ફ્રાન્સમાં મોટાપાયે દેખાવોથી ઈઝરાયલ કેમ ફફડ્યું? યહૂદીઓના પલાયનની તૈયારીઓ શરૂ કરાઈ!

Israel Prepares For Mass French Jewish Exodus: ફ્રાન્સમાં વિદ્યાર્થીઓના વિરોધ પ્રદર્શનો હિંસક બન્યા બાદ ત્યાં વસવાટ કરતા યહૂદી સમુદાયની સુરક્ષાને લઈને ગંભીર ચિંતા ઊભી થઈ છે. ફ્રાન્સના માર્ગો પર સતત વધી રહેલી આગચંપી અને તોડફોડ વચ્ચે ઈઝરાયલના વડાપ્રધાન બેન્જામિન નેતન્યાહૂએ ફ્રાન્સથી મોટા પાયે યહૂદીઓના સંભવિત સ્થળાંતર એટલે કે 'અલિયા' માટે વહીવટી સ્તરે તૈયારીઓ શરૂ કરવાનો આદેશ આપ્યો છે.

ઈઝરાયલ સરકારે બનાવ્યો ખાસ એક્શન પ્લાન

• યહૂદીઓમાં ભયનો માહોલ: ઈઝરાયલના સેટલમેન્ટ્સ મંત્રી ઓરિટ સ્ટ્રોકે કેબિનેટ બેઠકમાં જણાવ્યું હતું કે ફ્રાન્સમાં પરિસ્થિતિ એટલી હદે વણસી ગઈ છે કે યહૂદીઓ હવે રસ્તા પર નીકળતાં પણ ડરી રહ્યા છે અને તેમને નિશાન બનાવવાની આશંકા પ્રબળ બની છે.
• વસવાટ માટેની યોજના: અલિયા અને ઇન્ટિગ્રેશન મંત્રી ઓફિર સોફરે ભારપૂર્વક કહ્યું કે ફ્રાન્સના તોફાનોને ધ્યાનમાં રાખીને ત્યાંથી મોટી સંખ્યામાં આવનારા યહૂદી પરિવારોને ઈઝરાયલમાં વસાવવા માટે તાત્કાલિક માળખાગત યોજના તૈયાર કરવી પડશે.
• ઉચ્ચ સ્તરીય ટીમની રચના: પીએમ નેતન્યાહૂએ ઓફિર સોફર, નાણા મંત્રી બેઝેલેલ સ્મોટ્રિચ અને ડાયસ્પોરા મંત્રી અમીચાઈ ચિકલીને સંયુક્ત રીતે એક સર્વાંગી પ્લાન તૈયાર કરવાની જવાબદારી સોંપી છે.

ચાલુ વર્ષે 4 હજાર ફ્રેન્ચ યહૂદીઓ ઈઝરાયલ પહોંચ્યા

ઈઝરાયલી રિપોર્ટ્સ અનુસાર, આ વર્ષની શરૂઆતથી લઈને અત્યાર સુધીમાં અંદાજે 4,000 ફ્રેન્ચ યહૂદીઓ ઈઝરાયલ આવી ચૂક્યા છે. આ સંખ્યા ગત વર્ષના સમાન સમયગાળાની સરખામણીએ લગભગ 40 ટકા વધુ છે. ફ્રાન્સમાં વણસતા વાતાવરણ વચ્ચે ઈઝરાયલને આશંકા છે કે આગામી દિવસોમાં આ સ્થળાંતરની ગતિ હજુ વધુ તેજ બનશે.

વિદ્યાર્થી પ્રદર્શનોથી કેમ ભડકી હિંસા?

શિક્ષણ વ્યવસ્થા સામે રોષ: પેરિસથી શરૂ થયેલું આંદોલન હવે માર્સેઈ, નાંતે અને મોંપેલિયે જેવા મોટા શહેરોમાં ફેલાઈ ચૂક્યું છે. શાળાઓમાં શિક્ષકોની અછત, ક્લાસરૂમમાં અતિશય ભીડ અને જર્જરિત શાળા ઇમારતોના વિરોધમાં વિદ્યાર્થીઓ રસ્તા પર ઊતર્યા હતા.

શાળાઓમાં આગચંપી અને લૂંટફાટ: ફ્રેન્ચ શિક્ષણ મંત્રાલય મુજબ, આશરે 24 જેટલી સ્કૂલોમાં આગચંપી કે લૂંટફાટની ઘટનાઓ બની છે અને શિક્ષણ વિભાગના 78 કર્મચારીઓ ઈજાગ્રસ્ત થયા છે. દેશની લગભગ 3,700 સ્કૂલોમાંથી 735 શાળાઓ આ હિંસક પ્રદર્શનોથી પ્રભાવિત થઈ છે.

ધરપકડ અને સગીરો: પ્રદર્શનો હિંસક બનતાં પોલીસે ધરપકડોનો દોર શરૂ કર્યો છે, જેમાં પકડાયેલા લોકોમાં આશરે 85 ટકા સગીર વયના છે. શાળાઓમાં કથળતી સુરક્ષા સ્થિતિને કારણે સામાન્ય શિક્ષણ પણ ઠપ થઈ ગયું છે.