કરાયો હતો.
અધિકારીઓના જણાવ્યા અનુસાર કિલ્લાના પ્રવેશદ્વાર પાસે જ એક જૂનાં બોર્ડ પર આ પોસ્ટર જોવા મળ્યું હતું. પાર્કિંગ એરિયા પાસે જ લગાવાયેલું આ પોસ્ટર કોઈ સરકારી એજન્સીએ નહિ લગાડયાની જાણ થયા બાદ તેને તરત જ દૂર કરાયું હતું.
પુણે ગ્રામ્ય પોલીસે જણાવ્યું હતું કે તેમને આ પોસ્ટર અંગે કોઈ ઔપચારિક ફરિયાદ મળી નથી. પરંતુ ,તેમણે સીસીટીવી ફૂટેજના આધારે આ પોસ્ટર કોણ મૂકી ગયું તેની તપાસ ચાલુ કરી છે. પોસ્ટર લગાડનારની ઓળખ કન્ફર્મ થશે પછી કાનૂની રાહે પગલાં લેવામાં આવશે.
આ પોસ્ટર સોશિયલ મીડિયામાં પણ વાયરલ થયું હતું.
ઉલ્લેખનીય છે કે પુણેથી ૨૮ કિમી દૂર આવેલો સિંહગઢ ફોર્ટ વન વિભાગ હસ્તક છે.