પાંચ સ્કૂલોના વાલીઓએ એફઆરસી સમક્ષ ફી વધારાનો વિરોધ કર્યો

વડોદરાઃ એેફઆરસી દ્વારા વધુ ત્રણ વર્ષ માટે સ્કૂલોની ફી જાહેર થઈ રહી છે અને તેમાં વડોદરા શહેરની કેટલીક સ્કૂલોની ફીમાં વધારો કરાયો છે.આ સંજોગોમાં વાલીઓનો અસંતોષ સપાટી પર આવી રહ્યો છે.

આજે શહેરની પાંચ સ્કૂલો સામે આજે વાલીઓનો એક મોરચો ડીઈઓ કચેરીના કેમ્પસમાં આવેલી એફઆરસી( ફી રેગ્યુલેશન કમિટિ)ની ઓફિસ ખાતે રજૂઆત કરવા માટે પહોંચ્યો હતો.તેમની સાથે વડોદરા વાલી મંડળના સભ્યો પણ જોડાયા હતા.વાલીઓનુ કહેવુ હતુ કે, બે વર્ષથી કોરોનાના કારણે ઘરના બજેટ ખોરવાઈ ગયા છે અને મોંઘવારી વધી ગઈ છે છતા પણ એફઆરસી દ્વારા આ સ્કૂલોની ફીમાં ૨૫ થી ૩૦ ટકાનો વધારો કરી આપવામાં આવ્યો છે.

દરમિયાન વાલી મંડળના હોદ્દેદાર દિપક ઠક્કરનુ કહેવુ હતુ કે, જે સ્કૂલના વાલીઓ આજે એફઆરસીના નિર્ણય સામે રજૂઆત કરવા માટે આવ્યા હતા તે પૈકી ડીપીએસની ફી ૪૬૦૦૦ રુપિયાથી વધારીને ૬૩૦૦૦ રુપિયા કરવામાં આવી છે.જોકે આ વચગાળાનો હુકમ છે અને તેની સામે  સ્કૂલે અપીલ કરી છે.ઉત્કર્ષ સ્કૂલની ફી ૧૮૦૦૦ રુપિયાથી વધારીને ૨૪૦૦૦  રુપિયા કરી  આપવામાં આવી છે.સંત કબીર સ્કૂલની ફી ૪૧૦૦૦ રુપિયા હતી.જે એફઆરસીએ વધારીને ૫૧૦૦૦ રુપિયા કરી આપી છે.અક્ષર પબ્લિક સ્કૂલની ફી ૧૬૦૦૦થી વધારીને ૨૫૦૦૦ રુપિયા કરવામાં આવી છે.

વાલી મંડળનુ કહેવુ હતુ કે, આ ઉપરાંત જીપીએસ સ્કૂલના સત્તાધીશો એફઆરસીએ જે ફી નક્કી કરી છે તેના કરતા વધારે ફી લઈ રહ્યા છે.જોકે તેની સામે પણ એફઆરસી દ્વારા કોઈ કાર્યવાહી કરવામાં આવી નથી.