'આજે ફાયરિંગ પણ થશે...', ટ્રમ્પના ડિનરમાં ગોળીબાર પહેલા કેરોલિને આપેલા નિવેદન પર લોકોએ કર્યા સવાલ

Karoline Leavitt Video: વ્હાઇટ હાઉસ કોરેસ્પોન્ડન્ટ્સ ડિનર પહેલા કેરોલિન લેવિટનું 'શોર્ટ્સ વિલ બી ફાયર' (ગોળીઓ ચાલશે) વાળું નિવેદન હવે ચર્ચામાં છે. તેમણે આ વાત ટ્રમ્પના ભાષણ માટે એક રૂપક તરીકે કહી હતી, પરંતુ તેના થોડા સમય પછી જ અસલી ગોળીબાર થઈ ગયો. આ પછી સોશિયલ મીડિયા પર સવાલો ઉઠવા લાગ્યા અને નિવેદનને લઈને જાત-ભાતની અટકળો તેજ થઈ ગઈ છે.

'કહ્યાના થોડા સમય બાદ ત્યાં ગોળીબાર થયો'

રાષ્ટ્ર પ્રમુખ ડોનાલ્ડ ટ્રમ્પના ડિનર હોલની બહાર શૂટિંગની ઘટના બાદ વ્હાઇટ હાઉસની પ્રેસ સેક્રેટરી કેરોલિન લેવિટનું એક નિવેદન ખૂબ ચર્ચામાં છે. તેમણે વ્હાઇટ હાઉસ કોરેસ્પોન્ડન્ટ્સ ડિનરના થોડા સમય પહેલા જ કહ્યું હતું કે 'આજે રાત્રે કેટલાક શોર્ટ્સ ફાયર થશે', અને તેના થોડા સમય પછી ત્યાં ખરેખર ગોળીબાર થયો. આ ટાઇમિંગના કારણે તેમનો વીડિયો સોશિયલ મીડિયા પર ઝડપથી વાઈરલ થઈ ગયો. તેમના નિવેદનને લઈને એક યુઝરે તો ત્યાં સુધી સવાલ કરી દીધો કે, 'શું આ હુમલો પ્લાનિંગ હેઠળ કરવામાં આવ્યો હતો?'

'કેટલાક શોર્ટ્સ પણ ફાયર થશે'

કેરોલિન લેવિટે ઈન્ટરવ્યૂમાં કહ્યું હતું કે, 'ટ્રમ્પ સંપૂર્ણ રીતે તૈયાર છે. તેમનું ભાષણ મજેદાર અને એન્ટરટેનિંગ હશે. આજે રાત્રે કેટલાક શોર્ટ્સ પણ ફાયર થશે, તેથી દરેકે જોવું જોઈએ.' સ્પષ્ટપણે તેમનો અર્થ એ હતો કે ટ્રમ્પ પોતાના ભાષણમાં તીખી વાતો કહેશે. ઇન્ટરવ્યુમાં જ્યારે તેમને પૂછવામાં આવ્યું કે શું તેમણે ભાષણ લખ્યું છે, તો તેમણે કહ્યું કે આ મોટે ભાગે ટ્રમ્પે પોતે લખ્યું છે. 

નિવેદનને અલગ દૃષ્ટિકોણથી જોવાયું

મહત્વનું છે કે ત્યારે 'શોર્ટ્સ ફાયર્ડ' શબ્દનો ઉપયોગ થયો હતો, જેનો અર્થ સામાન્ય રીતે ધારદાર રાજકીય હુમલા અથવા રમુજી કટાક્ષ થાય છે. પરંતુ બાદમાં જ્યારે ખરેખર ગોળી ચાલી, ત્યારે તેમના નિવેદનને અલગ દૃષ્ટિકોણથી જોવામાં આવવા લાગ્યું.

'શું ટ્રમ્પે પોતે પોતાના પર હુમલો કરાવ્યો?'

જેવા જ કેરોલિન લેવિટના નિવેદન વાઈરલ થયા, સોશિયલ મીડિયા પર અનેક પ્રકારની કાવતરાની વાતો પણ શરૂ થઈ ગઈ. કેટલાક લોકોએ સવાલ ઉઠાવ્યો કે શું લેવિટને પહેલાથી કંઈક ખબર હતી. કેટલીક પોસ્ટમાં લખવામાં આવ્યું, 'તેમણે પહેલાથી જ શૂટિંગની વાત કેવી રીતે કહી દીધી?' અન્ય એક એક્સ હેન્ડલે પોસ્ટ કર્યું, 'શું આ શૂટિંગ એક પ્લાનિંગ હેઠળ કરવામાં આવેલ ફોલ્સ ફ્લેગ હતો?' એટલે કે યુઝરે પૂછ્યું કે શું ટ્રમ્પે પોતે પોતાના પર હુમલો કરાવ્યો.

કેટલાકે રાજકીય ફાયદો લેવાનું ષડયંત્ર ગણાવ્યું

તેમજ કેટલાક લોકોએ તેને રાજકીય ફાયદો લેવાનું ષડયંત્ર ગણાવી દીધું. આ વાત પર પણ ચર્ચા થઈ કે શું ઇવેન્ટમાં જાણીજોઈને પોલિટિકલ ફાયદો ઉઠાવવા માટે શૂટિંગ કરાવવામાં આવ્યું. એક યુઝરે લખ્યું, 'કેરોલિન લેવિટે બધાને આજે રાત્રે જોવા માટે કહ્યું કારણ કે ડોનાલ્ડ ટ્રમ્પ માહોલ ગરમાવશે, અને ગોળીઓ ચાલશે. શું પોલિટિકલ ફાયદો ઉઠાવવા માટે આ પહેલેથી પ્લાન કરવામાં આવ્યું હતું?'

ટ્રમ્પના ડિનર દરમિયાન કેવી રીતે થયું શૂટિંગ?

રાષ્ટ્ર પ્રમુખ ટ્રમ્પના કોરેસ્પોન્ડન્ટ્સ ડિનર દરમિયાન એક વ્યક્તિ હથિયાર લઈને અંદર ઘૂસી ગયો. તેની પાસે બંદૂક અને છરી બંને હતા. તે બોલરૂમ તરફ વધી રહ્યો હતો, ત્યારે જ યુએસ સિક્રેટ સર્વિસે તેને રોકી લીધો. ટ્રમ્પ સંપૂર્ણ સુરક્ષિત છે. ઉપ રાષ્ટ્ર પ્રમુખ જેડી વેન્સને પહેલા બહાર કાઢવામાં આવ્યા, જ્યારે એજન્ટ્સે ટ્રમ્પ અને મેલાનિયા ટ્રમ્પને ઘેરીને સુરક્ષિત જગ્યાએ પહોંચાડ્યા.

આ પણ વાંચો: ટ્રમ્પના કાર્યક્રમમાં અંધાધૂંધ ગોળીબાર, સિક્રેટ સર્વિસે બચાવ્યો જીવ, એક હુમલાખોર પકડાયો

રિપોર્ટ્સ અનુસાર, હુમલાખોરે ગોળી ચલાવી હતી અને એક સુરક્ષાકર્મીને બુલેટપ્રૂફ જેકેટ પર ગોળી વાગી, પરંતુ તે સુરક્ષિત છે. ટ્રમ્પે બાદમાં પ્રેસ કોન્ફરન્સમાં કહ્યું કે હુમલાખોર 'લોન વુલ્ફ' એટલે કે એકલો કામ કરનાર વ્યક્તિ લાગે છે. તપાસ હજુ ચાલુ છે અને FBIની ટીમ આ મામલાની તપાસ કરી રહી છે.