શહેરના તરસાલી બાયપાસ ખાતે બિલ્ડરની સાઇટ પર પાર્ક કરેલી બિલ્ડરની કારનો કાચ તોડી અજાણ્યા તસ્કરો રોકડા રૃા. ૯.૧૮ લાખ સહિત અગત્યના દસ્તાવેજો ભરેલી બેગ ચોરી ફરાર થઈ ગયા છે. સાઇટ પર લાગેલા સીસીટીવી કેમેરામાં સમગ્ર ઘટના કેદ થઈ છે. ફરિયાદના આધારે કપુરાઈ પોલીસે ગુનો નોંધ્યો છે.

ફરિયાદ મુજબ, શહેરના માંજલપુર વિસ્તારમાં રહેતા જીગરકુમાર વાળંદ રામનાથ ગુ્રપ કન્સ્ટ્રક્શન કંપની ધરાવે છે. તેઓ ૨૩ જુલાઈના રોજ પોતાની સ્કોર્પિયો કાર લઈને ઘરેથી નીકળ્યા હતા. નવું મકાન ખરીદવાનું હોવાથી તેઓ ઘરેથી રૃ. ૮ લાખ રોકડા લઈને નીકળ્યા હતા. ત્યારબાદ વાઘોડિયા રોડ પર આવેલી સાઇટ પરથી કંપનીના સભ્ય પાસેથી વધુ રૃા. ૧.૧૮ લાખ રોકડા લીધા હતા.

ત્યારબાદ તેઓ તરસાલી બાયપાસ ખાતેની રામનાથ હાર્મોની સાઇટ પર પહોંચ્યા હતા. રોકડ રકમ તથા અન્ય દસ્તાવેજો ભરેલી બેગ કારમાં રાખી હતી. બપોરે આશરે ૩.૪૫ વાગ્યે ઘરે જવા માટે પરત ફરતા તેમણે જોયું કે કારની ડ્રાઇવર સાઇડનો પાછળનો કાચ તૂટેલો હતો અને કારમાં રાખેલી બેગ ગાયબ હતી.

સાઇટના સીસીટીવી ફૂટેજ તપાસતાં બપોરે આશરે ૩ વાગ્યાના અરસામાં નંબર પ્લેટ વગરની બાઈક પર આવેલા બે અજાણ્યા શખ્સોએ કારનો કાચ તોડી બેગની ચોરી કરી ફરાર થઈ ગયા હોવાનું સામે આવ્યું હતું. ચોરી થયેલી બેગમાં રૃ. ૯.૧૮ લાખ રોકડા ઉપરાંત ચેકબુક, પાનકાર્ડ સહિતના અગત્યના દસ્તાવેજો હતા.

ડીસીબી, એલસીબી, સ્થાનિક પોલીસની ટીમો આરોપીઓને ઝડપી પાડવા કામે લાગી છે.