ખેડા: ભારે વરસાદથી 36 કલાકથી વીજ પુરવઠો ખોરવાયો, વીજ પોલ ધરાશાયી થતાં 910થી વધુ નાના-મોટા ઉદ્યોગો પ્રભાવિત

Kheda Rain Damage: ખેડા જિલ્લાના ગોબલજ ડિવિઝનમાં છેલ્લા 36 કલાકથી ભારે વરસાદના કારણે વીજ પુરવઠો ખોરવાઈ ગયો છે. સતત વરસાદ અને પાણી ભરાવાની સ્થિતિને કારણે વીજ પોલ ધરાશાયી થતાં યુજીવીસીએલના 11 KV ઝવેરી ઇન્ડસ્ટ્રી ફિડર પર વીજ પુરવઠો બંધ થયો છે.

ખેડામાં ભારે વરસાદથી 36 કલાકથી વીજ પુરવઠો ખોરવાયો

મળતી માહિતી મુજબ, આ ફિડર 66 KV બીડજ સબસ્ટેશનમાંથી સંચાલિત થાય છે, અને તેના પર 10 મોટા તેમજ અંદાજે 900 નાના ઉદ્યોગો નિર્ભર છે. વીજ પુરવઠો ખોરવાતા ઔદ્યોગિક એકમોના ઉત્પાદન અને દૈનિક કામગીરી પર અસર પડી છે.

વીજ પુરવઠો વહેલી તકે પૂર્વવત કરવા માટે યુજીવીસીએલના અધિકારીઓ અને કર્મચારીઓ સતત કામગીરી કરી રહ્યા છે.

પાણી ભરાતા કામગીરીમાં અડચણ

જોકે, અસરગ્રસ્ત વિસ્તારમાં ઊંડા પાણી ભરાયેલા હોવાથી સમારકામમાં મુશ્કેલી પડી રહી છે. આવી સ્થિતિમાં ખેડા નગરપાલિકાની બોટની મદદથી વીજ લાઇન અને પોલના સમારકામની કામગીરી હાથ ધરવામાં આવી રહી છે.

સમારકામ દરમિયાન કોઈ અનિચ્છનીય ઘટના ન બને તે માટે એમ. એ. ત્રિવેદી (એક્ઝિક્યુટિવ એન્જિનિયર) અને કે. એમ. પરમાર (નાયબ ઈજનેર, ગોબલજ ફીડર) સ્થળ પર હાજર રહી કામગીરીની દેખરેખ રાખી રહ્યા છે.