કેટલીક સ્કૂલોએ લેટ ફી ઉઘરાવી પણ કોઈ પગલા નહી

અમદાવાદ

અમદાવાદ શહેર અને ગ્રામ્યની ઘણી મોટી સ્કૂલોએ કોરોનાકાળમાં સરકારનો આદેશ છતાં પણ લેટ ફી વાલીઓ પાસેથી ઉઘરાવી છે પરંતુ આ સ્કૂલો સામે કોઈ પગલા લેવાયા નથી.જેને લઈને વાલીઓમાં રોષ ફેલાયો છે.

ડીપીએસ સ્કૂલના કેટલાક વાલીઓએ લેટ ફી બાબતે ફરિયાદ કરતા ફી રેગ્યુલેશન કમિટીએ અમદાવાદ ગ્રામ્ય ડીઈઓને તપાસ કરવા જણાવ્યુ હતુ ંત્યારબાદ ડીઈઓ દ્વારા તપાસ કરીને અહેવાલ પણ ફી કમિટીને મોકલી દેવાયો છે.જેમાં ડીઈઓએ ફી કમિટીને જણાવ્યું હતું કે ડીપીએસ-બોપલ સ્કૂલ દ્વારા વાલીઓ પાસેથી લેટ ફી લેવામા આવી હતી. જેથી આ સ્કૂલ સામે શિક્ષાત્મક કાર્યવાહી કરવામા આવે. વાલી મંડળ દ્વારા ડીપીએસ સ્કૂલે લેટ ફી લીધી હોવાની અને ૧૦ ટકા ફી વધારો કર્યો હોવાની ફરિયાદ પણ કરી હતી.

વાલી મંડળની માંગ છે કે ગેરકાયદેસર લેવાયેલી લેટ ફી  વાલીઓને પરત કરવામા આવે અને ૧૦ લાખનો દંડ સ્કૂલને કરવામા આવે. આ ઉપરાંત અમદાવાદ ગ્રામ્ય ડીઈઓ દ્વારા યુરો સ્કૂલ સામેની ફી મુદ્દેની ફરિયાદના કેસમાં પણ ડીઈઓએ ફી કમિટીને સ્કૂલ સામે પગલા લઈને પાંચ લાખનો દંડ કરવાની  ભલામણ કરી હતી.આ ઉપરાંત અન્ય કેટલીક મોટી સ્કૂલો દ્વારા પણ લેટ ફી લેવામા આવી છે અને બાબતે પણ ફરિયાદો થઈ છે.હજુ સુધી ફી કમિટી દ્વારા લેટ ફી બાબતે કોઈ સ્કૂલ સામે પગલા લેવાયા નથી.જેથી વાલીઓમાં ભારે રોષ ફેલાયો છે.