મુલુંડથી ગ્રીન કોરિડોર રચી ધબકતું હૃદય પરેલ પહોંચાડાયું

નવી મુંબઈના ૨૨ વર્ષના યુવકને જીવતદાન

મુંબઈની આશરે ૧૦૦ વર્ષ જૂની બાળકો માટેની હોસ્પિટલમાં પહેલીવાર હાર્ટ ટ્રાન્સપ્લાન્ટ

મુંબઈ -  પરેલની બાઇ જરબાઈ વાડિયા હોસ્પિટલ ફોર ચિલ્ડ્રનમાં પહેલી જ વાર એક તરુણનું હાર્ટ-ટ્રાન્સપ્લાન્ટ ઓપરેશન કરીને તેને નવું જીવન આપવામાં આવ્યું હતું. મુલુંડની હોસ્પિટલમાં એક ૨૨ વર્ષના બ્રેનડેડ યુવકનું હૃદય કાઢીને સ્પેશ્યલ એમ્બ્યુલન્સમાં ફક્ત ૨૫ મિનિટમાં ૨૩.૯ કિ.મી.ના અંતેર આવેલી વાડિયા હોસ્પિટલમાં પહોંચાડવામાં આવ્યું હતું. એમ્બ્યુલન્સ ટ્રાફિકના કોઈ પણ અવરોધ વગર સડસડાટ પહોંચી શકે માટે ગ્રીન કોરિડોર રચવામાં આવ્યો હતો.

બાઈ જરબાઈ વ ાડિયા હોસ્પિટલ ફોર ચિલ્ડ્રન મુંબઈની પહેલી જ બાળકોની સાર્વજનિક હોસ્પિટલ છે જ્યાં હાર્ટ-ટ્રાન્સપ્લાન્ટ ઓપરેશન સફળતાપૂર્વક પાર પાડીને ટીનએજરને નવજીવન બક્ષવામાં આવ્યું હતું.

નવી મુંબઈના ઘણસોલીનો રહેવાસી તન્મય શિંદે (ઉં. વ. ૧૭) હૃદયની અત્યંત ગંભીર બીમારી (ડાઇલેટેડ કાર્ડિયોમાયોપથી)થી પીડાતો હતો. પહેલાં તેને વાશીની હોસ્પિટલમાં દાખલ કરવામાં આવ્યો હતો. ત્યાં પાંચ દિવસ રાખવામાં આવ્યા પછી રજા આપવામાં આવી હતી. ત્યાર બાદ અઠવાડિયામાં તેની તબિયત બગડી હતી અને શ્વાસ રુંધાવા લાગ્યો હતો, છાતીમાં દુઃખાવો ઉપડયો હતો અને તબિયત ઝડપથી કથળવા માંડતા વાડિયા હોસ્પિટલમાં દાખલ કરવામાં આવ્યો હતો. તેનો જીવ બચી જાય એ માટે હૃદયના પ્રત્યારોપણ સિવાય બીજો કોઈ વિકલ્પ નહોતો રહ્યો. એટલે હાર્ટ-ડોનર માટે તલાશ શરૃ કરવામાં આવી હતી. થોડા દિવસ પછી મુલુંડની હોસ્પિટલમાં ૨૨ વર્ષના એક બ્રેનડેડ પેશન્ટની જાણકારી મળી હતી. તરત જ તેના પરિવારને હાર્ટ ડોનેટ કરવા માટે તૈયાર કરવામાં આવ્યા હતા. પરિવારજનોએ મંજૂરી આપ્યા બાદ બ્રેનડેડ પેશન્ટના શરીરમાંથી હૃદય કાઢીને ગણતરીની મિનિટોમાં પરેલની બાળકો માટેની હોસ્પિટલમાં પહોંચાડવામાં આવ્યું હતું. આમ બ્રેનડેડ યુવકના હાર્ટની મદદતી ટીનએજરને નવું જીવન મળ્યું હતું.