PM Modi France Slovakia Visit : વડાપ્રધાન નરેન્દ્ર મોદી શનિવારે (13 June 2026) ફ્રાન્સ અને સ્લોવાકિયાની એક સપ્તાહ લાંબી ઐતિહાસિક યાત્રા માટે રવાના થઈ ગયા છે. આ મહત્વપૂર્ણ વિદેશ પ્રવાસ દરમિયાન પીએમ મોદી ફ્રાન્સના એવિયન (Evian)માં આયોજિત થનારી G7 શિખર સંમેલન (G7 Summit)માં વિશેષ અતિથિ તરીકે ભાગ લેશે. આ સાથે જ તેઓ વિશ્વના કેટલાય ટોચના નેતાઓ સાથે દ્વિપક્ષીય અને વૈશ્વિક મુદ્દાઓ પર ઉચ્ચ સ્તરીય વાતચીત કરશે.
પોતાના પ્રવાસ પહેલા વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ એક્સ (X) પર પોસ્ટ શેર કરીને માહિતી આપી હતી કે, ભારતની વ્યૂહાત્મક વિચારધારામાં ફ્રાન્સનું એક ખૂબ જ ખાસ અને અનોખું સ્થાન છે. તેમણે કહ્યું કે, આ વર્ષની શરૂઆતમાં ફ્રાન્સના રાષ્ટ્રપતિ ઇમેન્યુઅલ મેક્રોને ભારતની મુલાકાત લીધી હતી, જેના પછી બંને દેશોના સંબંધો 'વિશેષ વૈશ્વિક વ્યૂહાત્મક ભાગીદારી' ના એક નવા સ્તરે પહોંચી ગયા છે.
ફ્રાન્સના રાષ્ટ્રપતિ મેક્રોન સાથે નીસમાં થશે મુલાકાત
પીએમ મોદીએ પોતાના પ્રસ્થાન નિવેદનમાં (Departure Statement) જણાવ્યું કે, 'જ્યારે હું નીસ (Nice)માં રાષ્ટ્રપતિ મેક્રોનને મળીશ, ત્યારે અમે ફેબ્રુઆરી પછી દ્વિપક્ષીય સંબંધોમાં થયેલી પ્રગતિની વ્યાપક સમીક્ષા કરીશું, અને પરસ્પર સહયોગના આગામી પગલાં પર ચર્ચા કરીશું. હું આ સિવાય પરસ્પર હિતો સાથે જોડાયેલા મહત્વપૂર્ણ વૈશ્વિક મુદ્દાઓ પર પણ વાતચીત કરવા માટે ઉત્સુક છું.'
સ્લોવાકિયાનો પ્રવાસ હશે અત્યંત ઐતિહાસિક
ફ્રાન્સ પછી વડાપ્રધાન મોદી સ્લોવાકિયાના પ્રવાસે જશે. રાજકીય અને રાજદ્વારી દ્રષ્ટિએ આ પ્રવાસ ભારત માટે ખૂબ જ ઐતિહાસિક સાબિત થવાનો છે.
33 વર્ષ પછી પ્રથમ મુલાકાત : વર્ષ 1993 માં સ્લોવાકિયાને આઝાદી મળ્યા પછી કોઈપણ ભારતીય વડાપ્રધાનની આ પ્રથમ સ્લોવાકિયા યાત્રા છે.
ટોચના નેતૃત્વ સાથે વાર્તાલાપ : પીએમ મોદી સ્લોવાકિયાની રાજધાની બ્રાતિસ્લાવા (Bratislava)માં ત્યાંના રાષ્ટ્રપતિ પીટર પેલેગ્રીની અને વડાપ્રધાન રોબર્ટ ફિકો સાથે દ્વિપક્ષીય સંબંધો, આર્થિક રોકાણ અને સાંસ્કૃતિક સંબંધોને મજબૂત કરવા માટે વિશેષ બેઠક કરશે.
G7 સમિટમાં ગુંજશે 'ગ્લોબલ સાઉથ'નો અવાજ
G7 શિખર સંમેલનને લઈને વડાપ્રધાન મોદીએ વિશ્વ મંચ પર દેશની વધતી શાખ પર પ્રકાશ પાડ્યો હતો. તેમણે જણાવ્યું કે, 'આ સતત 8મી વખત છે, જ્યારે ભારતને G7 સમિટમાં સામેલ થવા માટે વિશેષ રૂપે આમંત્રિત કરવામાં આવ્યું છે, જે વૈશ્વિક મંચ પર દેશના વધતા કદ અને આંતરરાષ્ટ્રીય ભાગીદારોના અતૂટ ભરોસાને દર્શાવે છે. આ વૈશ્વિક સંમેલનમાં ભારત માત્ર પોતાની મજબૂત વાત જ નહીં રાખે, પરંતુ આખા 'ગ્લોબલ સાઉથ' (Global South)ની આકાંક્ષાઓ અને અધિકારોને પણ મુખર અવાજ આપશે.'
