VIDEO | એરપોર્ટ પર લાઈનમાં ઊભા હતા અને મિસાઈલ આવીને પડી, સાઉદીમાં દમ્મામ અને રિયાધ એરપોર્ટ પર હુથીઓનો એટેક

Middle East War Updates: મધ્ય પૂર્વ (મિડલ ઇસ્ટ) માં યુદ્ધનું કેન્દ્ર હવે ઈરાનથી ખસીને સાઉદી અરેબિયા તરફ વળતું જોવા મળી રહ્યું છે. સાઉદી અરેબિયાની રાજધાની રિયાધ સ્થિત કિંગ ખાલિદ ઇન્ટરનેશનલ એરપોર્ટ પર યમનના હૂથી વિદ્રોહીઓએ સતત બીજા દિવસે પણ ખતરનાક હુમલો કર્યો છે. આ હુમલાને કારણે એરપોર્ટ પર ભારે અફરાતફરી મચી ગઈ હતી અને વ્યાપક નુકસાન થયું છે.

મુસ્લિમ શ્રદ્ધાળુઓ લાઈનમાં હતા અને અચાનક તબાહી મચી

સામે આવેલા ડાકુમેન્ટરી ફૂટેજ અને રિપોર્ટ્સ અનુસાર, જ્યારે આ હુમલો થયો ત્યારે મોટી સંખ્યામાં ઉમરાહ માટે આવેલા યાત્રીઓ પોતાની ફ્લાઇટ્સમાં સવાર થવા માટે લાઈનમાં ઊભા હતા અને તૈયારી કરી રહ્યા હતા. અચાનક વિસ્ફોટ થતાં જ એરપોર્ટ પર નાસભાગ જેવી સ્થિતિ સર્જાઈ ગઈ હતી અને લોકો જીવ બચાવવા માટે અત્રતત્ર દોડવા લાગ્યા હતા.

પાકિસ્તાની નાગરિકનું મોત, 11 ઈજાગ્રસ્ત

સાઉદી નાગરિક ઉડ્ડયન સત્તામંડળ (Civil Aviation Authority) ના જણાવ્યા અનુસાર, રિયાધ એરપોર્ટ પર થયેલા આ નવા હુમલામાં એક પાકિસ્તાની નાગરિકનું મૃત્યુ થયું છે, જ્યારે 11 અન્ય લોકો ઘાયલ થયા છે. તમામ ઘાયલોને તાત્કાલિક ધોરણે નજીકની હોસ્પિટલોમાં ખસેડવામાં આવ્યા છે જ્યાં તેમની સારવાર ચાલી રહી છે.

અધિકારીઓએ જણાવ્યું કે એરપોર્ટની સંપત્તિને પણ મોટું નુકસાન પહોંચ્યું છે, જેનું હાલ આકલન કરવામાં આવી રહ્યું છે. આ અગાઉ શનિવારે થયેલા પહેલા હુમલામાં 12 લોકોના મોત થયા હતા, જે છેલ્લા એક દશકથી વધુ સમયમાં સાઉદી અરેબિયાની ધરતી પર થયેલો સૌથી ઘાતક હુમલો માનવામાં આવે છે.

એરપોર્ટ બંધ રાખવાની મુદત લંબાઈ, દમ્મમમાં પણ હુમલાનો દાવો

24 કલાક વધુ એરપોર્ટ બંધ: ફ્લાઇટ ટ્રેકિંગ સાઇટ 'Flightradar24' ના જણાવ્યા અનુસાર, સુરક્ષા અને વર્તમાન સ્થિતિને ધ્યાનમાં રાખીને સત્તાવાળાઓએ રિયાધ એરપોર્ટને બંધ રાખવાની મુદત વધુ 24 કલાક માટે વધારી દીધી છે. હવે આ એરપોર્ટ સોમવારે રાત્રે 21:00 GMT સુધી બંધ રહેશે.

અન્ય શહેરોને પણ નિશાન બનાવ્યા

નાગરિક ઉડ્ડયન સત્તામંડળે પૂર્વમાં આવેલા 'દમ્મામ એરપોર્ટ' પર પણ હુમલો થયાની જાણકારી આપી છે, જેને હૂથીઓએ નિશાન બનાવવાનો દાવો કર્યો હતો. સાઉદી ગઠબંધન સેનાએ આ વિસ્તારમાં એક ડ્રોનને હવામાં જ તોડી પાડ્યાનું જણાવ્યું છે. સ્થાનિક નાગરિકોના જણાવ્યા અનુસાર, રિયાધ શહેરમાં રવિવારે પણ અનેક જગ્યાએ મોટા ધડાકાના અવાજો સાંભળવા મળ્યા હતા, જેના કારણે સમગ્ર શહેરમાં ભયનો માહોલ છવાયેલો છે.