કિવમાં ફાયરિંગ અને બોંબ ધડાકા વચ્ચે 6 ગુજરાતી યુવકો પોલેન્ડ બોર્ડર ચાલતા ચાલતા નિકળ્યાં

કિવમાં કટોકટીભરી સ્થિતિ : હોટલો ઉપર રશિયન આર્મીનો કબજો  ચારે તરફ બોમ્બ ધડાકાના અવાજો સંભળાય છે : રીચર્ડ મેકવાન

ખેડા જિલ્લાના તાલુકા મથક સેવાલીયાના રીચર્ડ ફિલીપ્સ મેકવાન (મેપલ) છ મહિના પહેલાં જ વર્કપરમીટ ઉપર યુક્રેન ગયા હતા. તેઓ કિવથી પસાચ કિલોમીટર દૂર આવેલ સુલ્યવસ્કામાં નોકરી કરતા હતા.  ઇન્ડિયા આવવા માટે તેમને ૨પમી તારીખની પ્લેન ટીકીટ પણ મળી હતી. પરંતુ એ પહેલા જ કિવ એરપોર્ટ બોંબથી ઉડી ગયું તેથી રિચાર્ડ મેપલ આ લખાય છે ત્યારે રોડ મારફતે લ્વીવ જવા નીકળ્યા છે. એમની સાથે ગામડી ગામના ઓમ પટેલ, તથા આણંદના પણ અન્ય વિદ્યાર્થીઓ છે. તેઓ ટેલિફોનિક વાતચીતમાં જણાવે છે કે આખા રોડ ઉપર ટ્રાફિક જામ છે. કંન્ડીશન ખૂબ ક્રિટીકલ છે. અમે રહેતા હતા એ હોટલ ઉપર રશિયન આર્મીએ કબજો કરી લીધો છે. ગોળીબાર અને બોંબ ધડાકા વચ્ચે નાનકડી બેગમાં સામાન ભરીને અમે દોડયા છીએ. અમારે બેગ, કપડા, કરિયાણું, બ્લેન્કેટ બધું જ ફેંકી દેવું પડયું છે. અમારી પાસે માત્ર ખભે લટકાયેલી નાનકડી બેગ અને પાણી છે. બે ચાર જોડી કપડા અને પાસપોર્ટ છે. લ્વીવ પહોંચીને ત્યાંથી રપ કિલોમીટર દૂર આવેલી પોલેન્ડની બોર્ડર ઉપર અમારે ચાલતા જવાનું છે. પોલેન્ડ સરકારે બોર્ડરો ખોલી નાંખી છે. પણ અત્યારે અમે રસ્તામાં જઇ રહ્યા છીએ ત્યારે પણ ચારેબાજુ બોંબ ધડાકા અને ગોળીબારો થઇ રહ્યા છે. 

હમણાં જ એટલે કે સાંજના 5 વાગ્યાના સુમારે યુક્રેન રેેડિયો ઉપર જાહેરાત થઇ છે કે અમેરિકા અને નાટો સૈન્ય યુક્રેનની મદદે આવી પહોંચ્યું છે. 

તેથી કદાચ એ આર્મીવાળાઓ અમને હેમખેમ પોલેન્ડ પહોંચાડશે તેવી આશા જાગી છે. મારી સાથે ગામડીનો ઓમ પટેલ, તથા અન્ય પાંચ-છ ગુજરાતી યુવકો પણ નીકળ્યા છે.