જો ફરી હુમલો થયો તો યુદ્ધ હિંદ મહાસાગર સુધી પહોંચશે! ઈરાનની અમેરિકાને ખુલ્લી ચેતવણી

Iran war Indian Ocean : જો અમેરિકા દ્વારા વધુ એક સૈન્ય હુમલો કરવામાં આવે તો ઈરાન પોતાના યુદ્ધના ભૌગોલિક ક્ષેત્રને હિંદ મહાસાગર સુધી વિસ્તારી શકે તેવી ગંભીર ચેતવણી ઈરાનના સર્વોચ્ચ નેતાના વરિષ્ઠ સલાહકારે આપી છે. તેહરાન અને વોશિંગ્ટન વચ્ચે તણાવ ચરમસીમાએ પહોંચ્યો છે ત્યારે આ નિવેદને વૈશ્વિક સ્તરે સુરક્ષા ચિંતાઓ વધારી દીધી છે. ફારસ ન્યૂઝ એજન્સી દ્વારા જારી કરાયેલા વિડિયોમાં અધિકારી યાહ્યા રહીમ સફવીએ જણાવ્યું છે કે પર્શિયન ગલ્ફ અને હોર્મુઝની ખાડીથી લાલ સમુદ્ર સુધી ફેલાયેલા આ સંઘર્ષની સરહદો વધુ આગળ વધીને હિંદ મહાસાગર અને સંભવતઃ તેનાથી આગળ સુધી પહોંચી શકે છે.

વિશ્વનો ત્રીજો સૌથી મોટો મહાસાગર

વિશ્વના પાંચ મહાસાગરોમાં ત્રીજા ક્રમનો સૌથી મોટો હિંદ મહાસાગર આશરે 70.5 મિલિયન ચોરસ કિલોમીટર વિસ્તાર ધરાવે છે અને પૃથ્વીની જળસપાટીનો આશરે 20 ટકા હિસ્સો રોકે છે. ઉત્તરમાં એશિયાથી ઘેરાયેલા આ મહાસાગરમાં બાબ અલ-મંદેબ અને હોર્મુઝની ખાડી જેવા અત્યંત મહત્ત્વપૂર્ણ દરિયાઈ વેપાર માર્ગો આવેલા છે, જ્યાં ચાલી રહેલા સંઘર્ષના કારણે કોમોડિટી જહાજોની અવરજવરમાં ભારે ઘટાડો નોંધાયો છે. આ દરિયાઈ માર્ગો પર સર્જાયેલા અવરોધોને કારણે વૈશ્વિક વેપાર અને સપ્લાય ચેઇનને ગંભીર ફટકો પડ્યો છે.

ભારત પર પણ થઇ શકે છે ગંભીર અસર

આ પરિસ્થિતિની સીધી અને મોટી અસર ભારત પર પડવાની પૂરી શક્યતા છે કારણ કે ભારત હિંદ મહાસાગરના ઉત્તરીય છેડે આવેલું છે અને ગલ્ફ ક્ષેત્ર સાથે તેની વ્યાપક દરિયાઈ વેપારી ભાગીદારી છે. ભારત તેની ક્રૂડ ઓઇલની જરૂરિયાતના 88 ટકાથી વધુ ભાગ આયાત કરે છે, અને હોર્મુઝની ખાડીમાં સર્જાયેલા અવરોધોને કારણે ઊર્જા પુરવઠો પ્રભાવિત થયો છે. સપ્ટેમ્બર મહિનામાં બ્રેન્ટ ક્રૂડ 100 ડૉલર પ્રતિ બેરલને પાર કરી ગયું છે, જેના કારણે ભારતનું આયાત બિલ વધવાની સાથે રૂપિયા પર પણ દબાણ સર્જાયું છે અને દેશના અર્થતંત્ર સામે મોટા પડકારો ઊભા થયા છે.