USમાં ટ્રમ્પનું આગમન: બિટકોઇન ચમકશે, શેરબજાર અટવાશે, જુઓ બ્રોકરેજ સંસ્થાઓનો અંદાજ

Donald Trump: અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે બીજી વખત અમેરિકી રાષ્ટ્રપતિ તરીકે શપથ લીધા છે. આ સાથે વૈશ્વિક ઈક્વિટી માર્કેટ પણ ટ્રમ્પ 2.0 માટે તૈયાર થઈ રહ્યું છે. રોકાણકારો નવી વહીવટી નીતિઓ હેઠળ ટેરિફના વધારાના ઉપયોગની સંભાવના વિશે સાવચેત છે. ડોનાલ્ડ ટ્રમ્પ પહેલા જ સ્પષ્ટ કરી ચૂક્યા છે કે તેઓ ઊંચા ટેરિફના પક્ષમાં છે. જેના કારણે ચીન સાથે વેપાર યુદ્ધનો ભય ફરી વધી ગયો છે. તેની સાથે H1-B વિઝા અને બિટકોઈન પણ તેમના એજન્ડામાં છે.

બ્રોકરેજ સંસ્થાઓનો રજૂ કરેલો અંદાજ 

ડોનાલ્ડ ટ્રમ્પના તાજેતરના નિવેદનો અને તેમનું વહીવટીતંત્ર કેવી રીતે ટ્રેડ ટેરિફ, ઇક્વિટી માર્કેટ, ક્રિપ્ટો, H1-B ઈમિગ્રેશન વિઝા અને અન્ય એસેટ ક્લાસને અસર કરી શકે છે. આ અંગે આગેવાન બ્રોકરેજ સંસ્થાઓ દ્વારા આંકલન કરાયું છે જે અત્રે રજુ કરાયું છે.

વૈશ્વિક ઇક્વિટી માર્કેટમાં સાર્વત્રિક ટેરિફ ખૂબ જ અસરકારક

HSBCના મતે વૈશ્વિક ઇક્વિટી માર્કેટ માટે 10%નો સાર્વત્રિક ટેરિફ ખૂબ જ અસરકારક સાબિત થઈ શકે છે અને કંપનીઓ માટે આ પરિસ્થિતિને સંભાળવી પડકારજનક રહેશે. S&P 500 કંપનીઓના લગભગ 20% ખર્ચ આયાતી માલ પર આધારિત છે.

10% ટેરિફ S&P 500ની શેર દીઠ કમાણી (EPS)માં 3-5%ના ઘટાડા તરફ દોરી શકે છે. જેની સૌથી વધુ અસર લેટિન અમેરિકા, યુરોપ (યુનાઇટેડ કિંગડમ સિવાય) અને ઉત્તર એશિયાના બજારો પર જોવાશે.

અમેરિકામાં સામગ્રી, ઓટો અને સેમિકન્ડક્ટર જેવા ક્ષેત્રોને ફાયદો

ટ્રમ્પના આગમનથી અમેરિકામાં સામગ્રી, ઓટો અને સેમિકન્ડક્ટર જેવા ક્ષેત્રોને ફાયદો થશે. જ્યારે ગ્રાહક ક્ષેત્રને સૌથી વધુ અસર (-6% થી -8%) થશે કારણ કે તે ચીનમાંથી ભારે આયાત કરે છે.

ચીનની વાત કરીએ તો તેના અસરગ્રસ્ત ક્ષેત્રોમાં ટેક હાર્ડવેર અને ઉપકરણો (યુએસમાંથી 15% આવક), બેંકો (લોન ને ઓછો વિકાસ અને નબળી સંપત્તિની ગુણવત્તા)નો સમાવેશ થાય છે.

ભારત ની વાત કરીએ તો 95% વિશ્લેષકો માને છે કે સાર્વત્રિક ટેરિફની તેમના શેરો પર કોઈ અસર થશે નહીં. આ બજાર તુલનાત્મક રીતે વધુ સારું પ્રદર્શન કરી શકે છે. 

જુલિયસ બેરના મતે મૂડી બજારો હાલમાં સ્થિર મેક્રોઈકોનોમિક પરિબળોની અપેક્ષા રાખે છે, જ્યારે નીતિની અનિશ્ચિતતા તેની ટોચ પર છે. ટ્રમ્પ વહીવટીતંત્રની આર્થિક નીતિઓ વિરોધાભાસી છે. ફેડરલ રિઝર્વ નવા પ્રમુખ હેઠળ ઉચ્ચ વૃદ્ધિ અને ફુગાવા સાથે રિફ્લેશનરી પોલિસીની સંભાવનાને કારણે 2025 સુધીમાં ફેડરલ ફંડ લક્ષ્ય દરને 4.5% પર સ્થિર રાખે તેવી શક્યતા છે.

આ પણ વાંચો: ...તો તમે ખુશ નહીં રહો શકો: અમેરિકાની સત્તા સંભાળતા જ ટ્રમ્પની બ્રિક્સ દેશોને ધમકી

ટેરિફ લાદવાથી ફુગાવો વધવાની શક્યતા 

જેફરીઝના મતે 2025ની શરૂઆતમાં રોકાણકારોનો સૌથી મોટો મુદ્દો એ છે કે નવા ચૂંટાયેલા રાષ્ટ્રપતિ ડોનાલ્ડ ટ્રમ્પના પોલિસી એજન્ડામાં ઘણા વિરોધાભાસ છે. ટેરિફ લાદવા અથવા ઇમિગ્રેશન પર કડકતા જેવા મુદ્દાઓથી ફુગાવો વધવાની શક્યતા છે.

ક્રિપ્ટોની વાત કરીએ તો સંસ્થાકીય રોકાણકારો ક્રિપ્ટોને અવગણી શકતા નથી કારણ કે ટ્રમ્પ વહીવટીતંત્ર તેને મુખ્ય પ્રવાહમાં લાવવાની તૈયારી કરે છે. જો કે, બિટકોઈનને સોનાના વિકલ્પ તરીકે જોવામાં આવતું નથી, પરંતુ તેના બદલે ડિજિટલ વિકલ્પ તરીકે જોવામાં આવે છે.

ટ્રમ્પ વહીવટીતંત્રની ટેરિફ-સંબંધિત નીતિઓ દ્વારા ચીનના નિકાસકારોને નકારાત્મક અસર થઈ શકે છે. જો કે, તે ચીનની કંપનીઓને યુએસમાં ઉત્પાદન એકમો સ્થાપવાની તક પણ પૂરી પાડી શકે છે.

નોમુરાના મતે ટ્રમ્પ તેમના પ્રચારમાં આપેલા વચનોને પૂર્ણ કરીને ચીન પર ઝડપથી ટેરિફ દરમાં વધારો કરી શકે છે. જે તબક્કાવાર અમલમાં આવશે અને Q2-2025થી ફુગાવો વધી શકે છે. જો ટ્રમ્પ શપથ લીધાની સાથે જ ટેરિફ લાગુ કરે છે, તો તે ફુગાવામાં તીવ્ર વધારો તરફ દોરી શકે છે.