ઈરાન અંગે ઉહાપોહ વચ્ચે ટ્રમ્પે છેલ્લી ઘડીએ પ્લાન બદલ્યો! આ દેશમાં સેના ઉતારવાની તૈયારી, સરકારના ધબકારા વધ્યા

વોશિંગ્ટન: હાલ સમગ્ર વિશ્વની નજર ઈરાન પર ટકેલી છે અને અટકળો લગાવાઈ રહી છે કે આગામી 24 કલાકમાં અમેરિકા તેહરાન પર હુમલો કરી શકે છે. પરંતુ બીજી તરફ, ડોનાલ્ડ ટ્રમ્પે પોતાનો પ્લાન બદલી નાખ્યો હોય તેમ જણાય છે. હવે ટ્રમ્પની નજર સાત સમંદર પાર નહીં, પરંતુ પોતાના જ પાડોશી દેશ મેક્સિકો પર છે. એક ચોંકાવનારા અહેવાલ અનુસાર, ટ્રમ્પની ટીમ મેક્સિકો પર દબાણ કરી રહી છે કે તેઓ અમેરિકન સેનાને પોતાની સરહદમાં પ્રવેશવા દે. આ પાછળનો હેતુ મેક્સિકોમાં સક્રિય 'ડ્રગ કાર્ટેલ'નો ખાતમો અને 'ફેન્ટાનિલ' લેબ્સને નષ્ટ કરવાનો છે. ટ્રમ્પના આ દબાણે મેક્સિકો સરકારની ઊંઘ હરામ કરી દીધી છે.

જોઇન્ટ ઓપરેશનના નામે સૈન્ય હસ્તક્ષેપ

અમેરિકી અખબાર 'ન્યુયોર્ક ટાઇમ્સ' દ્વારા ગુરુવારે અમેરિકી અધિકારીઓના હવાલાથી આ દાવો કરવામાં આવ્યો છે. રિપોર્ટ અનુસાર, અમેરિકા મેક્સિકો પર દબાણ બનાવી રહ્યું છે કે તેઓ 'જોઇન્ટ ઓપરેશન'(સંયુક્ત કાર્યવાહી)ની અનુમતિ આપે. કૂટનીતિક ભાષામાં તેને ભલે સહયોગ કહેવામાં આવે, પરંતુ વાસ્તવમાં તેનો અર્થ એ છે કે અમેરિકી સેના અથવા સ્પેશિયલ ફોર્સ મેક્સિકોની ધરતી પર ઉતરશે અને ડ્રગ સિન્ડિકેટ પર સીધી કાર્યવાહી કરશે. ટ્રમ્પ તંત્રનું માનવું છે કે મેક્સિકો સરકાર અને ત્યાંની પોલીસ ડ્રગ કાર્ટેલ્સ સામે લડવામાં અસમર્થ છે, તેથી હવે અમેરિકાએ પોતે મેદાનમાં ઉતરવું પડશે.

અમેરિકી સેનાના ઓપરેશનની શક્યતા કેમ વધી?

મેક્સિકોના રાષ્ટ્રપતિ ક્લોડિયા શીનબામ દ્વારા સૈન્ય હસ્તક્ષેપની શક્યતાઓને ફગાવી દેવામાં આવી છે, પરંતુ નિષ્ણાતો માને છે કે આ વખતે સ્થિતિ અલગ છે. અમેરિકી સેનાના મેક્સિકોમાં પ્રવેશવા પાછળ અનેક કારણો છે

ફેન્ટાનિલનો કહેર: અમેરિકામાં ફેન્ટાનિલ એક જીવલેણ રોગ સમાન બની ચૂક્યું છે. આ એક સિંથેટિક ઓપિઓઇડ છે જે હેરોઇન કરતાં 50 ગણું વધારે નશીલું છે. અમેરિકામાં દર વર્ષે 70 હજારથી વધુ લોકોના મોત ફેન્ટાનિલના ઓવરડોઝથી થાય છે.

ટ્રમ્પનો સંકલ્પ: ટ્રમ્પે પોતાના ચૂંટણી પ્રચાર દરમિયાન શપથ લીધા હતા કે તેઓ ડ્રગ કાર્ટેલનો સર્વનાશ કરશે. જે પ્રકારે ISIS સામે યુદ્ધ થયું હતું, તે જ પ્રકારે ડ્રગ્સ વિરુદ્ધ પણ જંગ છેડાશે.

આર્થિક હથિયાર

મેક્સિકો પોતાના દેશની સંપ્રભુતાનો હવાલો આપી અમેરિકાના હસ્તક્ષેપનો ઈનકાર કરી રહ્યું છે, પરંતુ ટ્રમ્પ પાસે 'ટેરિફ' (આયાત શુલ્ક)નું મોટું હથિયાર છે. ટ્રમ્પે ધમકી આપી છે કે જો મેક્સિકો ડ્રગ્સ પર કડક કાર્યવાહી નહીં કરે, તો તેઓ મેક્સિકન સામાન પર 25%થી 100% સુધી ટેરિફ લાદી દેશે. મેક્સિકોની અર્થવ્યવસ્થા સંપૂર્ણપણે અમેરિકા પર નિર્ભર હોવાથી તેમને આખરે ઝૂકવું પડી શકે છે.

કેવું હશે ઓપરેશન?

ટ્રમ્પની ટીમ 'સર્જિકલ સ્ટ્રાઇક' જેવું આક્રમક ઓપરેશન ઇચ્છે છે. આ યોજના મુજબ, અમેરિકી ઇન્ટેલિજન્સ ડ્રગ લેબ્સની ઓળખ કરશે અને અમેરિકી સ્પેશિયલ ફોર્સ ત્યાં જઈને તેને તબાહ કરશે. ટ્રમ્પ સરકાર આ ઓપરેશનને 'મેક્સિકોની મદદ' તરીકે રજૂ કરશે, જેથી મેક્સિકો સરકારની આબરુ પણ જળવાય અને અમેરિકાનું લક્ષ્ય પણ પૂરું થાય.

મેક્સિકો માટે 'આગળ કૂવોને પાછળ ખાઈ'

મેક્સિકો માટે સ્થિતિ અત્યંત ગંભીર છે. જો તેઓ અમેરિકન સેનાને પ્રવેશ આપે, તો દેશમાં જનતાનો વિદ્રોહ ફાટી નીકળી શકે છે કારણ કે લોકો તેને રાષ્ટ્રીય અપમાન ગણી શકે છે. જો તેઓ ઇન્કાર કરે, તો આર્થિક પ્રતિબંધોને કારણે દેશનું અર્થતંત્ર ભાંગી પડે તેમ છે, જેનાથી બેરોજગારી અને મોંઘવારીમાં ભયાનક વધારો થઈ શકે છે.