જામનગરમાં રણજીત સાગર રોડ પર એક કાર કેનાલમાં ખાબકી: કારની બાજુમાંથી દારૂ અને કેક ની સામગ્રી મળી આવતા અનેકવિધ ચર્ચા

જામનગર, તા. 03

જામનગર માં રણજીત સાગર રોડ પર આર્મીના ગેઇટની બાજુમાં આવેલી કેનાલમાં એક કાર ખાબકી ગઈ હતી, અને કારને નુકસાન થયું છે. ઉપરાંત કાર ની બાજુ માંથી ઇંગ્લિશ દારૂ તથા કેક વગેરે મળી આવ્યા હોવાથી અનેકવિધ ચર્ચાઓ ચાલી રહી છે, અને પોલીસે કાર તથા અન્ય સામગ્રી કબજે કરી લઇ વિશેષ તપાસ આરંભી છે.

જામનગરના રણજીતસાગર રોડ પર આર્મી ગેઇટની બાજુમાં આવેલી તળાવના પાણી માટેની કેનાલ માંથી આજે વહેલી સવારે જીજે-1 એચ.એમ 4129 નંબરની કાર ખાબકી ગયેલી અવસ્થામાં નજરે પડી હતી. જે અંગેની જાણકારી થતાં સીટી એ ડીવીઝન પોલીસનો કાફલો ઘટનાસ્થળે દોડી ગયો હતો.

ઉપરોક્ત સ્થળેથી પસાર થનારી વ્યક્તિઓએ કાર ની બાજુમાં ઈંગ્લીશ દારૂની બાટલી તથા કેક સહિતની સામગ્રીને નિહાળી હતી. જેથી પોલીસને જાણ કરી હતી. પોલીસે કારને બહાર કઢાવવા ની કાર્યવાહી હાથ ધરી હતી, સાથોસાથ દારૂ સહિતની સામગ્રી કબજે કરી લઇ સમગ્ર મામલે ઉંડાણપૂર્વકની તપાસ શરૂ કરી છે.

આજે પરોઢીયે આ ઘટના બની હોવાનું અનુમાન લગાવાયું છે, અને વાહનના નંબરના આધારે કારના ચાલકની શોધખોળ હાથ ધરી છે.