'ભારતને અનલિમિટેડ ક્રૂડ ઓઇલ આપવા તૈયાર...', અમેરિકાના વિદેશમંત્રી માર્કો રુબિયોની જાહેરાત

US Ready to Supply Unlimited Oil to India : મિડલ ઈસ્ટ(પશ્ચિમ એશિયા)માં ચાલી રહેલી ભીષણ સૈન્ય કટોકટી અને હોર્મુઝની ખાડીમાં સર્જાયેલી નાકાબંધી વચ્ચે ભારત માટે વૈશ્વિક સ્તરેથી એક ખૂબ જ રાહત સમાન અને મોટા સમાચાર સામે આવ્યા છે. પોતાના ચાર દિવસીય ભારત પ્રવાસ પર આવતા પહેલા અમેરિકાના વિદેશ મંત્રી માર્કો રુબિયોએ નવી દિલ્હીને અસીમિત એનર્જી (ઓઇલ અને ગેસ) આપવાની મોટી જાહેરાત કરી છે.

માર્કો રુબિયોનું મોટું નિવેદન: "ભારત અમારો શાનદાર સહયોગી"

પોતાના સત્તાવાર ભારત પ્રવાસના બરાબર એક દિવસ પહેલાં મિયામી ખાતે પત્રકારો સાથે વાતચીત કરતી વખતે અમેરિકાના વિદેશ મંત્રી માર્કો રુબિયોએ ભારત સાથેના સંબંધોને સર્વોચ્ચ ગણાવ્યા છે. રુબિયોએ સ્પષ્ટ શબ્દોમાં ખાતરી આપી છે કે, "વોશિંગ્ટન ભારતને એટલી ઊર્જા (ઓઇલ અને ગેસ) વેચવા માટે સંપૂર્ણ તૈયાર છે, જેટલી નવી દિલ્હી અમારી પાસેથી ખરીદવાની ઇચ્છા રાખે છે." તેમણે ભારતને અમેરિકાનો એક બહેતરીન અને અત્યંત મજબૂત ભાગીદાર ગણાવ્યો હતો.

વેનેઝુએલા પાસેથી પણ સસ્તું તેલ મેળવશે ભારત

વિદેશ મંત્રી રુબિયોએ આ દરમિયાન વધુ એક મહત્ત્વની આર્થિક જાહેરાત કરતાં જણાવ્યું કે, વેનેઝુએલાના અંતરિમ રાષ્ટ્રપતિ ડેલ્સી રોડ્રિગેઝ પણ આગામી સપ્તાહે ભારતની મુલાકાતે આવી રહ્યા છે, જ્યાં ભારતને કાચું ઓઇલ વેચવાના મુદ્દે આખરી મહોર વાગશે. અત્રે ઉલ્લેખનીય છે કે, ચાલુ વર્ષે (2026માં) ફેબ્રુઆરીની શરૂઆતમાં જ અમેરિકન રાષ્ટ્રપ્રમુખ ડોનાલ્ડ ટ્રમ્પે ભારત દ્વારા વેનેઝુએલાથી ઓઇલ ખરીદવાની પ્રક્રિયાને લીલી ઝંડી આપી હતી અને ભારત માટે ટૅરિફ રેટ 25 ટકાથી ઘટાડીને 18 ટકા કરવાનો ઐતિહાસિક વેપાર કરાર કર્યો હતો. મિડલ ઈસ્ટના યુદ્ધ વચ્ચે અમેરિકા અને વેનેઝુએલાના આ સપ્લાય ઓપ્શનથી ભારતમાં પેટ્રોલ-ડીઝલની અછતનો ખતરો ટળી જશે.

23થી 26 મે: માર્કો રુબિયોનો ચાર દિવસીય ભારત પ્રવાસ

અમેરિકાના વિદેશ મંત્રી 23 મેથી 26 મે સુધી ભારતના પ્રવાસે રહેશે. આ 4 દિવસ દરમિયાન તેઓ નવી દિલ્હી ઉપરાંત કોલકાતા, આગ્રા અને જયપુરની મુલાકાત લેશે. રાજદ્વારી દૃષ્ટિએ રસપ્રદ વાત એ છે કે, છેલ્લા 14 વર્ષમાં કોલકાતાની મુલાકાત લેનારા માર્કો રુબિયો પ્રથમ અમેરિકી વિદેશ મંત્રી બનશે. આ પૂર્વે વર્ષ 2012 માં તત્કાલીન વિદેશ મંત્રી હિલેરી ક્લિન્ટને કોલકાતાની યાત્રા કરી હતી. કોલકાતામાં આવેલું અમેરિકન વાણિજ્ય દૂતાવાસ (US Consulate General)એ વિશ્વમાં અમેરિકાનું બીજા નંબરનું સૌથી જૂનું વાણિજ્ય દૂતાવાસ છે.

26 મેના રોજ ક્વાડ(Quad)ની મહત્ત્વની બેઠક

આ પ્રવાસના અંતિમ દિવસે એટલે કે 26 મેના રોજ ભારતમાં 'ક્વાડ' (Quad) દેશોના વિદેશ મંત્રીઓની હાઇ-લેવલ બેઠક યોજાશે. આ મહત્ત્વપૂર્ણ બેઠકની અધ્યક્ષતા ભારતના વિદેશ મંત્રી એસ. જયશંકર કરશે. આ બેઠકમાં અમેરિકાના માર્કો રુબિયો ઉપરાંત ઓસ્ટ્રેલિયાના વિદેશ મંત્રી પેની વોન્ગ અને જાપાનના વિદેશ મંત્રી મોતેગી તોશિમિત્સુ ખાસ હાજર રહેશે. આ બેઠકમાં ઇન્ડો-પેસિફિક ક્ષેત્રમાં ચીનની આક્રમકતા અને વૈશ્વિક ઊર્જા કટોકટી પર નિર્ણાયક ચર્ચા થવાની સંભાવના છે.