જામનગર મહાનગર પાલિકાના શાસકપક્ષના કેટલાક કોર્પોરેટરો માનદ્ વેતન વધારવા મુખ્યમંત્રીને રજૂઆત કરશે

Jamnagar Corporation : જામનગર મહાનગરપાલિકાના ભાજપના કેટલાક કોર્પોરેટરો દ્વારા પોતાને મળતા માનદ્ વેતન-ભથ્થામાં વધારો કરવાની માંગણી ઉઠાવવામાં આવી છે. આ અંગે આગામી દિવસોમાં રાજ્યના મુખ્યમંત્રી સમક્ષ રજૂઆત કરવાની તૈયારીઓ ચાલી રહી છે.
હાલ જામનગર મહાનગરપાલિકાના કોર્પોરેટરોને પ્રતિ માસ આશરે રૂા.10,000 માનદ્ વેતન-ભથ્થું આપવામાં આવે છે. જોકે, છેલ્લા આશરે આઠ વર્ષથી આ રકમમાં વધારો થયો ન હોવાનું જણાવી કોર્પોરેટરો દ્વારા તેમાં વધારો કરવાની માંગણી કરવામાં આવી રહી છે.
ભાજપના એક કોર્પોરેટરના જણાવ્યા મુજબ, ‘મહિને રૂા. 8થી 9 હજાર તો માત્ર બાઈકના પેટ્રોલ પાછળ જ ખર્ચાઈ જાય છે. આ ઉપરાંત કોર્પોરેટર તરીકેના જાહેર કામો દરમિયાન અન્ય ખર્ચાઓ પણ થતા રહે છે. તમામ કોર્પોરેટરો આર્થિક રીતે સદ્ધર હોય તેવું પણ નથી. તેથી હાલનું માનદ્ વેતન ખૂબ જ ઓછું છે.’
આ મુદ્દે શાસકપક્ષના કેટલાક કોર્પોરેટરો એકત્ર થઈ આગામી દિવસોમાં મુખ્યમંત્રી સમક્ષ રજૂઆત કરીને માનદ્ વેતનમાં યોગ્ય વધારો કરવાની માંગણી કરશે. આ રજૂઆતમાં અનેક કોર્પોરેટરો જોડાય તેવી શક્યતા છે.