ફાયર ઓફિસર મહેશ મોડે બિલ્ડરો પર દબાણ કરી ચોક્કસ કંપનીને મોટાપાયે કામ અપાવ્યુ હતું

નવી બની રહેલી બિલ્ડીંગ હંમેશા ટાર્ગેટમાં રહેતી હતી

અપ્રમાણસર મિલકતોની અરજીની તપાસમાં વડોદરાની કંપની સાથે ફાયર ઓફિસરના કનેકશનની તપાસ થશે

ઉપરોક્ત મુદ્દાને અપ્રમાણસર મિલકતના કેસની તપાસમાં ઉમેરવામા આવ્યો છે અને તે દિશામાં માહિતી એકત્ર કરવામાં આવી રહી છે. જેમાં આગામી દિવસોમાં મોટા ઘટસ્ફોટ થવાની શક્યતા છે.ગાંધીનગર ફાયરબ્રિગેડના રીજનલ ફાયર ઓફિસર મહેશ મોડ અને તેમના સાળા કમલદાન ગઢવીને રૃપિયા પાંચ લાખની લાંચ કેસમાં ધરપકડ બાદ એસીબીને એક વિગતો મળી રહી છે. જેમાં મહેશ મોડ અને તેમના મળતિયા કમલદાન ગઢવીએ ફાયર સેફ્ટીના સાધનો બનાવતી તેમના નજીકના સગાની કંપનીને ફાયદો કરાવવા માટે નેટવર્ક બનાવ્યું હતું. જેમાં ગાંધીનગરમાં બનતી નવી રેસીડેન્સીયલ અને કોમર્શિયલ સ્કીમ તેમનો ટારગેટ રહેતી હતી. પ્રિ ફાયર એનઓસી માટે આવતા બિલ્ડરને વડોદરાની કંપનીને જ તેમની સ્કીમ માટે ફાયર સેફ્ટીના સાધનો વસાવવા માટે ફરજ પાડવામાં આવતી હતી અને જો કોઇ તેમની વાત સાથે સહમત ન થાય તો લાંચની રકમ વધી જતી હતી. મહેશ મોડ વડોદરાની કંપનીના કોન્ટ્રાક્ટમાં તગડુ કમિશન લઇ લેતા હતા. એસીબીની ટ્રેપ બાદ કેટલાંક બિલ્ડરોએ મહેશ મોડ અને કમલદાન દ્વારા લાંચ માંગવામાં આવી હોવાનો અને વડોદરાની કંપનીને ફાયદો કરાવવા માટે ઓફર કરાયાની વિગતો એસીબીને પુરી પાડી છે.

જે અંગે ચોક્કસ માહિતી અને પુરાવા એકત્ર કરીને અપ્રમાણસર મિલકતોના કેસમાં તેની તપાસને લેવામાં આવશે. આ સાથે મહેશ મોડ વતી કમલદાન ગઢવીએ તેમના સગાના નામે કચ્છ અને સૌરાષ્ટ્રમાં રોકાણ કરાયુ હોવાનું ઉપરાંત, ગોલ્ડમાં સૌથી વધારે નાણાં રોક્યાની વિગતો પણ એસીબીને મળી છે. આમ, માત્ર લાંચ કેસ જ નહી પણ અપ્રમાણસર મિલકતોને મામલે પણ એસીબી ગાળિયો મજબુત કરશે.