કેનેડાના પણ ભાગલા પડશે? નવા સરવેના ચોંકાવનારા પરિણામ, અમેરિકા ખુદ ટેન્શનમાં

Alberta Referendum Survey: કેનેડામાં જનમત સંગ્રહ પર મતદાન પહેલા ઈપ્સોસનો નવો સરવે સામે આવ્યો છે. આ સરવે મુજબ દર 10 માંથી 7 લોકો કેનેડાને વિભાજિત થતું બચાવવા માંગે છે, જ્યારે માત્ર 30 ટકા લોકો અલ્બર્ટાને કેનેડાથી અલગ કરવાના પક્ષમાં છે. શું કેનેડાથી અલ્બર્ટા અલગ થઈ જશે? આ સવાલ પર જનમત સંગ્રહને લઈને મંગળવારે મતદાન પ્રસ્તાવિત છે. ગ્લોબલ ન્યૂઝ અને ઈપ્સોસના સરવે મુજબ અલ્બર્ટાના 70 ટકા નિવાસીઓ કેનેડા સાથે જ રહેવાના પક્ષમાં મતદાન કરશે. આ સરવેના આંકડા સામે આવ્યા બાદ ઓટાવા અને વોશિંગ્ટનમાં રાજકીય ચર્ચા ગરમાઈ છે.

અલ્બર્ટાના નવા સરવેના મુખ્ય આંકડા

અલગ થવા સામે વિરોધ: સરવેમાં સામેલ 70% લોકોએ કેનેડા સાથે જ રહેવાની ઈચ્છા વ્યક્ત કરી છે, જ્યારે 30% લોકો અલ્બર્ટાને અલગ દેશ બનાવવા ઈચ્છે છે.

મુખ્ય શહેરોનું વલણ: અલ્બર્ટાના બે મોટા શહેરો કેલગરી અને એડમન્ટનના માત્ર 31% લોકો જ અલગ દેશ માટેના જનમત સંગ્રહનું સમર્થન કરી રહ્યા છે.

યુવાનોમાં માંગ: કેનેડાને વિભાજિત કરવાની માંગ કરનારાઓમાં સૌથી વધુ 27 થી 35 વર્ષની વયજૂથના લોકો છે.

ઇમિગ્રેશનથી નારાજગી: સરવેમાં મોટાભાગના લોકો કેનેડા સરકારની વર્તમાન ઇમિગ્રેશન નીતિઓથી નારાજ જોવા મળ્યા હતા.

સરકારનું વલણ અને પ્રીમિયરનું નિવેદન

અલ્બર્ટા પ્રાંતના પ્રીમિયર ડેનિયલ સ્મિથના જણાવ્યા મુજબ, પહેલા એ વાત પર મતદાન કરાવાશે કે, શું અહીં જનમત સંગ્રહ યોજવો જરૂરી છે કે નહીં? જો જનતા તેના પક્ષમાં હશે, તો જ આ પ્રક્રિયા આગળ વધારવામાં આવશે. બીજી તરફ, કેનેડાના વડાપ્રધાન માર્ક કાર્ની અલ્બર્ટાને અલગ થતું રોકવા માટે તમામ પ્રયાસો કરી રહ્યા છે. આ જ શ્રેણીમાં તેમણે અલ્બર્ટામાં વસતા 30 હજારથી વધુ ભારતીય સમુદાય સાથે પણ સંપર્ક સાધ્યો છે.