જામજોધપુર પાસે માર્ગ પર પડેલું વિશાળ વૃક્ષ રાહદારીઓએ હટાવ્યું : માનવ એકતાનું ઉત્તમ ઉદાહરણ

Jamnagar : જામજોધપુર નજીક જામવાળી–બાલવા રોડ પર આજે સવારે આશરે 8 વાગ્યાના સમયે અચાનક એક વિશાળ વૃક્ષ રસ્તાની વચ્ચે ધરાશાયી થતાં વાહનવ્યવહાર ખોરવાઈ ગયો હતો, અને બંને તરફ વાહનોની લાંબી કતારો લાગી ગઈ હતી.
આ દરમિયાન ત્યાંથી પસાર થતા વાહનચાલકો, રાહદારીઓ અને સ્થાનિક લોકોએ કોઈ સરકારી તંત્રની રાહ જોયા વગર સ્વયં આગળ આવી માનવતા અને સામાજિક જવાબદારીનું ઉત્તમ ઉદાહરણ પૂરું પાડ્યું હતું. સૌએ સાથે મળીને જાતમહેનતથી રસ્તા પર આડું પડેલું વિશાળ વૃક્ષ એક બાજુ ખસેડવા ભારે જહેમત ઉઠાવી હતી.
થોડા સમયની મહેનત બાદ વૃક્ષને રસ્તા પરથી હટાવવામાં સફળતા મળતાં વાહનવ્યવહાર ફરી પૂર્વવત થયો હતો. આ પ્રસંગે કોઈ જાતિ, ધર્મ કે ઓળખનો ભેદ રાખ્યા વિના સૌએ એકજૂથ બની કરેલા સહયોગે સાચા અર્થમાં "માનવ એકતા જ મહાન શક્તિ છે" તેવો સંદેશ સમાજને આપ્યો હતો.