બોરીવલી સ્ટેશને ચાકુથી હુમલાના દોષિતને ૭ વર્ષની કેદ

સુરક્ષા અધિકારી પર હુમલો કર્યો હતો

 સુનાવણી દરમ્યાન સજાનો કાળ ભોગવી ચૂક્યો હોવાથી સજા પૂર્ણ

મુંબઈ -  માર્ચ ૨૦૧૯ માં રેલવે ફૂટબ્રિજ પર શંકાસ્પદ વર્તન બદલ ધરપકડ કરવાનો પ્રયાસ કરનાર રેલવે પોલીસ અધિકારી પર હુમલો કરવાના કેસમાં ઉત્તર પ્રદેશના ૨૬ વર્ષીય યુવકને સેશન્સ કોર્ટે દોષિત ઠેરવ્યો છે. કોર્ટે તેને સાત વર્ષની કેદની સજા ફટકારી છે, આ સજા તે ફરિયાદ પક્ષના પુરાવા સ્વીકાર્યા બાદ પહેલાથી જ ભોગવી ચૂક્યો છે.

 ફરિયાદ પક્ષના જણાવ્યા મુજબ મહારાષ્ટ્ર સુરક્ષા દળના ફરિયાદી સુમિત કરંડે ૧૪ માર્ચ, ૨૦૧૯ ના રોજ બોરીવલી રેલ્વે સ્ટેશન પર સાથી અજય મોરે સાથે ફરજ પર હતા ત્યારે તેમણે  સુશીલ યાદવને પ્લેટફોર્મ છ અને સાત પાસે શંકાસ્પદ વર્તન કરતા જોયો. તેની પૂછપરછ કર્યા પછી  યાદવ કથિત રીતે ભાગી ગયો હતો, પરંતુ કરંડેએ તેને પકડી લીધો અને મ્યુનિસિપલ કોર્પોરેશન ફૂટબ્રિજ દ્વારા બોરીવલી રેલ્વે પોલીસ સ્ટેશન લઈ જવાનું શરૃ કર્યું ત્યારે યાદવે કથિત રીતે છરી કાઢી અને કરંડે પર ચાકુ મારીને ભાગી ગયો હતો.

 તપાસકર્તાઓએ સીસીટીવી ફૂટેજ દ્વારા તેનો પીછો કર્યો અને બાદમાં તેનું નામ અને ફોન નંબર ધરાવતી ડાયરી મળી. આ વિગતોનો ઉપયોગ કરીને પોલીસે શોધી કાઢયું કે તેણે ૪ એપ્રિલ, ૨૦૧૯ ના રોજ એક મહિલા પર હુમલો કર્યો હતો, અને તેના પર ઘરેલુ વિવાદને કારણે તેની કાકી પર હુમલો કરવાનો પણ આરોપ હતો. આ કેસ જોગેશ્વરી પોલીસ સ્ટેશનમાં નોંધવામાં આવ્યો હતો. બાદમાં તેની તેના વતનથી ધરપકડ કરવામાં આવી હતી.

ટ્રાયલ દરમિયાન, ફરિયાદ પક્ષે કરંડે, મેડિકલ ઓફિસર, યાદવના કાકા અને અન્ય સાક્ષીઓની પૂછપરછ કરી. ફરિયાદ પક્ષે દલીલ કરી હતી કે યાદવ તેના કાકાને મારવા માટે દિલ્હીથી મુંબઈ આવ્યો હતો. તેમણે વધુમાં દાવો કર્યો હતો કે તેણે પોલીસ અધિકારી પર હુમલો કર્યો હતો અને પછી તેના કાકાને કેસમાં ફસાવવાની ધમકી આપી હતી અને ત્યારબાદ તેની કાકી પર હુમલો કર્યો હતો. કોર્ટે ફરિયાદ પક્ષનો કેસ સ્વીકાર્યો અને યાદવને દોષિત ઠેરવ્યો હતો. સજા પૂર્ણ થઈ ગઈ છે કારણ કે તે સુનાવણી દરમ્યાન સજા ભોગવી ચૂક્યો છે.