| AI IMAGE |
Premature White Beard Causes: આજકાલ નાની ઉંમરે વાળ અને દાઢી સફેદ થવા એ ખૂબ જ સામાન્ય સમસ્યા બની ગઈ છે. ખાસ કરીને 25 થી 30 વર્ષના યુવાનોમાં દાઢીના વાળ સફેદ થવાનું પ્રમાણ ઝડપથી વધી રહ્યું છે. ચહેરો આકર્ષક દેખાડવામાં દાઢી મહત્વનો ભાગ ભજવે છે, પરંતુ કાળી દાઢીની વચ્ચે જ્યારે સફેદ વાળ ડોકિયું કરવા લાગે છે ત્યારે તે માત્ર લુકને જ ખરાબ નથી કરતું, પરંતુ યુવાનોનો આત્મવિશ્વાસ પણ ઘટાડે છે. હેલ્થ એક્સપર્ટ્સના મતે, આ સમસ્યા પાછળ જીનેટિક્સ, મેડિકલ અને આપણી ખરાબ લાઈફસ્ટાઈલ જેવા ઘણા કારણો જવાબદાર હોઈ શકે છે, જેને સમય રહેતા ઓળખીને સુધારવા ખૂબ જ જરૂરી છે.
શા માટે નાની ઉંમરે સફેદ થાય છે દાઢી-વાળ?
મેલેનિનની ઉણપ અને જીનેટિક્સ: રિપોર્ટ અનુસાર, આપણી ત્વચા અને વાળને કુદરતી કાળો રંગ આપવાનું કામ મેલેનિન (Melanin) નામનું પિગમેન્ટ કરે છે. જ્યારે શરીરમાં મેલેનિનનું ઉત્પાદન ઘટી જાય છે, ત્યારે વાળ પોતાનો અસલી રંગ ગુમાવીને સફેદ થવા લાગે છે. આ સિવાય જો પરિવારમાં માતા-પિતા કે દાદા-દાદીને નાની ઉંમરે વાળ સફેદ થવાની સમસ્યા રહી હોય, તો આનુવંશિકતાના કારણે યુવાનોમાં આ સમસ્યા થઈ શકે છે.
માનસિક તણાવ : આજની ભાગદોડ ભરી જિંદગીમાં વર્ક પ્રેશર અને પર્સનલ લાઈફનો તણાવ સીધો આપણા શરીર પર અસર કરે છે. જ્યારે કોઈ વ્યક્તિ સતત તણાવમાં રહે છે, ત્યારે શરીરમાં નોરપીનેફ્રાઈન નામનું કેમિકલ રીલીઝ થાય છે. આ કેમિકલ વાળનો રંગ જાળવી રાખતી સ્ટેમ સેલ્સને નુકસાન પહોંચાડે છે. પૂરતી ઊંઘ ન લેવી અને ફિઝિકલ એક્ટિવિટી ન કરવાથી આ સમસ્યા વધુ વકરે છે.
વિટામિન્સની ઉણપ અને સ્મોકિંગ: શરીરમાં જરૂરી પોષક તત્વો જેવા કે વિટામિન B12, વિટામિન D3, આયર્ન અને કોપરની ઉણપથી હેર ફોલિકલ્સ નબળા પડે છે અને મેલેનિનનું સ્તર ઘટી જાય છે. ખાસ કરીને જે લોકો શાકાહારી આહાર લે છે, તેમનામાં વિટામિન B12 ની ઉણપ વધુ જોવા મળે છે. આ ઉપરાંત, સિગારેટ પીવાની આદત પણ દાઢીના વાળને અકાળે સફેદ કરવા માટે મોટી અંશે જવાબદાર છે.
આ સમસ્યાથી બચવા લાઈફસ્ટાઈલમાં કરો આ સુધારો
જો તમે 25-30 વર્ષની ઉંમરે આ સમસ્યાનો સામનો કરી રહ્યા છો, તો આજથી જ તમારી આદતો અને ડાયેટમાં ફેરફાર કરો. પૌષ્ટિક આહાર લેવો જોઇએ જેમ કે, ખાવામાં લીલા પાંદડાવાળા શાકભાજી, સૂકો મેવો, ઈંડા અને ડેરી પ્રોડક્ટ્સ (દૂધ, દહીં, પનીર) સામેલ કરો જેથી વિટામિન્સની ઉણપ પૂરી થઈ શકે.
તણાવ મુક્ત રહો ખાસ કરીને સ્ટ્રેસ ઓછો કરવા માટે નિયમિત યોગ અથવા મેડિટેશન કરો. આ સાથે જ દરરોજ 7 થી 8 કલાકની સારી ઊંઘ લેવી ખૂબ જ જરૂરી છે.
વ્યસનોથી દૂર રહો ખાસ કરીને સિગારેટ અને તમાકુ જેવી હાનિકારક આદતોથી સંપૂર્ણ અંતર જાળવી લો.
કેમિકલ પ્રોડક્ટ્સનો ઉપયોગ ટાળો ખાસ કરીને દાઢી પર કેમિકલવાળા બ્યુટી પ્રોડક્ટ્સ અથવા હલકી ગુણવત્તાવાળા હેર કલર લગાવવાનું ટાળો, કારણ કે તે વાળના મૂળને હંમેશા માટે ડેમેજ કરી શકે છે.
