જામનગરના ગુલાબનગર વિસ્તારમાં રહેતા યુવક પર ધારિયાથી જીવલેણ હુમલો

Jamnagar Crime : જામનગર શહેરના ગુલાબનગર રાજપાર્ક વિસ્તારમાં અંગત અદાવતમાં એક શખ્સે યુવક ઉપર ધારિયા જેવા તીક્ષ્ણ હથિયારથી હુમલો કરતા ચકચાર મચી ગઇ હતી. હુમલામાં યુવકને શરીરના જુદા જુદા ભાગે ઇજાઓ પહોંચી હતી, જ્યારે વચ્ચે પડેલા એક સાક્ષીને પણ ઇજા થતાં તેને સારવાર માટે ખસેડવામાં આવ્યો હતો.
પોલીસના જણાવ્યા મુજબ, ગુલાબનગર રાજપાર્ક વિસ્તારમાં રહેતા ઇસ્માઇલ કાસમભાઇ સિપાઇએ ફરિયાદી સાથે બોલાચાલી કર્યા બાદ ધારિયા વડે હુમલો કર્યો હતો. હુમલામાં ફરિયાદીને ઇજાઓ પહોંચી હતી. દરમિયાન ઘટનાના સાક્ષી બનેલા વ્યક્તિને પણ ઇજા થતાં તેને ટાંકા લેવાની ફરજ પડી હતી.
આ અંગે સીટી-બી ડિવિઝન પોલીસ મથકમાં ઇસ્માઇલ કાસમભાઇ સિપાઇ સામે ભારતીય ન્યાય સંહિતાની કલમ 118(1), 352 તથા જી.પી. એક્ટની કલમ 135(1) મુજબ ગુનો નોંધવામાં આવ્યો છે. પોલીસે બનાવ અંગે વધુ તપાસ હાથ ધરી છે.