ફીલિપાઇન્સમાં હવામાં જ બે વિમાનો ટકરાયાં બંનેના ફૂર્ચા ઊડી ગયા : ચારે પાયલોટ મૃત્યુ પામ્યા

• આ ભયંકર અકસ્માત ફર્નાંડો એરફોર્સ બેઝ ઉપર જ આકાશમાં થયો ફીલિપાઈન્સ એરફોર્સનાં આ બંને વિમાનો ટ્રેનિંગ માટે જ ઉપયોગમાં લેવાતાં

મનીલા : ફીલીપાઈન્સમાં એક અતિ વિચિત્ર છતાં આંચકાજનક ઘટના બની. તે જોઈ લોકો આશ્ચર્યચક્તિ પણ થઈ ગયા સાથે વ્યથિત પણ તેટલા જ થયા. તે ઘટનાક્રમ તેવો છે કે લિપાન સીટીનાં એરફાર્સ બેઝ ઉપર બે ટ્રેનર વિમાનો એકબીજા સાથે અથડાઈ પડયાં. ફીલીપાઈન્સ એરફોર્સ (પી.એ.એફ) દ્વારા આ જાહેરાત કરવામાં આવી હતી, સાથે શોક પણ દર્શાવવામાં આવ્યો હતો. હવે પછી દરેક ટ્રેનર વિમાનોની પૂરેપૂરી તપાસ કરીને જ તેને ઉડાડવાની પરવાનગી આપવા એરફોર્સે નિર્ણય લીધો છે.
સ્થાનિક મીડિયા જણાવે છે કે આ અકસ્માત એરફોર્સ-બેઝ ઉપરનાં આકાશમાં જ થયો તેથી આસપાસ તો કોઈ નુકસાન થયું ન હતું. જોકે એરફોર્સ અધિકારીઓએ તુર્ત જ મૃત્યુ પામેલા પાયલોટ્સના કુટુમ્બીજનોનો સંપર્ક સાધી તેમને આશ્વસ્ત કર્યા હતા.
આ દુર્ઘટનાગ્રસ્ત વિમાનો- એસ.એફ.-૨૬૦, હળવા પ્રકારનાં વિમાનો છે. તે ઇટાલીમાં ડીઝાઈન કરવામાં આવે છે. આ વિમાનો ૧૯૬૦માં બનાવવામાં આવ્યાં હતાં. તેથી તેઓ પ્રમાણમાં ઘણાં જ જૂના પણ થઈ ગયા હતા. તે માત્ર ટ્રેનિંગ માટે જ ઉપયોગમાં લેવાતાં હતા.
તે વિમાનમાં બે પાયલોટ બેસી શકે તેવી જ વ્યવસ્થા હોય છે. તેમાં પિસ્ટનવાળું એન્જિન હોય છે. આમ છતાં તે એક્રોબેટિક-કેપીસીટીવાળું છે.
ફીલીપીનો એરફોર્સ તેનો ઘણા સમયથી ઉપયોગ કરે છે. ૨૦૧૭માં મરાવી-સીટી ઓપરેશનમાં પણ તે ઉપયોગમાં લેવામાં આવ્યાં હતાં. આ વિમાનો હળવા હોવા છતાં ઝડપી પણ છે. તેથી તેની લોકપ્રિયતા વધુ છે. પરંતુ છેલ્લાં કેટલાક સમયથી તે પૈકીનાં કેટલાંએ વિમાનો ક્ષતિગ્રસ્ત થતાં રહ્યાં છે. ચાર મહિના પહેલાં જ એક એસ.એફ.-૨૬૦ વિમાન ક્રેશ થયું હતું તેમાં બંને પાયલોટ માર્યા ગયા હતા. ૨૦૨૩માં પણ આવી જ દુર્ઘટના બની હતી.